湊女生活 - 三個月

BB三個月, 我都正式開始返工, 雖然呢個月都叫多假, 一來補返2日產假, 二來係聖誕節!

今個月出街次數多左, 可以扮靚靚出街, 平時屋企多數都係著和尚袍, 男仔衫等等, 以方便為主, 出街就著過頭笠既衫, 比較麻煩, 不過就好靚呢!

之前兩個月BB都係做廳長, 因為我地房係全地台, 張BB床冇得直接推黎推去, 要拆左先得, 呢成日有人黎探會唔方便, 所以我地直接放廳, 開房門瞓覺, 呢個月開始凍, 我地就正式搬返入房, 一齊開暖爐瞓覺!

呢個月依然多野講, 同埋學識抬起頭喇, 我D朋友話佢算快, 另外佢仲成日想反身添, 搞到我好鬼擔心!

返左工後時間更少, 每日時間如下:
6:45 起身梳洗泵奶
8:05出門口+湊女去阿哥度
19:15放工返到屋企泵奶
20:00 上阿哥度食飯+接女返家
21:30 返家做家務+沖涼+泵奶

另外再加D私人時間睇陣電視上網等, 每日都2-3點先瞓, 所以日日都係勁攰, 我老公情況好D, 佢唔駛泵奶, 亦唔駛太多私人時間, 所以佢多數十一二點就走去瞓, 朝早6:00起身餵早奶先再返工, 之前佢一星期都會踢一兩晚波, 自從我生左先後佢都有去過了, 不過我都成日叫佢踢返, 免得佢D波友以為係我唔俾, 事實只係佢成日想返黎睇女, 哈哈!

出左兩日街, 都係著裙仔, 好難得呢!

我地結婚兩周年, 一家三口出去食飯!

朋友家聖誕PARTY!

聖誕同屋企人食BUFFET!

湊女生活 - 兩個月

第二個月, 陪月走左後, 要自己搞掂晒, 回想返覺得自己真係好強, 餵奶換片, 幫BB沖涼, 煮飯洗衫, 做家務, 泵奶, 竟然自己一個搞得掂, 而老公每日放工都會買埋餸返黎, 所以第二個月我地依然有住家飯食, 不過就真係瞓少好多!

BB真係大得好快, 竟然開始有衫唔O岩著, 仲會開始講野, 想人陪佢玩, 仲會開心到卡卡聲!

生女真係好開心, 可以當佢BARBIE, 我真係試過當佢BARBIE係咁換衫影相, 換到我都攰, 而佢都瞓著左, 哈哈!

我地又開始帶BB出街, 雖然每次都好辛苦, BB車又重, 上車落車都比較麻煩, 仲要帶一堆佢既用品出街, 不過我地又好ENJOY一家三口出街, 遲D可以用孭帶應該舒服D!

呢個月其實我都返左兩日工, 當然公司遲D會補返假俾我, 返呢兩日工好似出左去抖氣咁, 原來我都唔算係一個緊張既媽媽, 起碼我都冇話放工要即刻趕返去睇女, 反而約朋友吹陣水, 再等埋老公先一齊搭車返去!

生完之後腰骨長期痛, 反而一返工就冇事, 我完全唔明有D媽媽全職湊仲可以買餸煮飯係點搞得掂, 我諗我條腰真係會斷都似!

就快放完產假, 真係好唔捨得, 成世人冇乜幾何嘛, 而我同老公都諗住會生多個陪BB, 我地兩個都係有兄弟姊妹, 所以都想BB有, 不過開完刀要起碼抖一年先了!

BB兩個月大, 我地又帶左佢出街喇!

湊女生活 - 一個月

阿女滿月, 代表陪月都完工了, 對左成個月, 真係好唔捨得, 直頭有想喊既感覺!

好開心搵到個好陪月, 佢教識左我好多野, 仲有煮野好好食, 最好既係佢好慳, 呢個月既買餸錢, 計埋薑醋既豬手, 蛋, 醋等等, 都係三千零蚊, 佢好到係知我地兩個忙, 星期六會煮定星期日既餸俾我地! 我老公直頭日日帶飯, 呢三千零蚊係我地兩公婆既每日兩餐, 真係好抵食呢!

陪月臨走前, 我都學識左幫阿女沖涼, 仲有問定晒陪月所有野, 我連d餸點煮都有問佢, 哈哈!

