2016 QE第十次產檢+第五次內科檢查

2016年8月26日  37W

本來今日係最後工作日, 但因為要去檢查, 所以提早一日放產假了!

今日應該係生之前最後一次黎了, 竟然有少少唔捨得! 走兩場, 首先係內科, 同之前一樣, 都冇乜特別, 醫生叫我生完再返黎檢查下, 約左11月, 之後就走得了!

到產檢, 其實都係睇返D報告, 冇中到B鏈, 其他都冇乜特別, 因為我會私家生, 唔會再幫我跟進任何野了, 包括血糖!

睇完晒就走了, 正式開始我既悠長假期!

小小UPDATE

三個幾月冇UPDATE呢個BLOG了, 要知道湊小朋友係好忙, 湊兩個小朋友更加忙, 尤其兩個小朋友都咁細, 暫時黎個小UPDATE, 遲下再補返舊POST!

照顧兩個小朋友, 比我想像中係癲好多, 亦辛苦好多, 仲記得出院第一日, 一起身兩個一齊喊, 真係好攞命, 工人姐姐又搞唔掂, 激到我飛起, 結果要求救阿哥工人黎湊大女去佢屋企玩!

簡單講下呢幾個月發生既事, 順利生完妹妹, 工人姐姐激死自己, 幫大女報K, 大女N班開學, 之後放完產假開工! 第一胎自己都有少少抑鬱, 今胎呢.....其實係連抑鬱既時間都冇, 因為個腦太多野要諗, 當時滿腦子只係諗報邊間幼稚園, 開學有咩未準備, 唯一有少少時間上網就係泵奶時!

妹妹已經三個月了, 仲未戒晒夜奶, 不過佢算好乖, 唔算好扭計, 仲好識氹人, 見到人會笑, 而大女當然有呷醋, 好彩叫有返學可以抖幾個鐘, 返左學都識左好多野, 講多好多野, 又會唱歌跳舞, 雖然學費好貴, 但見佢咁開心都覺得值得!

好喇, 又要湊女, 返工得閒再上黎UPDATE!

我地既第一張全家幅

哈哈!

其實家姐都錫妹妹既!

咁樣睇又幾似樣, 又俾人話佢地似混血兒!

2016 QE第九次產檢

2016年8月19日  36W

踏入36W了, 今日又要去QE, 又可以照超聲波, 好多人奇怪點解我可以成日去政府檢查, 仲可以照咁多次, 我只可以話....我多病丫嘛!

磅重驗尿後, 就被叫左入房照, 明明3日前張醫生話5磅12安士, 今日姑娘話6磅9安士, 點解可以差咁遠? 真係出世先可以開估邊個準!

照完佢順便幫我抽埋驗B鏈, 好彩冇咩唔舒服, 之後就等見醫生了!

今次我好老實同佢地講約左私家生, 佢地都冇黑面喎, 仲約我下星期黎覆多次診, 睇埋D報告, 所以我既產假又提早一日放了!

2016 第五次私家產檢

2016年8月16日  35W4D

臨近產期, 產檢日子好密, 每次私家都要俾錢, 好肉赤呢!

今日見張醫生, 等左成2個鐘, 唔怪得佢已經唔接中途新症, 真係勁多人呢, 仲要D人好唔識做, 座位應該係俾大肚婆坐, 而唔係小朋友或爸爸囉, 我想搵個位坐低量血壓都好艱辛!

出奇地張醫生話BB變返中碼, 而家係5磅12安士, 出世應該會輕過家姐, 但點解我個肚會咁大? 另外醫生話未收到我既血報告, 要我食鐵丸, 佢話我而家食梗30MG既鐵係唔夠, 結果開左200MG俾我!

約左兩星期後, 即係臨生前2日再黎睇, 希望到時收齊報告啦!

2016 QE第四次內科檢查

2016年8月5日  34W

本來今日要走兩場, 但因為早幾日入院照過超聲波, 所以產科幫我改左36W先再黎, 今日剩係睇內科就得了!

一直好想唔再睇, 希望今次係最後一次黎, 已經同醫生講左我會私家生, 約左9月1日, 但佢都係要我臨生前黎多次, 37W再見了!

今次檢查順便問醫院攞返D驗血報告俾張醫生, 其實我唔太明, 上胎胡醫生都冇咁麻煩, 今次張醫生出晒信要我問QE攞, 仲要攞埋B鏈報告! QE攞血報告要去返大樓申請, 係封信後面寫授權書, 佢話佢地會直接俾醫生, 希望唔會呃我啦!

2016 QE入院記

2016年8月2日  33W4D

是日8號風球, 我放左一日假, 老公下晝要返工, 我由琴晚開始一直痾, 到今日係不停痾水, 當然都有胎動, 知道妹妹冇事, 但係都好膽心, 會唔會有細菌影響妹妹!

