**Minnie and Lou**: 試妝@百利純美新娘

頭先去左試妝, 今次試妝費係$200, 我見咁平, 同埋百利純美新娘都幾多人用, 所以就走去試下!

今次個MUA係LENE, 其實我未聽過, 一路D人都係話用KAMI或者嘉琪, 不過LENE都幾好心機, 佢一開始望左我個樣一陣, 第一件事就係搵雙眼皮膠紙, 個刻我都幾開心, 睇返上一篇就知點解, 呢一PART我係會幾重視, 咁先知個MUA有幾細心睇我既樣, 點知佢拎塊膠紙貼我左邊眼, 我即刻呆左, 因為我有問題係右眼, 點解佢會貼我左眼呢?仲要貼完佢睇一睇, 又蚊返出黎唔貼了!

我一直冇出聲, 佢開始化啦, 好快上左粉, 搽遮瑕, 我個超級黑眼圈算係遮得OK, 因為我仲未見到有人可以完全幫我遮到, 到佢幫我化隻眼既時候, 我就開始講我既右眼情況佢知, 佢話...諗住幫我痴兩層假眼睫毛黎挺返隻眼皮喎, 乜原來咁都得架咩? 不過算啦, 正如我之前所講, 其實真係唔係好覺眼, 佢痴完兩層再畫埋眼線, 都OK既, 之後佢再幫我畫下眼線, 其實我唔鍾意畫得太勁架, 因為一畫完就會好似貓眼, 結果真係囉, 我同佢講, 好似貓眼呀, 佢話唔係呀, 有另一個女STAFF係度, 佢都話, 對眼大左好多呀...

算啦...可能我睇唔慣姐...到SET褂頭, 今次佢用花, SET出黎都幾OK, 仲借件褂俾我穿上身睇添, 唔錯既!

之後到晚裝喇, 佢問我鍾意咩色, 我話紫色啦, 佢就揀左個紫色頭飾俾我, 係好大個個D, 佢問我想試大花定有羽毛個D, 我揀左羽毛 (因為覺得紫色大花好娘), 其實我一早講左冇咩IDEA要咩頭, 佢話幫我整個型D既頭, 因為晚裝可以型D, 佢幫我SET左個楊千嬅頭呀, HELP....我覺得我係唔襯囉, 仲要加個大頭飾係中間, 我一眼睇剩係覺得好似雞冠, 之後佢幫我轉左少少, 換左另一個仲SHARP既頭飾, 我真係好唔慣, 呢個時候男朋友就到, 佢冇咩COMMENT, 咁我再同MUA講, 唔好SET個頭太高, 我唔想高過男朋友, 佢又幫我改少少, 放返D頭髮落黎, 換左個頭飾, 嘩...好好多呢, 原來我都係鍾意D簡單既頭飾, 試妝真係好有用架, 咁我下次又會識揀D!

完成晒, 總括黎講佢換妝換頭都好快手, 同埋幾有心機, 不過我始終唔鍾意對貓眼同個千嬅頭, 之後到JOJO走黎同我傾價錢, 佢地係咁叫我即刻落訂, 我同佢講仲有兩個未試, 佢地係咁叫我唔好三心兩意呀, 呢樣個樣, 個OFFER仲好吸引, 係$4288早晚, 再包三個人添, 真係好抵呀, 同我既$6000爭好遠, 不過我依好決絕話唔關價錢事, 唔關個MUA事, 我唔想甩人底, 最後佢話呢個OFFER俾到我下星期六, 即係我試埋最後一個妝為止, 都算係幾好!

試左兩次, 好明顯知道上次個間係好新, 兩個人都搞咁耐, 今次一個搞仲快過上次好多添, 希望之後兩個令我滿意啦! POST左上次同今次既褂頭係FACEBOOK, 好好笑, 100%男士都鍾意今次既褂LOOK, 90%女士鍾意上次個個, 因為CUTE D同SWEET D喎, 真係頭痛呀!