以前旅行我地都唔駛帶好多野, 今次真係好誇張, 一個24寸箱都係阿女既, 另外一個大背包先係我地, 另外兩個小背包都係阿女, 仲有BB車, 真係好堅!
由於特價機票, 所以係下晝機, CALL的士去機場, 去到CHECK-IN有少少風波, 話搵唔到BB機票號碼, 之後搞一輪, 先搵得返出黎, 嚇得我呢....
第一次帶BB旅行, 真係緊張又興奮, 不停同BB影相, 推住BB車, 原來都好多好處, 會有專門既櫃位, 排短D既隊!
上飛機後, 由於BB冇位, 所以爸爸負責抱住, 空姐教用BB安全帶, 另外攞左個BB籃黎, 阿女真係剛剛好咋, 再大D真係要全程手抱!
阿女好合作, 全程都冇乜點失禮人, 不過臨落機終於知點解, 就係爆屎, 爆到成件衫都係, 臨出門口明明已經痾左次, 真係呢.....
一落機第一時間係搵育嬰室, 台北機場育嬰室好好, 設備齊全, 換好片後就出去了, 入境條隊好多人, 排左一陣有一對夫婦提我地原來側邊有條隊俾BB車既人, 我地即刻衝過去, 唔駛排好爽!
搞好晒手續, 攞埋行李, 都搞左成粒鐘, 我一早CALL左台北既的士黎接機, 司機係上次我地黎既時候搵過, 架車好舒服, 所以今次搵返佢! 點知......我台灣朋友竟然突然出現接我地機, 真係嚇左一跳, 呢D我以為睇戲先有既場面, 出現係自己身上, 哈哈!
個一刻第一時間諗, 仆街了, 個的士司機點算, 我叫台灣朋友自己同司機解釋, 哈, 佢地自己人溝通方便D嘛, 而我就去買電話卡同提款!
經過一輪溝通, 最後我地俾返一半車錢司機, 其實當然可以走左去, 但唔想做到咁衰格, 話晒佢真係專登黎機場!
朋友車我地去酒店, 本來話一齊食飯, 但我一早BOOK左位食燒肉, 間野又貴, 真係唔好意思, 所以佢地送完我地去酒店, 再買埋野飲俾我地, 就走了, 過幾日再見!
呢間酒店, 係無牌的, 應該係類似民宿咁, 睇相係好靚, 又平, 不過.....都幾殘舊, 仲俾我地見到好多蟻, 真係除左地點方便, 價錢平同夠大, 都冇咩好處, 兩個人黎就冇所謂, 有BB係度, 清潔係好重要嘛, 下次都唔會揀呢間喇!
 |
| 仲有個優點係有BB床供應 |
放低行李就出發去食飯了, BOOK左大腕燒肉, 因為全部係高枱, 所以要特別要求佢俾張矮枱我方便放BB車!
搭捷運去忠孝敦化站再行5分鐘左右就到, 好近! 呢度矮枱原來係六人枱, 我地兩個大人霸左人地張六人枱, 有D尷尬!
因為唔知食乜, 所以叫侍應幫我地點菜, 個沙律好好味, 難得地我食咁多菜, 肉都好好味, 點知埋單.........勁貴, 兩條友成港紙$12XX, 仲要係唔飽個隻, 最貴既一餐呢!
好喇, 食完後又搭返捷運返去了, 要泵奶又要準備BB野, 所以會少左時間行街呢!
No comments:
Post a Comment