QE全日血糖測試

2014年7月24日  28W3D

由於飲糖水唔合格, 所以今日要返黎QE做全日測試, 同埋QE會跟返我, 唔駛再返健康院了, 都唔知係好事定壞事!

今日仲早, 8:30要去到QE, 又係要空肚8小時, 其實我都好肚餓!

一去到係有間房, 大約10個都係唔合格既媽媽一齊, 首先係篤手指驗一次血糖, 之後就食早餐了!

早餐係肉碎粥, 當然係勁少肉碎又冇乜味, 食完成碗我都唔飽, 真陰公!

早餐後就係講座, 大約講下點解我地會坐係度, 因為有妊娠糖尿, 咁再講下成因, 影響等等, 聽到我好眼訓!

我地要買一部血糖機, 一星期抽一兩日篤手指, 每日篤四次, 慘了, 有兩款機揀, 我揀左平既$300, 有50張試紙, 另一款$600既有100張!

早餐後兩個鐘, 又夠鐘篤手指, 好彩數字靚仔, 除左篤手指, 仲要抽血添! 其實姑娘話最好唔好食粥架, 因為血糖會升得快, 不過今朝醫院只有粥食, 冇計!

篤完手指, 又會派包餅同脫脂奶, 我真係好肚餓, 所以即刻食左, 之後其實大家都冇野做, 可以出去行下, 可以係度睇電視, 訓下覺等等, 總之就悶!

我帶左IPAD黎, 叫做可以消磨下時間, 因為呢度係生完BB既病房, 所以都幾嘈, 好多BB喊聲, 不過見到佢地又覺得幾得意, 又會想像下好快就到自己個BB出世, 哈哈!!

12:30午餐, 有湯有飯有橙, 湯....當然係冇乜味, 唔講我都唔知呢個係咩湯, 飯.....如圖, 佢裡面有個豆腐, 辣既, 我見好多人都冇食!

午飯後我就忍唔住訓左了, 到2個鐘又篤手指, 依然冇超標, 之後茶點又係餅+奶, 食左後就出左去行下, 去左樓下買血糖機!

5:15又要篤多次手指, 之後5:30就晚餐了, 真係早!!

晚餐有菜有飯有肉, 都算唔錯, 其實我真係幾大食, 全部食晒, 見好多媽媽都食剩好多, 哈哈!

8:15篤埋最後一次手指就走得了, 老公放工過左黎接我, 悶左一日, 真係有如坐監咁, 仲要全日都唔覺飽, 所以我地去左食拉麵, 哈哈!

產前講座 - 雀巢

今次雀巢講座, 好似冇公開過, 剩係sms黎, 叫人打去報名, 再sms confirm!

日期係7月22日, 地點科學館, 因為呢排真係參加太多講座, 老公今晚要踢波, 所以我叫佢唔駛陪我了, 第一次自己參加呢!

夜晚7:45先開始, 好夜呀, 內容係嬰幼兒常見問題, 兒童健康及嬰幼兒營養, 同埋育嬰示範!

頭part係兒科醫生講, 由於個場好好坐, 好似戲院咁, 聽到我恰眼瞓, 哈哈, 不過內容係有用既, 講bb發燒, 常見既皮膚病呀等等, 呢個topic我冇聽過呢!

呢part完左都差唔多8:35, 好多人已經走了, 第二part講營養, 其實都悶悶地, 都係主要介紹人奶好處, 仲有講飲益力多係好既, 因為益生菌對身體好好!

去到呢度, 已經走左1/4人, 最後育嬰示範, 老豆話踢完波黎搵我了, 所以......我都早走埋一份, 哈, 反正呢d示範我都睇過無數次!

禮品方面呢, 就非常豐富, 有尿片8片x2, 仲有包細既濕紙巾, 沖涼試用, 同埋幼兒食品, 個袋仲幾得意!!

口服葡萄糖測試

2014年7月21日  28W

今日去QE口服葡萄糖測試, 即係俗稱飲糖水, 因為已經調左去健康院, 今次應該係生之前最後一次黎QE!

飲糖水要之前一晚12點後開始戒飲食, 最多只可以飲清水, 但亦有醫院寫住連水都唔俾飲, 好奇怪!

8:45要到達QE, 真係早過返工, 今日老公陪我黎, 點知上到去原來係病房裡面飲, 所以老公係唔入得!

入到去見到有幾排櫈, 好多媽媽坐左係度了, 先填問卷, 再等叫名抽第一次血, 手勢好好, 完全唔痛!

抽完血再坐一陣, 當你覺得ready飲糖水, 就可以出去攞了!

之前聽聞係一杯杯, 點知呢度係一碗碗, 仲要係大湯碗, 見到都有d嚇襯, 等我仲專登帶飲管黎, 人地話易入口d!

