台北湊女之旅 Day 3 (30 Mar 2015)

今日係阿女半歲生日呀, 所以行程都好豐富!

因為12點要CHECK-OUT, 我地要執行李, 我又要泵奶, 所以老公去樓下買早餐上黎算了!

第一站係去汽車旅館放低行李先, 今次揀左薇閣, 地點比上次方便, 仲多D好評添! 雖然近捷運站, 但我地拎住行李, 所以都係選擇搭的士, 大約NT300!

一去到就覺得好靚喇, 係黑+紫紅, 好鍾意呢, 揀房時我俾左三個選擇佢, 佢安排左我首選既BOAT HOUSE呀, 真係好!

放低行李後我地就去上引水產, 上次係搭的士, 今次LOU話試下搭捷運再行去, 我睇過地圖其實都行好遠, 不過佢想行就行啦, 當俾阿女睇多D風景!

上次我地紙婚黎過, 其實都唔係話好吸引, 同埋諗諗下有乜理由去台灣係食日本野, 香港又唔係冇, 係都去日本食啦, 所以我地選擇左買外賣係出面食算了!

捷運去到中山國中站, 又開始用GOOGLE MAP帶路, 行大約20分鐘, 途經一個公園, 好大片草地呀, 仲見到唔知咩鼠, 好得意呀, 香港一定冇機會睇到, 有都俾人捉晒啦!

去到上引水產, 好多人呀, 一大半係香港人, 推住BB車好唔方便, 行個圈再買完野食就搵個位食了, 阿女又開始扭計, 可能有D焗同多人, 搞到我地又要輪班食野!

買左三樣野, 但都食到好飽呢!

食完行多陣就走了, 搭的士去101行街, 順便去育嬰室餵奶換片! 呢度個育嬰室好靚, 有2間餵奶房, 仲有冷熱水供應, 有好多員工走黎攞熱水用添! 搞掂晒又周圍行, 點知阿女又痾左屎, 搞到我地又要再去返育嬰室, D人黎攞熱水仲臭襯人, 哈哈!

行到攰坐低休息自拍!

阿女又開始扭計喇!

搞掂晒後我地搭捷運去晚餐了, 呢度行去市政府站都幾遠呢! 今晚又去食蟹喇, 次次黎襯都會黎呢間, 第一次係影完婚紗相, 第二次係紙婚, 今次就阿女半歲生日, 今次仲係第一次搭捷運再行黎添!

一到開餐時間, 阿女又開始扭計, 搞到我地又輪班, 好彩今晚唔多人, 呢度限時兩個鐘架, 但店員唔知係咪見我地冇時間食, 竟然三個都冇趕我地走, 最後係我地自己埋單!

今晚食左好多蟹呀, 真係食到飽, 下次又要再黎!

搭的士去美麗華, 摩天輪收11點, 10點半截人, 我地10點黎到, 仲要買飛, 其實都幾趕, 同埋唔想太夜返酒店, 話晒間酒店咁靚, 要留耐D嘛!

阿女鍾意玩摩天輪呀, 可能多野睇, 佢好開心不停望, 反而我呢個阿媽就畏高, 腳仔軟, 哈哈!

玩完後, 想買野飲返酒店, 但又見唔到7-11, 原來家樂福收11點, 所以我地可以夜遊家樂福, 勁少人呢!

搞掂晒就去攞房喇, 真係好興奮呢, 間房好大好靚呀, 真係成架船咁架, 張床又夠大, 放阿女落去佢好開心! 呢度都有BB床供應, 仲有BB浴盆, 不過咁大個浴缸, 我地當然用浴缸啦, 阿女又可以玩水喇!

間房可以揀電影睇, 仲有成人電影添, 哈哈, 不過電影唔吸引, 所以我地選擇聽歌, 佢中英文, 唔同類型既歌都有得揀, 好正! 仲有就係燈光效果, 總之間房真係VERY GOOD, 九百幾蚊其實係好抵呢!