一個月要去健康院打針, 陪月有同我去, 今次唔好彩, 遇到個唔好既姑娘, 睇住支針係我女抽出黎個下, 好似連肉都扯埋出黎咁, 蚊支針出黎時仲有一大滴血標出黎, 我女即時喊到拆天, 陪月都話未見過咁, 真係陰公!

阿女生長線係50, 好適中, 所有野都唔錯, 除左開始有少少小兒濕疹, 姑娘話勤力D保濕就得!

另外阿女一出世時, 我覺得個女唔似我, 唔開心, 同埋我地兩公婆皮膚白, 點解個女咁黑既? 仲有點解阿女唔係雙眼皮既? 係內雙既? 當然個個都話佢地會收水, 會白返, 只係我自己一直擔心, 到左十幾日, 阿女對眼開始變大, 同埋雙眼皮好深喇, 去到滿月皮膚都白左, 越黎越似我喇, 嘻嘻!

而我地都開始幫阿女戒夜奶, 即是唔會再叫醒佢食奶, 等佢喊先餵!

黎梗既一個月我就做全職媽媽, 一方面好期待試下FTM既滋味, 另一方面又好驚自己應付唔黎, 不過我對自己都好有信心, 唔會做唔到, 只有辛苦D!

呢一個月我地真係瞓少左好多好多, 已經冇試過一覺瞓到多過3個鐘, 全部要拆開黎睇, 希望之後真係會好D啦!

阿女滿月相, 唔同左樣喇!

湊女生活 - 半個月

出院個晚, BB仲係每3個鐘就要食奶, 其實BB冇喊, 主要都係要拍醒佢食奶, 我地呢D新手父母成日會驚佢地食唔飽, 長唔大, 所以殘忍D都要叫醒佢地架喇!

由於阿女比較多風, 係醫院時已經俾姑娘話佢好多風, 所以要掃密D, 掃耐D, 就係咁, 餵一安半奶要掃好多次, 因為太多嘔奶後窒息既新聞, 搞到餵完後又唔敢即刻瞓覺, 攤佢係度成個鐘我先敢去瞓, 但隔一陣間又夠鐘食奶, 如是者......根本就冇得點瞓!

老公三日侍產假, 所以呢幾日都會幫手, 不嬲都係夜鬼既我當然係做夜更, 差唔多到天光我就走去瞓了, 到第二朝十點幾醒左, 老公已經起左身, 陪月亦都到左, 我真係瞓到乜都唔知!

其實我都唔算係好緊張既父母, 起碼我地夠薑俾BB做廳長, 哈哈, 呢樣真係俾好多人話, 點解會放心俾BB瞓廳, 因為我地係地台, 架BB係好難推上推落, 所以索性俾BB瞓廳, 最多我地開門瞓, 應該都問題不大丫!

老公返工後, 我就每日都係同陪月作伴, 陪月係度既日子, 我既時間表大致如下:
9:30-10:00 - 陪月黎到, 我去瞓覺
12:30-13:00 - 起身食午餐, 泵奶
15:30-16:00 - 瞓覺
17:30-18:00 - 起身食燉品, 泵奶, 陪月走, 自己湊返BB
19:30 - 翻熱飯餸
20:00 - 老公返到家食飯洗碗, 幫手湊BB, 我泵奶
23:30-0:00 - 老公瞓覺, 到我接更
之後一整晚都係餵奶換片掃風泵奶, 恰一陣, 直到陪月黎到

我好慶幸請左個好陪月, 亦都好放心交俾佢, 因為聽太多俾媽媽或奶奶幫坐月既不愉快case, 一來會有好多爭執, 二來又唔放心, 三來真係會好辛苦佢地, 免有閒話講, 所以我一早都決定請陪月!

頭半個月, BB都有嘔幾次奶, 一嘔就成身係, 要換過晒衫, 對新手父母黎講, 換衫都有難度, 成日驚拗斷佢地對手, 仲有清理現場, 所以一搞又半個鐘, 好彩D野會留俾陪月洗!

第一次出街係去健康院, 呢個係出街樣, 好精靈!

BB不外乎食瞓痾喊, 黎個喊樣先!

難得用手機捕捉到佢打呵欠既樣, 好鍾意!

產後心情

未生前, 都有好多朋友話生完會成日喊, 脾氣又會好差, 其實我都有晒心理準備!

本來既我好少喊, 應該係話近幾年我都好少喊, 以前失戀就會勁喊, 但開始大左, 喊既次數真係好少, 同老公一齊之後, 除左養既倉鼠去彩虹橋時勁喊外, 好似都冇乜喊過!