去到夜晚都有痾, 就決定去QE睇下了, 食完飯後就同老公搭的士去, 攞住白卡直上B4, 填完資料後就等, 姑娘幫我檢查下, 知我唔係生得, 不過都要住一晚院觀察, 老公幫我買少少乾糧就返去了!

我個床位係窗邊, 不過冇風景睇, 姑娘話要駁機聽心跳, 有胎動就要按制, 同我上次臨生前一樣, 點知一駁就成粒鐘, 又唔可以玩電話, 又冇電視睇, 勁無聊!

最搞笑入到黎又冇再痾, 張床瞓到我腰骨好痛, 醫生知我糖尿, 安排我食糖尿餐, 真係食到想嘔, 等到第二日下晝, 終於俾我出院了, 醫生到而家都唔知咩事, 可能係中葯, 又可能係黑芝麻, 應該唔會係幾日前既手卷卦, 呢次之後, 唯有停中葯同黑芝麻先, 過一排先再食了!

2016 第四次私家產檢

2016年7月26日  32W4D

早幾日先係QE照完, 今日又到私家照喇, 上次QE話我胎水多, 有早產風險, 今次可以問下張醫生點睇!

呢期興$30半板海膽手卷, 黎開葵芳, 所以我都去左試, 大肚婆食真係會俾人眼望望, 不過又真係幾好食, 哈哈!

見到張醫生, 佢話妹妹係大左少少, 胎水又未至於多好多, 如果BB大胎水多少少係正常, 聽完佢講又放心晒, 睇返SIZE其實同家姐差不多, 今次仲會早幾日開刀, 唔知會唔會一樣體重呢?

2016 QE第八次產檢

2016年7月22日  32W

今日剩係黎產檢, 最期待係可以照超聲波, 但一直奇怪點解都係去日間4樓, 黎到登記後如常磅重驗尿, 之後好快就被叫左入房, 原來呢度有間房可以照聲波!

入到去姑娘同我照, 佢都話一般係34W先有得照, 所以唔知點解我32W就要照, 佢幫我照左好多次, 話我胎水有D多, BB亦較大, 有機會會早產, 聽完真係嚇襯, 照完後佢話我之後會如常咁見醫生, 睇醫生會點安排!

醫生都係講呢D, 叫我再控制下飲食, 2星期後再安排照, 希望唔會早產啦, 好驚呀!

2016 QE第一次見營養師

2016年7月18日  31W3D

今日第一次見營養師, 係日間中心閣樓, 我第一次黎呢層, 冇乜人, 俾張紙我上去俾錢再返黎, 又要俾錢, 又係冇得CLAIM!

首先見姑娘, 問得好詳細我每日幾餐食乜多, 例如舊肉幾大舊, 幾大碗飯都要知, 之後就見營養師, 都係例牌講個D, 當然.....我明白係點食, 只係我多數都出街食, 點控制到咁多呢? 見左大約一個鐘就走了, 仲叫我8月尾返黎, 我都就生了, 諗住放飛機算!

2016 QE第七次產檢+第三次內科檢查

2016年7月8日  30W

今日又要去QE, 仲要係走訪兩層, 先去內科登記, 再去產科登記+磅重, 搞掂又去返內科等見醫生, 好鬼忙!

內科一如以往, 見下醫生, 講幾句, 仲要次次要俾錢, 真係唔想再黎!

輪到產科, 醫生話我拮手指功課唔好, 迫我見營養師, 其實都唔係好差之嘛, 佢話我好多空腹都5點幾, 要見下營養師先得, 就係咁, 今日去一去, 又換來一堆覆診紙, 即是又要同公司請好多假, 真係一副搏炒狀態咁!

不過有樣好, 醫生安排我32W黎照聲波, 一般糖尿產婦係34W先再照, 唔知點解佢會安排我32W黎, 所以兩星期後我又要返黎了!

2016 醫院選擇

2016年6月19日  27W2D

父親節既節目, 就係去睇醫院, 首先去左港安, 其實上次阿女入院都知好靚, 不過今次攞正牌去參觀婦產科病科!

婦產科有2層, 一層係3人房, 感覺幾好, 都幾大幾靚, 我好鍾意, 每間房仲有2個廁房, 好方便, 唔好處就係餵奶要搭LIFT去第二層!

另1層係二人同單人房, 同埋BB室, 反而二人房我覺得仲細, 感覺一般, 不過可以加錢安排母嬰同室, 夜晚BB會推返入BB房, 呢個我會遲D再考慮, 如果要加錢又好似唔抵!

阿女係度參觀得好開心, 走來走去, 感覺幾好!

之後去埋寶血, 我地搭地鐵再行去, 係行梗既過程, 我已經覺得有D遠, 去到參觀, 都幾細.....二人又細, 仲要SHARE電視, 除非你一個人住晒, 如果唔係我呢個電視迷真係唔得!

