第三次政府產檢 - 西九健康院

2014年6月26日  24W3D

第一次既健康院產檢, 地點係西九龍, 叫做近左, 老公請左假陪我去!

約左9:15, 我地遲左15鐘, 一去到覺得好多人, 咩人都有, 比我想像中算唔多大陸人!

首先係登記, 交低QE俾既文件, 之後會俾張籌你, 等叫號碼就入房磅重同驗小便!

之後.......又繼續等........等左好耐, 又叫名了, 今次係入左間房, 聽bb心跳, 度肚, 佢仲教我老公度, 話摸到一個位硬, 就係子宮頂, 之後度到去恥骨位, 睇下幾多cm, 幾多cm=幾多w, 我係24w, 咁橋又係24cm, 姑娘話好標準, 聽完放心晒!

搞掂晒又再等......叫名後, 同另一位準媽媽入左間房見姑娘, 老公冇得入, 係個姑娘同我地講健康院既流程, 介紹下d講座等等, 又派左本書仔俾我地返去睇, 有教餵人奶等等既知識, 好似唔錯!

之後.....又繼續等, 再叫名就係見護士長, 都係問下你有冇唔舒服等等, 睇下駛唔駛見醫生, 由於我同老公買左飛睇戲, 趕時間, 當然話唔見, 希望拿拿聲走人!

護士長叫我出去等叫名拎返d文件就走得, 結果又等, 諗住好快啦, 但等左幾個字仲未有, 我地又遲到, 忍唔住就催下佢地, 原來要等d姐姐copy文件, 我同姑娘講, 冇諗過黎健康院要等咁耐, 前後真係3粒鐘了, 佢話平時唔駛架, 不過因為我要返QE飲糖水, 所以要俾返疊文件我拎返去, 咁就要等咁耐!

姑娘都好好, 知我趕時間即刻搞我個份, 終於走得了, 健康院真係好耐呀, 不過唯一好處就係佢開左一日既病假紙俾我, 哈哈!

第六次產檢 - 胡醫生

2014年6月19日  23W3D

話咁快又產檢, 自從開始胎動, 都冇咁心急想快D見醫生探BB了!

今日冇乜特別, 都係照下size, 一切正常, 係中碼bb, 醫生話頭仔係我既左下邊!

暫時係一個月返黎見一次醫生, 所以下次黎會係7月17日!

結構性超聲波檢查 - QE

2014年6月13日  22W4D

雖然已經係私家照左結構, 但都會黎QE照多次, 一來要享有下納稅人福利, 二來多個機會探BB!

不過就係前兩日, 10月媽媽組有媽媽話私家照左結構冇問題, 但QE照到有問題, 後尾私家醫生認自己失誤, 嘩, 嚇到我呢! 當然我都好信得過孫醫生, 不過都會驚驚!

約左3:30, 我同老公又遲到喇, 係去返上次照唐氏既地方, 上次係坐滿人, 今次竟然係冇乜人, 仲唔駛點等, 好快就到我地!

今次好彩, 唔係上次個衰姑娘, 係一個後生好多既姑娘, 不過間房就多左一男一女類似實習生既人, 搞到我有D緊張!

成個過程照左好耐呀, 仲耐過私家, 應該有起碼20分鐘, 姑娘話BB好百厭, 成日扭黎扭去, 好難照, 係咁捽我個肚, 捽到有D痛!

已經唔止一個話佢百厭喇, 上次就係咁飛腳, 今次仲衰, 照佢眼鼻口就即刻擰歪面, 照手指佢就隻手互握, 照身呢, 本身佢瞓係度, 無端端又趴左係度, 激死左個姑娘!

好彩最後姑娘話佢睇到既都冇問題, 即係合格, 放心晒喇, 一行出醫院, 老公就話BB遺傳左我D衰野, 包拗頸, 哼!!

總括黎講, 今次又對QE改觀, 不過當然都係要睇運氣, 下次檢查我已經係去健康院, 冇得再係政府探BB了!

私家醫院留位費

2014年6月2日  21W

話說三月時胡醫生已經寫左紙俾我去港安俾留位費, 不過我一心想照埋結構先!

打過去問, 留位費(香港人)只需要$3000, 比起其他醫院, 真係平好多呢, 仲可以碌卡儲分!

趁今日端午節, 就同老公上一轉港安俾錢了! 屋企行上去其實應該15-20分鐘就到, 如果搭車反而要搭兩程, 天氣太熱, 我地選擇左搭的士, 哈哈, 原來的士都只係$25, 慳返時間又冇咁辛苦!

去到只需要出示醫生信同身份証就得了, 由於我係度住過, 佢地有我record, 核對返資料就ok, 不過我之前黎緊急聯絡人填左阿哥, 而家改返做老公, 仲有就係改返個地址!

俾埋錢, 全程十分鐘內搞掂晒, 我地又搭返的士走了!

我地下次再黎, 應該係9月29日晚, 等生bb喇, 又期待又緊張呢!!