生完頭幾日, 心情仲係好好, 到係醫院最後一晚, 原來我係可以一撻即著, 突然會大器, 原因唔多講了, 主要都係本來好獨立既我, 因為生完女而不停被人煩, 感覺好辛苦!

BB快100日了, 呢三個幾月我都喊左好多次, 頭一個月直頭喊到癲左, 眼淚係控制唔到咁流出黎, 真係喊晒我幾年既眼淚!

個個同我講, 坐月唔好喊呀, 好傷眼架, 會入風架, 但係......我都控制唔到呢!

第二三個月, 喊既次數少左, 但同一問題依然存在, 點解生完女後成個世界好似唔同左咁? 我比較習慣寧靜生活, 而家真係好唔慣, 不過每次望到個女, 又會有一種難以形容既滿足感!

我都唔知呢D算唔算產後抑鬱, 因為我唔開心都只係一個原因, 其他媽媽會因為湊唔掂BB, 壓力好大, 唔夠奶等等原因唔開心, 我又冇喎!

當然....生完後都有開心既時候, 我到最近先開始慢慢接受到自己做左阿媽了, 望住個女真係會好想錫佢, 保護佢, 呢D就係母愛喇, 原來我都有母愛架, 哈哈!

而老公更加唔駛講, 佢當個女直頭如珠如寶, 性格都唔同晒, 以前既佢都幾懶, 又唔太乾淨, 有左個女後, 成日洗手, 乾淨左好多, 尤其係個女既物品附近, 佢都唔會再冇手尾留低垃圾, 所以話呢, 女兒真係爸爸既前世情人, 好期待第時個女拍拖結婚, 老公個呷醋樣, 哈哈!

出院了!

2014年10月4日

一直好緊張BB今日出唔出到院, 一來當然擔心BB有問題, 二來係出唔到埋單會好金, 好期待胡醫生上晝既巡房, 好彩地佢黎到話BB退左黃, 今日可以同我一齊出院了!

胡醫生幫我換膠布後, 叫我一星期返診所再換, 之後搞掂了, 佢仲話我傷口埋得好靚, 不過我自己瞓左係度就睇唔到, 而老公都話傷口冇乜野, 唔知係咪氹我啦!

老公都一早黎到, 我帶左套出院衫俾姑娘, 佢幫BB沖完涼後就會換上, 真係好期待呢!

換完衫......先發現原來我生完仲腫, 竟然腫到連對鞋都著唔到, 其實我陀時已經腫, 估唔到而家仲腫, 真係好驚, 聽聞開刀生既人係會腫D, 希望快D消腫啦!

餵埋今朝轉奶, 等醫院送單黎, 再去樓下俾錢就走得, 不過都等左好耐, 可能真係太多人生了!

阿哥會黎車我出院, 困左係度幾日, 都好期待出院, 雖然返到屋企都係唔出得街, 不過都會好期待我地一家三口既新生活!

離開醫院時, 我好唔捨得, 話晒係度對左D姑娘幾日, 又有人服侍, 佢地走時仲叫我地得閒可以返黎探佢地, 或者生下胎時再見, 佢地真係幾好, 仲成日讚我BB好靚女, 不過我自己就唔多識睇!

返到屋企樓下落車, 本來係老公抱住BB, 但佢要搬野, 不過我地太生手, 佢又唔識係條街度交BB俾我, 我又唔識接, 最後係阿嫂幫我抱返屋企, 哈哈!

之後姪女同工人都黎左睇BB, 我地準備好晒物品, 點知到BB食奶要開奶時, 原來都係會好論盡, 好彩有阿嫂係側邊指點我地咋!

本來叫陪月今日開工, 但唔知BB出唔出到院, 所以改左聽日, 阿哥佢地走左後, 我同老公今日要獨自湊女, 真係好大挑戰!

返到屋企, 我最想做既事就係沖涼洗頭, 生完之後都冇沖涼洗頭, 仲要出左好多汗, 真係覺得自己好臭, 沖完之後真係好爽, 我都係一個唔聽話既媽媽, 陀B又唔戒口, 生完又唔聽話!

第一日都算平安渡過, 我地都只係餵奶換片, 唔駛幫BB沖涼, 聽日就會有陪月黎喇!!

同其他新手父母一樣, BB每個動作同睡姿都會覺得好得意! ^^