就係咁.....我決定揀返去港安生喇, 寧願俾多少少錢, 住多一日, 又唔怕要照燈, 又方便老公湊個女黎, 兩姊妹可以同一間醫院出世喇!

2016 第三次私家產檢

2016年6月14日  26W4D

哈, 唔計照結構, 去到26W先第三次產檢, 真係好懶呢!

妹妹只係大左一個星期左右, 仲係中碼, 接近大碼架喇, 張醫生話有機會同家姐一樣, 都係後期先變大碼!

今次仲問埋醫院既野, 一心諗住去寶血生, 但張醫生話其實寶血冇包照燈, 如果要照燈, 同港安唔差得遠, 因為家姐個時係港安係有照的, 所以我都要預妹妹係要照, 另外張醫生話原來港安都會UPGRADE二人房, 二人房仲可以安排母嬰同室, 好吸引呀, 叫我去睇下環境再決定!

就係咁.....我又開始選擇困難, 仲要諗埋開刀日子, 佢話我可以由8月28日開始揀, 醫院都唔太FULL, 決定左再話佢知, 佢會寫紙我去交按金!

2016 QE第二次內科檢查

2016年6月10日  26W

一個月要抽2次血, 去2次檢查, 雖然好似好爽唔駛返工, 其實都幾攰, 尤其而家大熱天時, 真係好鬼辛苦!

內科檢查就要黎之前一星期內黎抽一次血, 為左費事又請假, 我揀左星期六黎抽, 要我專登出黎, 真係好鬼煩, 仲要內科檢查係要俾錢, 第一次$100, 之後每次都要$60, 黎到又冇咩講, 好想唔黎喇!

今次抽血我又冇乜野, 其實就算有, 都做唔到乜, 所以只能觀察住, 生完又睇下會唔會回復正常, 極度無聊, 好既就係唔駛等太耐就走得, 可以返去湊女喇!

2016 QE第六次產檢

2016年6月1日   24W5D

又到產檢時間, 都係例行磅重量血壓玩尿, 見醫生時聽心跳, 睇下我篤手指功課, 之後再落2樓抽血!

記得細個時, 好日都唔會抽一次血, 為左想知血型就走去捐血, 之後間中都有去捐血, 或身體檢查抽下, 但自從有BB, 抽多左, 第二胎, 抽得仲多, 唔好以為抽到麻木, 其實每次都好驚, 因為真係唔同姑娘唔同手勢, 睇你好唔好彩!

今日.....我就唔好彩, 遇上個差姑娘, 好後生, 首先拮左入黎周圍了了下, 我已經痛到飛起, 連望都唔敢望, 仲叫我忍住, 以為佢抽到啦, 之後佢幫我搵棉按住, 再幫我貼膠布, 心諗.....咁好服務既? 因為平時係叫你自己按傷口, 再俾返膠布你自己搞掂, 以為走得啦, 點知原來佢話頭先抽唔到, 要再抽, 個下真係想講粗口, 之後係內側再抽, 都係痛到飛起!

真係覺得自己好可憐, 上胎都試過係醫院抽到隻手瘀晒, 今胎就搞單咁野, 快D生完收工, 唔想再成日走黎抽血喇!

2016 結構性超聲波檢查QE

2016年5月19日  22W6D

聽日就去旅行喇, 臨出發前係QE照埋結構先!

記得上胎係QE照結構幾詳細的, 只係個期太遲, 今次都一樣, 差不多23W先俾我照, 所以我都係私家照左!

老公請下晝假陪我黎, 今次等左唔駛一個鐘, 入到房照, 一直以為照既係醫生, 原來唔係, 因為我叫佢開假紙, 佢話只可以醫生開, 佢只可以開到診紙俾我!

感覺今次冇上次咁詳細, 姑娘亦都比上次粗魯, 成日按到我個肚好痛, 記得上次照個心照左好耐, 今次就唔太耐, 所以政府野真係撞手神, 遇著個好既你先係好彩!

照完後佢話可以照到既都冇問題, 咁我地就走了, 安心明天出發去日本喇!

2016 產前講座 - 美素

2016年5月14日  22W1D

諗住今胎都唔會參加產前講座, 因為上胎已經參加左好多, 加上已經識晒湊B, 最重要係冇時間再去, 但因為想要個三角枕, 所以就去左參加了!

上胎我冇去過美素講座, 所以唔知呢個三角枕有咩用, 但上次去左探人地既BB, 用三角枕墊住個BB瞓又幾好喎, 唔怕佢嘔奶會流到去鼻, 我大肚又可以用黎墊肚墊腳, 個枕袋又可以拆出黎洗, 真係幾好呢!

