Nutricia MBA雙職媽媽課程

連續兩日既講座, 其實今日唔算講座, 係叫課程, 好耐之前報了!

有幾個日期地點揀, 分別係鰂魚涌同銅鑼灣, 而我就揀左近少少既銅鑼灣, 日期係8月23日星期六, 個陣未知老公駛唔駛返工, 而且佢好似唔俾老公去, 所以我報左自己一個參加!

飲食營養 ﹣ 烹調適合孕婦的營養美食      教授簡單而富營養的美食，並講解營養飲食的重要知識和概念   情緒管理 ﹣ 九型媽媽壓力管理      了解九型人格與媽媽壓力來源的關係，協助媽媽管理情緒， 並有免費專業九型人格分析測驗   體能運動 ﹣ 適合孕婦的伸展運動

佢地都幾認真, 2日前打黎confirm, 幾好禮貌, 仲會問老公會唔會黎等等!

等車等耐左, 搞到遲到, 佢地又會打黎問我係咪黎梗, 真係算幾有心, 哈哈!

一去到第一part係整野食, 最初仲驚會唔啱我口味, 因為我太多野唔食了, 估唔到又ok喎, 整酥皮野莓芝麻乳酪撻, 健康又好味!!

第二part係九型人格, 早個幾星期佢有email黎要我地做一份九型人格既問卷, 成百幾題, 我本來想放棄, 最後都係完成左, 但係答得好求其, 哈哈, 去到呢個講座先知原來出面要成千蚊做一份咁既野再同你分析埋!

佢講左幾類媽媽出黎, 其實對我黎講又唔算好準, 可能係我答得求其啦, 不過呢part比我想像中冇咁悶既!

第三part係運動, 都係教d簡單伸展, 又話會冇咁易抽筋, 我當晚已經又再抽筋了!

完成晒課程, 其實都唔錯, 唔悶, 仲有野食, 我留左俾老公一齊食!

當日課程我仲撞到個中學同學, 原來係可以帶老公黎架, 佢話有朋友報過話佢知可以帶, 可以同老公一齊整餅, 一齊上堂, 一齊學做運動, 佢學識仲可以幫你, 真係唔錯呢!

禮品方面就冇乜喇, 除左個幾件撻, 仲有一份九型人格分析報告, 同埋DHA魚油丸30粒裝, 佢話生完餵人奶都可以繼續食, 我諗我都會生完先食了, 生前都係繼續食藻油DHA!