湊女生活 - 六個月

阿女過左半歲喇, 時間真係好快好快, 每個月都好似眨眼就過, 每日都好充實!

呢個月開始加固, 真係惡夢既開始, 因為我女唔鍾意食, 應該係話唔鍾意匙羮食, 一擺隻羮埋去就爆喊!

第一日, 我用奶開好稀好稀既米糊俾佢, 不停流返出黎, 唔知係佢唔識吞, 定覺得難食, 咁就倒落奶樽俾佢, 佢又食晒喎, 即係唔係難食啦! 咁要諗下方法!

個個都話慢慢黎啦, 要練架, OK, 咁我每日又練下, 試下開杰少少俾佢, 好似好少少, 起碼冇流返晒出黎, 但佢食左一兩啖, 就開始發癲, 好唔耐煩咁要逃走, 又大喊, 餵少少糊仔再補埋奶都用我成粒鐘, 清潔又麻煩左, 感覺好似返返去初生階段咁, 餵一餐要同佢搏鬥!

有媽媽話佢唔鍾意唔好迫佢, 好啦, 旅行個幾日我地就剩餵奶, 當俾佢抖下!

返到黎再試, 一樣, 不停大喊, 真係餐餐餵到我地兩個好攰, 唯有......每日只俾少少佢試!

小朋友真係越大越難湊, 除左識反身, 換片沖涼換衫等等不停要同佢搏鬥, 佢仲成日BU口水, 係專登BU出黎個隻, 人地話女仔斯文D, 我女真係成個男仔咁ACTIVE!

因為姐姐放大假, 所以我地呢排係對多左個女, 佢好開心, 不過都有認人, 又會扭抱, 佢演技好好架, 真係見到你就不停發脾氣大叫大喊, 仲要係有眼淚個隻, 直到你睬佢, 一抱佢係即刻笑, 笑中有淚個隻, 真係激死!

至於我既每日時間表都係一樣, 一日泵4次, 奶量依然少, 都預左旅行完會收奶, 所以泵埋下個月算了, 以我咁少奶黎講, 泵左七個月真係好難得架喇!

唔止性格, 連樣都成個男仔咁!

呢張相爸爸影既, 真係電暈爸爸了!

哈, 我成日都覺得個女係似足我!

第一年就逗左過百封利是喇!

朋友又整左復活節頭夾, 好靚靚!