得到媽媽們指點, 可以遲到, 知道佢地大約幾時派枕, 就較時間去, 去到佢唔俾小朋友入場, 就叫左老公帶阿女周圍行, 得我自己入去, 聽左15分鐘左右就開始派枕了, 哈哈! 派完枕仲有野食, 食完我就走了, 好過份!

其實都唔止我一個人走, 好多人都走, 因為講座完左只係會送媽媽奶, 一D都唔吸引!

等老公同阿女返黎, 我地就去下午茶了, 雖則為左個三角枕走出黎好似有D無聊, 但我地當係帶阿女出下街, 遲D妹妺出世就未必可以成日出街喇!

爸爸帶左阿女去行街, 好開心!

2016 QE第一次內科檢查

2016年5月13日  22W

估唔到無端端會多一項檢查, 第一次走訪3樓, 都係磅重量血壓玩尿, 之後就去醫生房門口等, 呢間房等既都係大肚婆, 不過人就唔多, 得幾個, 大約半個鐘就入得了!

由於大肚, 其實乜都做唔到, 現階段都只係觀察, 一個月黎睇一次, 睇之前又係要抽血, 其實都幾無聊!

妊娠糖尿就每次黎都要抽血, 甲狀腺就要覆診前幾日黎抽, 點解唔可以抽一次檢查晒? 我已經要篤手指, 突然覺得D血好唔矜貴, 嗚嗚!

2016 QE第五次產檢

2016年5月4日  20W5D

又到一個月一次既QE檢查, 今次竟然奇蹟地冇中蛋白尿, 不過上次抽完血, 話我甲狀腺有少少問題, TSH低左, 所以呢.....要內科同我跟進, 亦即係我之後請假次數會更多!

醫生寫左紙俾我去3樓約期, 再去2樓抽血, 今日走訪3層樓, 好攰呀!

內科話得星期五可以睇, 所以我生日變左有得放假, 但原來呢度又要玩尿, 好彩只係第一次, 但又冇講係驗乜, 睇黎我要努力儲樽仔裝尿黎喇!

2016 結構性超聲波檢查 - 孫醫生

2016年4月29日  20W

諗左好耐去唔去私家照結構, 因為好貴, 張醫生話唔幫我做, 所以約到六月尾先再見我, 加上佢係冇碟俾我, 俾咁多錢, 我會想好似上胎咁有隻DVD留念下, 第時俾佢地睇返!

周圍問下價, 有DVD既醫生都唔算多, 問過第一胎睇過既羅醫生, 原來已經FULL左, 所以最後都係搵返孫醫生, 已經加到$2500喇, 兩年間加左$500都幾多, 不過佢又唔難BOOK, 時間都OK!

上次好似要等3粒鐘, 所以今次我地都有準備, 登記完再去食野, 估唔到今次快左, 未食完已經打黎, 大約2個鐘就有得睇!

照左冇耐孫醫生已經話呢個係妹妹黎喇, 我可以慳返唔少喇, 好多人生左仔就會想追女, 但生左女又未必會想追仔, 都幾真架, 我覺得2姊妹一齊成長係好開心, 如果呢胎係仔, 其實都幾煩, 我要諗換個三房單位, 但真係會好吃力, 所以短時間內都唔駛迫切換樓住, 哈哈!

妹妹冇家姐咁多動作, 上次家姐係咁郁又踢腳, 今次妹妹可能瞓梗覺, 只係左揮左下手咋, 照左十五分鐘左右, 好健康呀, 真係放心晒!

唔怪得孫醫生快左, 原來佢真係好誇張, 而家有兩間檢查房, 係我入房既時候, 原來佢係隔離房照梗, 呢度就姑娘準備好晒俾佢, 佢一照完就過黎, 同時間隔離又有姑娘準備另一個媽媽既野, 佢真係好堅呢!

2016 QE第四次產檢

2016年4月6日  16W5D

由於有妊娠糖尿, 所以一個月都要黎一次檢查, 由醫生跟進, 仲要每次黎都要抽血檢查, 好彩轉左工, 病假唔駛扣錢, 上份工去一去就要扣1/5糧, 都幾慘架!

去政府檢查, 最麻煩就係要玩尿, 一來唔衞生, 二來唔知點解我成日中蛋白尿, 一唔OK就要即場驗多次, 再唔OK就俾個樽你再留, 咁短時間邊有可能咁多尿留? 所以我都準備定一支野飲狂飲谷尿!

今次都唔例外啦, 又衰左, 又要留尿, 之後再去抽血, 加埋等既時間, 真係次次幾粒鐘, 又要搭幾程車, 其實係好攰架!!

2016 第二次私家產檢

2016年3月31日  15W6D

第二胎比第一胎冇咁緊張, 所以頭三個月都過得好快, 產檢更加比上胎疏, 仲記得上胎15W應該都去過私家三四次了, 今胎反而只係第二次黎, 當然啦, 去一次係要俾一次錢, 好貴架!

