湊女生活 - 十一個月

仲有一個月就一歲喇, 回想一年前仲係籮咁大個肚, 雖然辛苦, 但係大肚婆真係好多專利, 真係幾懷念!

剛轉工一個月, 非常辛苦, 雖然地點近左, 但晚晚都要OT, 返到屋企既時間同以前差唔多, 仲要份工要用好多精力, 所以每晚都好攰! 而最近我又迷返打機, 攰上加攰, 哈哈!

老公生日飯, 上年阿女仲係肚裡面架

阿女而家好叻呀, 識行喇, 最初仲以為佢只行到幾步, 原來佢已經行得好好, 比同期小朋友快好多, 我媽媽都話我係一歲先識行! 而阿女都開始出梗第三四隻牙仔了, 佢好衰架, 成日想睇佢偏唔俾我地睇, 會專登合埋個口架!

好鍾意行路

另一轉變就請左工人姐姐喇, 頭幾日係激到我嘔血既, 而阿女亦對佢好抗拒, 係嚴重到見到佢就喊, 呢排仲晚晚喊醒, 好似真係受驚過度咁, 我同老公每人請左一日假俾阿女適應咋, 而家已經差唔多兩星期, 仲係好抗拒, 每朝我出門口佢都係喊到癲, 放工返到屋企又係喊梗, 真淒涼!

工人姐姐係度就成日喊喇, 陰公!

另一頭痛既事就係開始搵幼稚園N班, 其實我已經唔算怪獸, 好多媽媽都已經帶左小朋友返PG, 而我係堅持唔會返, 2歲返N已經好殘忍, 對家長黎講仲好吃力, 由於N班冇學卷, 間間都話要幾千蚊學費, 我地加埋工人, 真係每個月多一萬蚊洗費, 所以出年要非常慳喇!

暫時只係報左兩間學校, 一間JOYFUL, 因為地點近又收細B, 另一間係思博, 朋友話佢收細B叫我報定先, 其他既有D要夠一歲先報得, 有D就因為細B唔俾親身報, 只可以郵寄或者等通知, 真巴閉!

呢張好老積

而家阿女除左拍手, 仲識拜拜, 成日MAMAMAMA, 搞到老公呷晒醋, 放工返到黎會勁攬實我地, 做左樹熊, 雖然係好冧, 但佢真係太痴身, 痴身到我地有D應接不瑕, 連去個廁所都會大喊! 阿女真係戲子黎架, 次次喊到有眼淚, 但一抱起係即刻笑返晒, 奸計得逞咁既樣, 哈哈!

踏入一歲, 好多同期媽媽會搞生日會, 但我只JOIN了930既生日會, 而阿女生日個日都要去飲, 冇得搞生日, 不過我同老公會請假帶阿女一齊去影相, 係我大哥大嫂百日宴送既禮物, 一歲去影可以做個紀念呀!