糖水入口比我想像中好, 真係似茶餐廳沖凍檸茶個d糖水, 不過係暖既, 飲左幾啖, 開始覺得乸喉, 人地話唔好飲咁急, 好易反胃, 所以我都選擇慢慢飲, 一嘔又要再飲過架喇!

飲完姑娘係要你再坐多起碼10分鐘, 冇唔舒服先可以出去, 其實坐坐下, 我都開始唔舒服, 個胃晾下晾下咁, 仲要肚痛添, 唯有坐耐d, 大約20分鐘左右就出返去搵老公!

2個鐘後要返黎再抽多次血, 我地有行左陣, 希望d糖份散得快d, 哈哈!

返去抽第二次血, 原來係頭先個位抽, 今次好痛呀! >.<

搞掂晒就走得了!

諗住最後一次QE, 原來係妄想, 第二朝一早...................就收到電話話我唔合格, 成個人down晒, 星期四我要返QE留一日院食全日餐喇, 嗚嗚!

產前講座 - mybb

今次講座唔係奶粉商搞, 係mybb, 主要係講母乳, 地點荔枝角, 都幾方便!

上到去都幾多人, 先派禮品, 但都幾廢, 有七星茶, 乳墊, 紙相架同埋一包唔知乜, 好似除左乳墊我會用, 其他都未必用到!

講座大約兩個鐘, 都幾實用, 一開始係講生完bb既處理, 佢有講順便同剖腹, 所以對我都有用!

第二part係講母乳, 好多片睇, 仲要係露晒點既媽媽教餵母乳, 好偉大! 除左餵姿勢, 仲有教人手擠奶, 同埋用奶泵, 希望到時我唔會有困難啦!

第七次產檢 - 胡醫生

2014年7月17日  27W3D

又到每月一次見胡醫生, 其實都已經變得唔緊張, 又冇期待, 係咪我唔夠母愛呢?

約左16:15, 所以同老公放工後就去左牛涮鍋打邊爐, 再行陣一田, 慢慢先行過去!

今次等大約半個鐘就入得, 見到胡醫生循例講下近況, 因為我腳痛, 腳腫, 仲有格肋底下腫左一舊野, 其實我都問過孫醫生, 佢話係乳腺, 胡醫生同佢講既一樣, 我話好肉酸呀, 咁樣點影大肚相? 佢仲安慰我話我乳腺發達, 仲好啦, 第時多奶水俾BB, 都唔知真定假!

之後就去睇BB了, 大約1.1kg, 算係標準, 佢話下次就會寫封信俾我帶埋入院, 另外提我入院要帶返QE既卡, 上面有我既血液報告, 終於講到入院, 心情開始緊張喇!!

產前講座 - 惠氏

今次講座係惠氏, 期待已久既, 因為一人一B湊B實習!

講座地點係尖東, 同一日仲有美素佳兒講座, 可惜我抽唔到, 見到好多人拎住個三角枕走, 好吸引!

由於我地遲到, 所以第一PART都唔係聽到D咩, 仲要個醫生係上次美贊臣悶到暈個位, 更加冇興趣聽!

第二PART先係戲肉, 其實又好簡單, 都係教沖涼換片, 今次多左D用具俾我地, 係SOFTTOUCH既乾棉, 棉花球同棉花棒, 我之前已經訂左成箱SOFTTOUCH乾棉返黎喇, 唔知可以用幾耐呢!

實習完畢, 其實都係我老公霸晒黎玩, 希望BB出左世佢都霸晒黎做, 哈哈!!

禮品方面, 都幾豐富, 有惠氏DHA試食裝, 片片 (0, NB, S), 濕巾同埋沖涼+LOTION試用!

產前講座 - World Family

又黎產前講座, 一星期內第4個喇, 不過今晚呢個要俾$30, 所以唔同老公去了, 約左個好姊妹一齊去, 佢遲我個半月預產!

俾錢去主要因為個迪士尼禮品好吸引, 地點係旺角又方便, 講座內容我只係對第二part陪月分享有興趣!

準時上到去, 果然俾錢唔同d, 有飲品同食物供應, 不過個講師竟然遲到!

第一part講嬰兒腦部發展, 悶到七彩, 完全唔知佢想講咩, 仲要把聲好響亮!  = =

第二part陪月分享, 如果未聽過既都會覺得有用, 主要講下生完食乜, 同埋示範bb換片同沖涼, 同我之前聽既大同小異, 希望到我都做到!

禮品方便, 迪士尼既原來係換片墊, 都幾大張, 唔知攞出街方唔方便, 另外有goon尿片(得一片咋, 勁孤寒), 思詩樂乾濕棉, 手巾仔同埋美語系列既甜睡CD!

產前講座 - 雅培

連續兩日都有講座, 真係好忙, 今日出席係雅培, 朋友話禮品都好豐富架!

地點係佐敦逸東酒店, 同上次安滿一樣, 不過今次係二樓, 又係分兩part, 講初生嬰生護理同教湊b!