開始問下開刀既野, 張醫生反而一副唔急既樣, 話醫院好多位, 感覺到佢唔太想我地揀寶血醫院,  仲要係自己BOOK個隻, 可能佢係寶血會賺得少D, 既然佢想我經佢約醫院, 我都唔介意俾佢賺多少少既, 話晒交個肚皮俾佢, 佢開心D聯針都會聯得細心D啦, 哈哈!

一心諗住今次會睇到性別, 點知小B唔聽話遮住左, 不過醫生就估計係女, 因為係PATPAT個位睇唔見有野突出黎, 仲諗住老公會有D失望, 估唔到佢又冇喎, 睇黎佢都幾期待多一個情人, 到時我地位就更加有威脅喇!

張醫生話SIZE都係大左一星期左右, 唔算好多, 都仲係中碼, 我都同佢講左有妊娠糖尿, 佢話有醫院幫我跟進就得, 另外QE有結構期俾我, 佢都唔會幫我照結構, 慳返D, 佢真係一副唔想賺你錢既態度咁, 想像到佢產檢有幾咁忙, 要賺都寧願賺你開刀錢!

我地都有帶阿女黎, 當然佢都未知咩事, 睇住個MON都冇反應, 暫時都覺得佢應該唔會呷醋, 希望佢地會相親相愛啦!

2016 QE全日血糖測試

2016年3月24日 14W6D

早幾日收到QE電話, 同預計一樣, 都係走唔甩糖尿, 開始我既篤手指生涯!

首先都係要係度坐一日監, 撞正考試, 就帶埋NOTES入院溫!

全日既行程同上胎一樣, 連食既野都係大同小異, 唔同既係今次仲夜左, 老公放工黎到陪左我一陣先走得, 由於六點已經晚飯, 到走個時係勁肚餓, 所以走左去食拉麵, 哈哈, 我都係一個唔聽話既媽媽黎架喇!

早餐, 有細過鼻屎既肉碎架!

午餐, 其實都OK豐富架!

晚餐....有魚食!

2016 口服葡萄糖測試

2016年3 月19日  14W1D

由於上胎有妊娠糖尿, 今胎要飲兩次糖水, 而第一次就係14W!

而家QE飲糖水轉晒去星期六一早, 老公都有我黎, 因為要空肚, 所以我好肚餓呀, 飲糖水地方都轉左去日間2樓, 即係平時抽血既地方!

去到先抽血, 之後一人一支糖水, 而家轉晒用樽裝住, 等我仲懶醒攞定支飲管, 樽裝都易入口, 今次感覺易入口D, 但都係好辛苦, 甜到乸喉, 之後一直係個胃狼下狼下咁, 但都要忍住唔嘔得呀!

為免再中, 今次飲完係咁行, 陪老公行返去佐敦食早餐, 係我睇住佢食, 好可憐, 食完又行返去醫院, 好勤力咁行, 哈哈, 夠2個鐘抽多次血就走喇, 希望冇事啦!

2016 唐氏綜合症箍查 - QE

2016年3月7日  12W3D

今日去QE照唐氏, 老公請半晝假陪我去, 約左10點, 我地遲左少少到, 去到見到好多人呀, 例牌填完問卷就等, 但今次好快就到我地!

記得上胎照唐氏既姑娘好差, 十問九唔答, 今次呢個好人好多, 起碼會講下野, 諗住乘機問下睇唔睇到性別, 點知佢睇都冇睇就答我咁細睇唔到!

照完應該係冇咩問題, 再抽埋血就走得了, 勁快手, 媽媽谷有位媽媽早我半個鐘仲未到佢, 所以我相信係QE搞錯左次序, 真好彩!

2016 QE第三次產檢

2016年2月19日 10W

正式去政府產檢, 今日老公同我一齊去, 去到都係見姑娘, 姑娘再安排日子見醫生, 照唐氏, 結構等等, 由於我上胎有妊娠糖尿, 所以今胎要飲兩次, 第一次仲要係14W, 自己知自己事, 今胎應該都走唔甩, 好快就要開始拮手指既日子了!

今胎同上胎一樣, 有齊唐氏同結構期, 不過結構又係差不多23W先有, 仲考慮梗好唔好去私家照一次!

照完就離開醫院了, 出發去灣仔, 先去食個鳥華拉麵, 再去BB展!

2016 第一次私家產檢

2016年2月25日  10W6D

估唔到自己咁忍得, 差唔多11W先第一次去私家產檢, 今胎揀左張智醫生, 因為上胎胡醫生而家只開上晝, 連打去約時間都係, 我覺得好唔方便, 加上港安醫院加晒價, 我想轉其他, 上網睇張智醫生係寶血醫院開刀好平, 而且寶血好似唔錯, 對香港媽媽幾好, 所以想試下!

