因為夜晚機, 所以我加左錢延遲退房, 我地可以留到6點, 唔駛搵地方放行李, 下晝又可以係度餵奶換片先走!
朝早我地出去買手信, 例牌都係鳳梨酥, 其實香港都有啦, 不過循例都要買D俾同事既!
經過一間小店有涼麵食, 其實台灣涼麵真係好好食架, 我地次次都唔記得要食, 第一次係台灣食係上次影婚紗相, 個攝影師買俾我既, 真係好好味! 難得經過見到, 就入左去幫襯喇, 雖然唔稱得上好正, 不過真係夠地道呢!
唔知係咪我食完蟹, 阿女再飲我D人奶, 定天氣太熱, 今日阿女塊面紅晒, 好彩我都快掛泵, 如果唔係有排都唔食得蟹喇!
買完一堆野返去擺低, 休息一陣, 又再出發去台北車站! 聽聞良品牛肉麵好正, 咁又要去試下啦, 去到台北車站行大約10分鐘就到!
我地去到時冇乜人, 呢度有燒味食架, 不過我地冇理由叫燒味嘛, 所以叫返兩碗牛肉麵, 我覺得....不外如是呢! 另外, 有個女帶住口罩, 但就跌到落下巴, 咁同冇帶有咩分別呢? 佢仲係咁打乞痴, 又係度執筷子, 嘩, 嚇到我真係拿拿聲食完走, 費事佢傳染阿女!
食完後行返去西門町, 再係附近行下食下咁, 就等的士黎接我地了!
去到機場周圍逛下, 仲有用下育嬰室, 諗住換好晒片先上機, 點知......我地準備登機之際, 發現阿女又開大, 玩野咩, 呢頭換條乾淨片, 個頭就開大, 冇時間返去育嬰室, 唯有我自己去女廁搞掂, 真係好狼狽, D人上晒機喇, 老公忍唔住衝左入黎幫拖, 空姐仲入黎催我地上機添!
上到機, 原來係勁細既33機, 仲要係坐唔滿, 我諗全機得廿幾個人, 我地坐第一行, 阿女一上機就爆喊了, 好彩唔多人咋, 不過就嚇襯隔離個男人!
起飛冇耐阿女就瞓左了, 老公可以食野! 搭咁多次夜機, 都冇乜點見過夜景, 今次竟然會有夜景睇, 真係好靚呀!
No comments:
Post a Comment