第六次政府產檢 - QE

2014年8月26日  33W1D

又到兩星期一次既政府產檢, 上兩次一黎到就話我有蛋白尿, 今次我仲諗住都衰梗, 點知冇事!

體重方面, 比兩星期前重左0.5KG, 應該都算OK, 不過要下星期私家產檢先知BB重左幾多!

之後又係等等等, 大約一個鐘先到我, 期間我突然有D肚痛, 係側邊位扯住痛, 扯左陣又冇野, 隔一陣又黎, 入到醫生房仲有D痛, 就同佢講, 佢話我係宮縮, 咁佢按D位, 仲痛梗, 搞到佢都有D擔心!

佢問我有冇人陪我黎, 我話冇呀, 佢話我作早產, 不如留院一晚觀察下, 我即刻呆左, 當然唔想留院啦, 佢話驚我一個人返去途中生得, 我話唔會卦......諗左陣, 就話我返到去架, 有咩事我先再返黎啦, 於是醫生就開左兩日假俾我休息, 叫我唔好再周圍走!

一出醫生房打俾老公, 越講越驚, 不過我諗醫生都係擔心早產, 既然佢俾得我走, 應該冇事卦!!

今次唔知點解要抽血, 抽埋先走得, 兩星期後又返黎喇!