我地帶埋阿女黎, 希望佢都可以睇下小生命, 黎到登記, 話張醫生未返, 叫我地周圍行下, 差唔多到先打俾我地, 個陣個診所都冇乜人, 之後周圍行, 成個鐘先打黎, 返到黎已經坐滿晒人了, 再等多陣先到我地!

張醫生都幾好人, 首先簡單介紹下NIFTY, 不過佢都話政府唐氏有問題先驗, 之後就照超聲波, 佢話size大左5日, 而初期係計size, 所以我個預產期應該早左5日! 阿女當然係乜都唔識咁睇, 希望佢遲下會識啦!

之後再講開刀, 感覺佢好似唔多想人自己book寶血, 如網上媽媽講, 可能佢收好少錢, 張醫生話可以佢代book, 其實費用差不多, 因為自己book, 醫院會要我驗呢樣驗個樣, 呢d政府已經會驗, 冇乜必要再俾錢, 而且圍返條數其實差不多, 既然佢講到咁, 我都冇理由唔聽佢話, 俾佢賺下啦!

搞掂晒, 今次所有supplement我都自己買, 所以佢冇開俾我, 埋單$880, 一個月後再返黎!

湊女生活 - 十六個月

每個月都有好多事發生, 生完個女更加覺好多野要處理!

今個月驗到有左小B, 之後再流血要休息, 但同時間要湊住阿女, 即使你係屋企, 佢都成日要搵你, 其實真係好難休息到!

三哥三嫂有個玩具廚房唔要, 所以又益左我了, 呢個木廚房好靚架, 我細個好鍾意玩煮飯仔, 所以特別興奮, 希望阿女都鍾意! 第一日見到佢都好興奮, 仲似模似樣咁扮煮野食, 好搞笑!

多左個廚房, 個歡樂小天地要重新執拾一下, 用左個箱放, 不過就造就左阿女成日踩上去爬出黎, 另外淘左個梳化返黎, 唔駛再坐充氣梳化, 阿女好鍾意張梳化, 哈哈, 其實我都好鍾意!

除左廚房同梳化, 仲有多左架三輪車, 係老公同事送架, 雖然係男仔款, 不過又慳返, 阿女仲未識踩, 只能呆坐, 其實我覺得同坐住架BB實冇分別!

呢個月發生另一件大事, 就係阿女第一次整襯入院! 係16個月當晚, 我坐係歡樂小天地同阿女玩左陣, 但阿女太百厭成日踢到我肚, 老公就抱左阿女去梳化話同佢玩, 點知未夠一分鐘, 阿女就衝左去爬摺櫈, 連人帶櫈跌低左, 阿女係咁喊, 我以為係就咁跌襯, 點知老公有血, 嚇到我即刻去睇, 原來佢俾張摺櫈夾爆左手指, 個一刻諗住止血貼膠布可以搞掂, 但個傷口原來好大, 咁細隻手指但睇到個傷口係開晒口, 阿女喊得好勁, 又不停流血, 就即刻換衫送佢去醫院!

好彩我地兩個都唔怕血, 搵野包實阿女隻手指, 帶埋出世紙飛的去左港安, 因為有傷口會聯針, 我唔想去政府醫院, 怕聯得好肉酸, 而且我地買左保險, 所以都係私家好!

去到登記完, 姑娘幫佢包傷口, 但阿女不停掙扎, 喊得好厲害, 真係難搞! 之後等見醫生, 醫生話要聯針, 但佢咁細個好難聯, 所以要全身麻醉, 同埋要留院一晚, 但兒科病房已經FULL, 得返單人房, 所有野會X1.5, 我地份保險只包半私家, 打去法國醫院又冇房, 我同老公既公司保險都有包埋阿女, 我諗三份加埋應該唔駛保貼好多, 又費事走來走去, 就決定住單人房了!

兒科轉左新大樓, 好大好靚, 單人成間五星酒店房咁, 有好大張BB床, 有梳化房, 另外再有張梳化, 我地兩公婆都可以陪床, 如果其他房就只有一張梳化床同一位父母陪床! 骨科醫生黎到, 佢話可以半夜四點做手術, 但又要貴一截, 或者安排朝早七點, 可以正常價, 唔爭在個幾個鐘, 我地就等到第二朝先做!

當晚大家都瞓唔到, 等到第二朝, 手術好快做完, 個手術室係阿女出世個手術室對面, 估唔到第二次黎既原因會係咁! 手術完後阿女好快醒, 勁扭計, 不停喊, 連支鹽水針都俾佢扯甩埋, 又流左好多血, 最後姑娘話唔吊鹽水了!

