由於飲糖水唔合格, 所以今日要返黎QE做全日測試, 同埋QE會跟返我, 唔駛再返健康院了, 都唔知係好事定壞事!
今日仲早, 8:30要去到QE, 又係要空肚8小時, 其實我都好肚餓!
一去到係有間房, 大約10個都係唔合格既媽媽一齊, 首先係篤手指驗一次血糖, 之後就食早餐了!
早餐係肉碎粥, 當然係勁少肉碎又冇乜味, 食完成碗我都唔飽, 真陰公!
我地要買一部血糖機, 一星期抽一兩日篤手指, 每日篤四次, 慘了, 有兩款機揀, 我揀左平既$300, 有50張試紙, 另一款$600既有100張!
早餐後兩個鐘, 又夠鐘篤手指, 好彩數字靚仔, 除左篤手指, 仲要抽血添! 其實姑娘話最好唔好食粥架, 因為血糖會升得快, 不過今朝醫院只有粥食, 冇計!
篤完手指, 又會派包餅同脫脂奶, 我真係好肚餓, 所以即刻食左, 之後其實大家都冇野做, 可以出去行下, 可以係度睇電視, 訓下覺等等, 總之就悶!
12:30午餐, 有湯有飯有橙, 湯....當然係冇乜味, 唔講我都唔知呢個係咩湯, 飯.....如圖, 佢裡面有個豆腐, 辣既, 我見好多人都冇食!
午飯後我就忍唔住訓左了, 到2個鐘又篤手指, 依然冇超標, 之後茶點又係餅+奶, 食左後就出左去行下, 去左樓下買血糖機!
5:15又要篤多次手指, 之後5:30就晚餐了, 真係早!!
晚餐有菜有飯有肉, 都算唔錯, 其實我真係幾大食, 全部食晒, 見好多媽媽都食剩好多, 哈哈!
No comments:
Post a Comment