2014年5月23日 19W3D
先講一講近況, 就係我病了, 仲要係大病個隻, 發燒喉嚨發炎傷風!
大病已經慘, 最慘係大住肚, 冇乜葯可以食, 睇左兩次西醫都搞唔掂, 剛剛轉返中醫, 希望可以斷尾, 我唔想BB同我一齊病同捱葯呀!
另外係讓座, 其實早係13W4D, 已經第一次有人讓座俾我, 咁橋件衫比較見肚, 個日係上西鐵, 一上車就有個後生仔俾我坐, 真係有D受寵若驚!
而自從個一次, 直到而家, 都冇人讓過, 唔係我唔見肚, 係事實放工時間尖沙咀上車係超多人, D人唔撞你已經偷笑, 都唔好期望有人讓位俾你!
再講就係胎動, 17W6D我第一次感受到喇, 係有彈左兩下, 感覺好神奇, 到之後感覺係有野係肚裡面游梗咁, 老公都摸到, 好興奮!!
講返產檢, 成個月冇見過BB喇, 呢幾日仲要食西葯, 都幾擔心影響佢!
一見到胡醫生, 我就同佢講我病左, 原來佢可以幫我睇埋, 不過我話book左中醫了, 再睇唔掂先返黎搵佢!
之後就係約開刀日子, 佢話如果我9月30日開刀, 10月1日佢依然會巡房既, 所以我唔需要擔心, 即時約埋, 佢打去港安留位, 我下星期就去港安俾留位費了!
開始探BB喇, 見到佢係咁郁, 好放心, 胡醫生今次幫我睇埋心胃腎等, 仲有confirm冇兔唇, 不過佢得2D, 所以睇到既野有限, 大致上都冇問題, 留侍我結構再睇清楚, 而佢都肯定BB係女仔了, 我可以開始粉紅+紫色野喇!
同醫生講我食唔到materna, 結果佢開左另一隻俾我, 係有葉酸+鐵, 仲話可以含係口當糖食, 另外開左鈣片俾我, 我又係佢度買左藻油DHA, 因為佢賣得平($240樽), 結果今次埋單要$990!
No comments:
Post a Comment