起身刷牙洗面仲要係泵奶, 再餵奶換片幫個女換衫, 而我自從做阿媽後, 除左百日宴化過一次妝, 都冇化過了, 連MASK都冇時間敷, 好期待掛泵後多返幾粒鐘做自己野呢!
今日約左台北婚照既MUA小米食LUNCH, 本來想搵間CAFE, 但佢話星期日好多都FULL了, 之後搵左間偏遠少少但都唔錯既餐廳! 搭捷運去永寧站, 我去咁多次台灣都冇搭過黎呢個站, 原來都唔係好遠, 出站後小米就開車接我地去間餐廳!
呢度好靚, 好有童話感覺, 小米話呢度仲可以搞婚宴添架! 今次台北之旅, 可以順便去下台北唔同既育嬰室, 估唔到呢間餐廳係有育嬰室, 雖然係好簡陋, 不過餐廳有育嬰室真係好好架喇!
 |
| 阿女好鍾意小矮人呀, 望住佢會自己笑! |
食完LUNCH小米車返我地去捷運站, 今次係土城站, 哈, 我地大鄉里咁可以多一個捷運站到此一遊!
搭捷運去新北投, 當然係浸溫泉啦, 雖然我麻麻地鍾意北投既溫泉, 不過帶住個女, 只可以選擇交通方便既地方!
本來想係附近行下地熱谷, 但時間緊逼, 所以我地直接浸溫泉了! 仲諗住今次可以去亞太溫泉, 點知佢仲未裝修好, 真係呢.....到底佢裝D乜可以搞幾年?
再睇下有咩溫泉附合我要求, 最後揀左天玥, 好似都幾新, 價錢又唔貴, 仲要近捷運站呢!
帶埋BB浸溫泉, 當然要帶埋個水溫計, 量好水溫就放阿女落去了, 好難得阿女可以玩水呢, 佢真係好開心呀, 我諗呢個夏天會不停帶佢去游水!
好快就個半鐘了, 呢度送左個下午茶俾我地, 雖然只係一件蛋糕+一杯野飲, 不過可以抖下, 仲有風景睇, 真係幾爽!
 |
| 其實我地好耐冇試過兩個合照了! |
搭返捷運去西門町, 食左個鴨肉扁, 我十幾年前第一次黎食過, 其實唔覺有咩特別, 但老公話好好味, 我地兩條友佢俾左550台幣既鴨我地, 真係誇張!
之後返酒店小休, 主要係我要泵奶, 又要換下熱水咁! 下一個行程, 首先係要幫阿媽買八仙果, 今次佢要買10包添呀, 真係重到呢!
我地酒店行過去李錦利都唔算好遠, 所以選擇行過去, GOOGLE MAP真係好方便, 攞住黎行好快就搵到! 買完後就行去搭捷運, 最後行程係湳雅夜市!
因為唔想次次去同一個夜市, 所以今次揀左個未去過既, 搭捷運去府中站, 再行15分鐘左右就到! 小米住附近, 所以佢又出黎陪我地食, 仲帶埋兩個女添!
呢個夜市都幾大, 食左個蝦同花枝羮, 飲左個鮮奶珍珠奶茶, 小米帶左我地去一間專食蚵既地方, 仲叫左好多野食, 可惜我麻麻地, 其實我好鍾意食蚵, 但佢一係辣, 一係撈左肉我覺得麻麻地, 所以都少少失望!
食飽後就走了, 返西門町行多陣就返去休息了!
No comments:
Post a Comment