2014年6月13日 22W4D
雖然已經係私家照左結構, 但都會黎QE照多次, 一來要享有下納稅人福利, 二來多個機會探BB!
不過就係前兩日, 10月媽媽組有媽媽話私家照左結構冇問題, 但QE照到有問題, 後尾私家醫生認自己失誤, 嘩, 嚇到我呢! 當然我都好信得過孫醫生, 不過都會驚驚!
約左3:30, 我同老公又遲到喇, 係去返上次照唐氏既地方, 上次係坐滿人, 今次竟然係冇乜人, 仲唔駛點等, 好快就到我地!
今次好彩, 唔係上次個衰姑娘, 係一個後生好多既姑娘, 不過間房就多左一男一女類似實習生既人, 搞到我有D緊張!
成個過程照左好耐呀, 仲耐過私家, 應該有起碼20分鐘, 姑娘話BB好百厭, 成日扭黎扭去, 好難照, 係咁捽我個肚, 捽到有D痛!
已經唔止一個話佢百厭喇, 上次就係咁飛腳, 今次仲衰, 照佢眼鼻口就即刻擰歪面, 照手指佢就隻手互握, 照身呢, 本身佢瞓係度, 無端端又趴左係度, 激死左個姑娘!
好彩最後姑娘話佢睇到既都冇問題, 即係合格, 放心晒喇, 一行出醫院, 老公就話BB遺傳左我D衰野, 包拗頸, 哼!!
總括黎講, 今次又對QE改觀, 不過當然都係要睇運氣, 下次檢查我已經係去健康院, 冇得再係政府探BB了!
No comments:
Post a Comment