佢地遲左出黎, 所以我地有時間去美麗華行一陣, 不過真係唔太o岩我地!
第一站係去食lunch, 呢間餐廳我十幾年前黎過, 因為好得意, 全部都係車黎, 所以好想帶個女同老公黎, 但佢唔近捷運站, 朋友有車就方便好多喇!
十幾年都冇變過, 裝修完全一樣, 係舊左少少, 不過都未去到殘既地步! 一早book左中間架pink mini, 呢架係唯一完整既車, 不過個位少少迫, 我地要抱住阿女食!
晏晝呢度冇乜人, 我地不停影相, 好興奮, 哈哈! 呢度除左裝修得意, 野食仲好得, d野全部都好好食, 連我台灣朋友都讚呢!
食飽後就去下一站-故宮博物院, 係老公話想黎, 由於又係捷運唔到, 所以我本來係話唔黎, 但都係個句.....朋友有車, 哈哈, 所以又要麻煩佢地喇!
其實我真係對歷史文物興趣不大, 生活用品都有少少, 但書呀, 個d奏摺呀, 真係冇咩興趣, 不過老公想黎就陪佢啦! 呢度都好大, 好多野睇, 仲有好多大陸人, 我地一見到係要避開, 因為太嘈!
周圍行下睇下, 原來以前d人手字真係好靚好整齊, 好似印出黎一樣, 哈哈! 行左個幾兩個鐘, 當然要去埋育嬰室, 呢度得一個育嬰室, 係會上鎖, 要用就要用對講機叫佢開門, 都好丫, 唔駛d無謂人濫用!
入到去設備都ok同乾淨, 拿拿聲換完片就走了, 下一站係要去買手信!
臨上機前幾日上網先睇到有人介紹"吳寶春", 話d人要排隊買麵包, 好誇張, 所以我地都去湊下熱鬧, 順便買埋鳳梨酥當手信!
得一間店, 真係好難唔多人, 裝修幾靚, 價錢唔算平, 我地買左兩個包, 仲有鳳梨酥就走了!!
再下一站係永康牛肉麵, 又係老公話想食, 佢最鍾意都係呢間! 係開車去既中途, 我女竟然大解.....成車都好臭, 但我地又搵唔到育嬰室, 最後好勁地.....係條街度換, 哈哈, 好彩冇咩途人見到!
到永康牛肉麵, 第一次夜晚黎, 都係咁多人, 價錢仲要唔平, 我唔食辣, 所以叫清湯, 其實真係一般, 但佢地食紅燒就話好好味喇!
食完後.....再去食, 哈哈, 又去一個未去過既夜市, 就係師大! 呢度唔似平時d夜市咁迫, 條街好闊好好行, 但野食當然少d, 仲有好多係賣衫既鋪!
朋友介紹左我地飲一隻橙汁, 可以試飲, 較好味道佢先整俾你, 好好飲, 下次要再黎飲過! 其實我地都唔係好餓, 夾硬食d野, 再行多陣就走了!
朋友車我地返酒店就走了, 佢地之後會搬高雄喇, 唔知幾時先會再見呢!
No comments:
Post a Comment