初生嬰兒護理係由一位醫生講, 佢講得好好呀, 好識帶動氣氛, 內容都好有用, 係由頭講到落腳, 在場個個都聽得好開心!

之後介紹下奶粉, 就出去睇湊b示範了!

主要係示範換衫同換片, 仲會有假bb公仔, 其實係QE都聽過, 不過今次我地玩埋假公仔, 幾得意, 搞掂晒就攞禮品走了!

入場時有一個膠folder同雅培熊仔筆派, 幾好呀, 個folder可以用黎裝bb既文件!

講座禮品主要係走佬袋既野: 床墊, m巾, 網褲, 另外仲有包換片墊, 媽媽奶粉試飲, 同冇影到既口水肩!

產前講座 - 美贊臣

早兩日先去完QE講, 今日就去美贊臣, 今次美贊臣有幾個講座揀, 我就揀左7月5日既呢個, 係講孕期+哺乳期, 而揀呢個既主要原因係星期六, 咁橋老公又放假!

講座地點係灣仔, 對我地黎講其實唔算就腳, 仲要大熱天時, 出地鐵都仲要行5-10分鐘!

頭一PART都幾悶, 主要係個講師好悶, 把聲好似氹人瞓覺咁, 第二PART就好好多了, 係講哺乳期既飲食, 聽完真係覺得有用!

聽完晒後, 係要填問卷, 交完先有禮品俾你, 今次禮品好豐富呀, 有個波點袋, 我真係見過有人當佢去街袋咁用, 但唔係帶住小朋友架喎 = =, 另外有片片試用, 濕紙巾, 和尚袍+手套仔, 被仔, 紗巾同一大樽既aqueous cream!

總括黎講, 呢個講座係唔錯既, 值得一去!!

產前講座 - QE產後護理

上次聽既講座係5月, 之後都有報過其他, 但都抽唔到, 七月就好多抽到喇, 首先係QE既講座!

QE講座都係要同人搶的, 尤其個D按摩同分娩球, 一定係最先爆, 我想報按摩都報唔到!

七月份第一個講座係7月3日既產後護理齊分享, 內容如下:
講座內容主要分為兩分面：
一) 產婦護理
二) 嬰兒護理
產婦護理講解包括：產後盡早恢復日常活
動、生理及心理的轉變、傷口護理、家庭
計劃及出院跟進等。而嬰兒護理內容則包
括：保暖及餵哺方法、洗澡及更換尿片技
巧，初生嬰兒常見情況及家居安全等

其實都好猶疑黎唔黎, 一來冇禮品, 二來時間太趕, 平日要六點半黎到, 老公要提早一個鐘放工黎聽, 星期六又唔想晨咁早走出黎聽, 老公又唔係個個星期六都放假, 不過朋友話QE講座幾好, 就即管去下!

一去到都幾多人, 自行點名同放低封信就得, 所以應該外來人士都可以聽!

開始係講QE病房設施, 生完會點, 仲有教餵人奶, 都幾有用!

下半部份就好有用, 教照顧BB, 佢會播片教幫BB沖涼, 換片, 仲有D用品俾我地睇, 又會教我地睇下BB既便便!

成個講座個半鐘就完了, 都幾實用, 值得一去!

產前講座 - 安滿

自從有左之後, 都一心諗住照埋結構先買野, 入媽媽會, 去bb展等等, 但又覺得遲d大住個肚做咁多野, 好似好辛苦, 所以過左四個月就開始報下講座先!

第一個報既講座就係安滿, 見佢時間地點都ok, 就報左先算, 原來d講座係好快滿, 要抽簽, 打後我報既幾個都抽唔到, 激氣!

其實報講座為既除左學野, 仲有係禮品, 話明係第一個報既, 梗係乜都唔識, 冇做research就報了!

今次個topic係"全方位認識胎兒成長及孕媽媽分娩過程", 日期係5月17日, 地點係eaton hotel, 去到原來個場好大, 唔怪得咁易抽到我!

成個講座其實一般啦, 胎兒成長係由係肚裡面開始每個月講下, 幾得意既!

分娩過程佢好認真, 有晒假bb, 假媽媽咁做示範, 真係好似去左產房咁, 不過我一心諗住開刀, 所以聽完就算, 雖然有d人覺得順產過程好恐怖, 但我想講其實開刀過程更恐怖, 哈哈, 因為我睇過片, 睇完我都有一刻猶疑順產, 不過算啦, 唔諗咁多喇, 決定左開刀就開刀!

聽完講座, 填完問卷就可以攞禮品, 估唔到得罐媽媽奶, 另外口水堅你要like & share佢安滿先有, 我就冇理佢了!

本身我已經有一罐惠氏媽媽奶, 而家又多罐安滿, 我又真係冇諗住會飲, 唯有睇下有冇人要, 或者生完如果餵人奶.......可能都會飲下既!