麻醉葯過左就勁喪喊

等夠鐘可以食野, 我地叫左醫院既兒童餐食, 雖然係素食, 但都幾好, 阿女都好鍾意食, 主診醫生叫我地留多晚, 但我地堅持要出院了, 住多晚好金呀, 阿女又冇咩, 最後埋單成四萬蚊呢!

下晝瞓醒一覺就冇事了, 不過對眼就腫晒!

湊女生活 - 十五個月

呢幾個月實在太忙, 所以而家先補返幾篇BLOG!

12月有好多節目, 有我地結婚週年, 平安夜, 聖誕節, 我考完試, 除夕, 所以帶左阿女出街, 仲有就係張新床送到黎喇!

平日夜晚食完飯, 都會帶阿女落樓下商場同超市逛下, 不過佢好抗拒坐購物車, 成日都想出黎, 另外發現佢好鍾意BEAR既公仔, 其實佢屋企都有隻晚晚攬住瞓, 不過見到街既佢都會攬下, 好彩就係冇要我地買, 攬完就走!

放假例牌帶下佢去公園, 吹番梘泡, 佢好鍾意追住D泡泡, 哈哈, 不過佢仲好細, 去到公園都係俾人蝦個堆, 所以要睇到實!

帶左佢食自助餐同放題, 當然我地仲未俾生野佢食, 都係食D熟既食物, 甜品就有俾牛奶布甸, 佢都鍾意食, 所以我遲下會自己整, 而家佢仲未需要收費, 所以我地覺得二人價錢三個人食好抵!

結婚三週年食自助餐

第二日請假食放題, 順便去睇PEPPA PIG!

考完試個晚, 老公帶左個女出黎, 我地去左旺角食壽司, 阿女第一次攞住舊熟壽司食, 之前都係我地餵, 今次佢自己攞住食, 其實都係時候要佢自己食野, 咁我地就會舒服好多了!

考完試終於有返時間, 定左幾個目標係聖誕假做, 第一係整牛奶布甸, 第二就係燉湯, 第三就係織條頸巾俾阿女, BB頸巾好細條, 一晚就起到貨, 佢唔係太慣帶頸巾, 成日用手扯, 不過慢慢都習慣了!

新床送到, 好開心

仲有新頸巾

聖誕節其實冇咩地方去, 因為條街實在太多人了, 我地只係去左商場行, 對佢地黎講有我地同佢出街其實已經好開心, 不過唔知可以一齊過幾多年, 到佢大個女實賣甩我地同朋友出去了!

呢件小紅帽係3M架, 做唔到仲可以著!

2016 QE第二次檢查

2016年1 月22日  6W

終於都到左今日, 好緊張, 因為由4W到而家一直有流啡, 時多時少, 一返工就會多返, 所以都好擔心, 我記得上胎係6W3左右照到閃閃, 唔知今日照到未!

同老公照舊九點黎到, 今次少人D, 等一兩個就到我地了, 醫生都幾好, 問駛唔駛開幾日假俾我休息, 我話聽日後日都放假, 其實都唔駛了, 講真, 我都放左好多日假, 唔好意思再放!

之後開始照, 照到胎囊, 醫生話未有閃閃, 又叫我遲D再黎, 我心諗, 唔係嘛, 咁求其既? 之後佢無端端又再照多兩照, 周圍碌下, 搞到我好唔舒服, 不過我隱約見到有閃閃, 醫生再放大睇, 原來真係閃閃黎架, 個一刻真係放心晒, 第一胎照到閃閃都冇咁興奮呀!

照完又去餐廳食個早餐, 離開醫院時俾一班奶粉商係門口叫入媽媽會, 好多禮物呀, 我地話呢D會留俾小B, 唔可以偏心俾晒家姐既, 哈哈, 之後老公返工, 我又返屋企抖了!

2016 QE第一次檢查

2016年1月11日  4W3D

QE急症安排左我今日返黎照超聲波, 其實得4W, 都預左會乜都照唔到, 老公遲返工陪我黎, 呢幾日都仲有流啡, 但數量唔多, 都係淺啡分泌!

一早九點黎到, 都有幾個人等梗, 呢度應該有事先黎照既, 所以好多壞消息, 睇住有媽媽喊住出黎, 又有姑娘問媽媽考慮做手術定食葯未, 嘩, 真係聽到我好驚!

等左差唔多成個鐘先到我, 同估計一樣, 剩係照到有個胎囊, 其他都睇唔到, 再安排我6W返黎照, 叫左佢開懷孕証明俾我登記產檢, 佢最初唔肯開架, 話要有心跳先當我懷孕, 但最後都開左俾我, 不過姑娘提我要返自己區既醫院登記, 因為QE已經唔收跨區了!

我地醫院餐廳食個早餐, 再搏大霧照去登記, 佢最初真係唔肯收, 話冇位再收跨區, 我話上胎都係度產檢, 佢就叫我見左姑娘先!

