八點起身準備好, 個MUA係佢D朋友, 話想試下條友掂唔掂喎, $1000一日, 仲要包佢的士錢加多$100, 原來佢係某化妝學校既PART TIME, 化開雜誌或者大型宴會, 由於塞車, 佢遲左黎呀, 化左個幾鐘, 十點幾我地先可以出門口, 點知個的士大佬又慢吞吞, 我地去到影樓都成11:20, 蝕左20分鐘呀, 租個度係$550/2個鐘, 間影樓都幾新, D設備仲幾好添, 係我換衫既時候, 佢就影我男友先, 首先換上婚紗, 我既淘寶婚紗終於出場喇, 呢套係我之後買的, 我朋友話鍾意呢套多D喎, 呢套冇拖尾仲要係平一倍, 不過算啦, 落雨我都唔想帶套拖尾婚紗出街!
影左好耐婚紗, 仲可以影埋我既小白, 同埋新造既花球, 最初朋友見到叫我帶舊個個花球架, 不過我堅持帶呢個, 點知影完出黎佢話估唔到原來呢個D色出黎係咁靚, 好襯套婚紗, 都話SHARP D影相靚D架啦! 出面落雨, 我地又遲到, 唯有係影樓影多一個鐘, 咁又加左$300, 臨尾既20分鐘我先換紫色晚裝影左少少咋, 之後就走了!
朋友個PARTNER渣左部七人車, 方便我地帶住咁多野, 我仲可以係車換衫添, 油錢泊車錢當然係我地俾返啦, 影完影樓去食飯, 仲要諗去邊度影添, 臨時臨急要諗D有蓋地方真辛苦, 最後諗到去觀塘碼頭, 換左套粉紅晚裝, 都幾襯呢度!
影完呢一站我都好攰了, 落雨真係好辛苦, 個人又攰, 條裙尾又濕, 不過請晒假點都要影到尾, 再下一站就去左大潭, 我都唔知係邊, 黎到又估唔到好靚喎, 原來平時見人影個水壩係呢度, 佢地話婚紗好FEEL D, 我又換返婚紗喇, 影到天黑都幾恐怖, 仲要好多蚊滋, 我件婚紗裙尾濕晒黑晒喇, 真係好辛苦!
八點幾換最後既紅色晚裝, 出發去煤氣燈街, 呢度係我BIG DAY MUA JUNE介紹架, 呢度條長樓梯都唔知點影, 因為成日有人行, 仲要有好大隻小強呀, 痴線架, 我朋友踩左兩腳都唔死得, 嚇死我地, 影左幾張就入左去STARBUCKS影, 呢度真係好正呀, 黎煤氣燈街其實係為左呢間STARBUCKS, 最初仲驚佢唔俾影, 點知原來佢話俾架, 仲有另一PAIR人係度影梗添, 我地係度玩左好耐先走, 出發去最後一站, 就係高街喇, 由於太夜喇, 我地影左幾張就走了!
十點幾先可以食飯, 我地個個都攰死了, 是但搵左間餐廳食小菜, 估唔到搵到間好野, D野好食又唔貴, 不過唔記得左個名喇, 哈哈! 最後成十二點先返到屋企, 真係攰到爆呢, 上輯相我地係COOL爆, 好多張都唔笑, 呢輯相我地係不停笑架, 真係好期待!
上輯相用左$4000, 呢輯相係$3000有找, 當然計埋請佢地食兩餐, 影相其實真係唔平呀! 不過今日最開心既係原來我瘦左呀, 條條裙都鬆晒, 哈哈!!
 |
| 黑色背景係咪好型呢? 哈哈, 我地都有影白色底架! |
 |
| 個花球夠晒sharp呢! |
 |
| 粉紅晚裝, 原來都幾襯影花架! |
 |
| 半夜三更著住套紅色晚裝, 我仲講笑話行出去截車唔知有冇人嚇襯呢? |
