2014年5月27日 20W1D
由3W開始發現懷孕, 到12W覺得時間過得好慢, 點知過左12W, 黎到20W又突然覺得好快, 已經過左一半孕期喇!
黎到我最緊張既環節, 就係照結構, 可以算係最後一關, 因為之前聽得太多照完結構有問題, 所以我一直都好擔心, 之前幾晚仲要訓得好差添!!
約左孫錫鴻醫生下晝5點, 我都知要等好耐, 所以5點登記完, 度高磅重量血壓驗小便後, 我就返公司等放工, 而老公就提早一個鐘放工, 大約七點黎到!
打去問下仲有幾耐, 姑娘話仲有5個, 可能要一個鐘, 於是同老公去食晚飯先, 點知食食下, 姑娘打黎話就快到我喎, 搞到我勁匆忙咁食埋餐飯!
上返去....原來仲要等多兩個囉, 即係差唔多半個鐘, 咁就唔叫就快到我啦!
到八點先入得, 真係足足要三粒鐘, 孫醫生會問下背景, 之後就開始照了, 佢部機真係好新, 不過3D4D我都係覺得好醜樣!
孫醫生好細心咁每個部位照, 眼耳口鼻, 腦, 心胃腎, 手指腳指等等, BB好活躍呀, 仲見到佢食手指, 捽眼, 仲有係不停起飛腳, 孫醫生都忍唔住係度笑話: 佢好活躍!
足足照左15分鐘, 好開心一切正常, 之後佢會問有冇野要問佢, 我就問左食唔食得雪糕同魚生, 哈哈, 佢話西醫冇野要戒口架, 雪糕魚生食得, 但當然要食D信得過既!
另外一個問題就係我呢幾個星期谷胸都好痛, 仲有格肋底位係腫左, 胡醫生同孫醫生都話, 呢D係乳腺, 正常架, 孫醫生話生完腫得仲勁呀, 嗚, 我話咁咪好肉酸, 佢話.....得你自己睇到之嘛!!
谷得咁辛苦, 希望生完會有奶餵啦! 搞掂後等埋佢既報告, 有隻DVD(超聲波既VIDEO), 另外一隻碟係相, 仲有份好詳細既報告, 咁就二千大元喇!!
總括黎講, 孫醫生真係好細心, D機好新, 睇得好清楚, 不過真係等好耐!!
離開診所, 我地心情都好好, 老公即刻話去行H&M睇衫俾個女喇, 我遲D會唔會地位不保架? = =
No comments:
Post a Comment