姑娘都係話唔收, 除非我係度生過, 但我只係度產檢, 所以唔收, 之後我不停叫佢收我, 因為阿嫂係度生話好好, 幾個朋友係度生都話好好, 最後.....佢終於肯收我喇!

離開醫院, 老公返工, 我就返屋企休息了!

2016 急症+驗孕

1月8日  4W

返返下工, 係廁所抹到有血, 記得上胎4W都有流啡的, 心諗應該都係差唔多啫, 返埋位坐左陣, 諗諗下但上次係啡, 今次係血喎, 好似睇下醫生穩陣!

去到LUNCH仲有血, 所以就即刻走左了! 上胎我係搵私家醫生, 今胎我選擇去急症, 因為平好多, 最近既係仁濟, 一去到首先係同我驗孕, 再俾我即刻入去了!

個醫生勁HEA, 又冇表情, 直頭唔願做咁既款, 佢按左我個肚幾下, 話有1/3人係會小產, 叫我休息, 同埋呢度冇婦產科, 會寫紙俾我去瑪嘉烈睇, 我問佢幾時去, 佢答我聽日啦!

之後佢開左止痛葯俾我, 仲有瑪嘉烈既預約紙, 原來唔係聽日係星期一囉, 不過佢最好既就係開埋5日病假俾我休息, 不過就唔寫懷孕証明俾我!

走左後, 等老公出黎, 我就去左家計會驗孕攞懷孕証明, 因為有左經驗+要慳, 所以做晒功課, 家計會只需$95, 好抵!

去到家計會, 發現原來我已經流左好多血, 直頭似M一樣, 家計會姑娘話仁濟個醫生好離譜, 我流血可大可小, 冇理由仲要等到星期一, 叫我即刻去急症, 由於我唔想去瑪嘉烈, 最後就同老公飛的去左QE既急症!

QE急症等得耐少少, 不過就有幫我檢查, 照過超聲波但太細照唔到, 亦唔知流血原因, 寫左紙我星期一返黎再照, 呢度好好多, 起碼唔會嚇人, 佢話如果唔係有血塊其實唔駛太緊張!

一日內去兩次急症, 真係驚餐飽, 希望細B乖乖健康成長啦!

2016 驗孕記

一直都打算會生多個, 因為有兄弟姊妹一齊成長係會開心D, 同埋屋企人係最重要的, 第時我地會老, 離開左佢地都叫仲有個伴!

上一胎我地試左三四個月左右先有阿女, 諗住今胎應該都差唔多時間, 點知一試就中了, 有D驚訝!

1月3 日  3W2D
由於有經驗, 所以都有少少感覺, 同上次一樣下腹一直陰陰痛, 都覺得似中了, 但我呢個月完全冇戒口, 又生蠔又放題, 仲食左好多蟹!

驗一驗, 見到一條非常淺既線, 但因為係真係好淺, 所以都唔太肯定! 第二胎當然比上次鎮定好多了, 同老公講左聲好似中左, 佢都冇上次咁大反應!

1月6日  3W5D
再驗多次, 嗯, 條線深了, 都幾肯定中左, 心情開始變得複雜, 因為有好多野要去諗, 我要暫停讀書, 仲有好大原因係錢, 黎梗阿女返學會洗好多錢, 再加埋細B, 真係諗爆頭了!

湊女生活 - 十四個月

呢個月阿女突然識講個CAT字, 仲要有尾音, 好好笑, 雖然話唔好俾小朋友睇電視, 但我地都係會播WORLD FAMILY俾佢睇, 佢亦識好多野, 又會跟住佢做動作, 叻左好多!

第一次食茶木

好專心睇WORLD FAMILY

今個月仲有就係阿女人生第一個INTERVIEW, 係樓下幼稚園N班, 其實都預左冇, 不過難得呢間肯IN細B, 就當去玩下, 聽聞係500個爭幾十個位, 好恐怖!

阿女開始大, 就快訓唔到BB床, 我地又打算生多個, 所以就造碌架床俾阿女同工人, 睇左幾間, 始終鍾情家創作, 真係好靚, 咁橋呢個月又有折, 其實同其他鋪差唔多, 所以就揀左呢間了, 真係好貴, 不過應該可以訓到十幾年既!

我地造既床款, 當然會轉媽媽鍾意既顏色

飲食方面, 都係差不多, 會LUR野, 奶又飲得少, 再係咁, 我會同佢戒奶!

一家三口去飲, 媽媽好少可化妝呢!

下個月係我地結婚週年, 又有聖誕節, 奈何都係我考試既日子, 快D考完可以陪阿女喇!

食牛角, 唔可以卡位, 阿女會走來走去, 又搞後面, 人都癲