**Minnie and Lou**: November 2013

Thursday, 28 November 2013

其實我識煮野食架!

唔知點解, 好多人都覺得我唔識煮野, 其實我識架, 不過咁, 我仲係初學階段, 簡單既餸菜同湯都仲可以, 再難d就唔得架喇!

做左人妻快一年, 其實都煮左唔少餐, 不過只限放假先有時間煮, 搬左新屋一個月, 由於近左, 搭車快左, 所以我都想煮多d, 尤其係咁有心機搞個廚房, 冇理由唔用多d嘛, 所以我會努力架喇, 開多個topic係講煮野既!!

呢一篇係回憶返做人妻前煮過又有影低既野先, 再耐d就冇喇, 因為我只係搵返iphone有既相出黎!!

1. 西芹炒蝦

西芹係我成日煮既餸, 因為我有好多菜都唔食, 但就非常鍾意食西芹, 所以成日煮, 同埋呢個冇乜難度, 好多人西芹都會去筋, 但我就冇喇, 因為懶同埋老公話唔駛喎, 有時間我會學下點去筋架喇, 哈哈!

西芹炒蝦

2. 土魷蒸肉餅

呢個我老公非常鍾意, 成日叫我煮, 佢越叫我偏偏好耐先煮一次, 等佢恨下先, 哈哈!! 唔知點解我次次蒸完都咁多水, 但老公話鍾意喎, 可以用黎撈飯, 人地少水先叫蒸得靚嘛, 吹賬!!

土魷蒸肉餅

3. 蘋果甘荀雪耳粟米湯

熟我都知我係湯怪, 所以好鍾意煲湯, 最常煲就係有甘荀+粟米既湯, 因為呢兩樣野煲出黎既湯都係好甜, 至於其他配搭就睇心情啦!!

蘋果甘荀雪耳粟米湯

4. 煎牛扒+芝士焗薯

中餐之外, 其實我都識西餐架, 因為西餐仲易仲快搞掂, 煎牛扒我地鍾意乜都唔落就煎, 再加d海鹽就正架喇, 當然你塊牛都唔可以太差啦! 焗薯就真係好少整, 要用美國薯仔, 搽晒牛油係面再叮, 刮完薯容撈下d煙肉碎再放返上去, 面頭鋪芝士再焗, 其實都幾多功夫!!

煎牛扒+焗薯

5. 花膠炆雞翼

有次99話屋企停電, 要清下雪櫃既野, 就俾左包發好既花膠我地, 我都分左幾次黎整, 其中一次就係用黎炆雞翼喇!! ^^

花膠炆雞翼

6. 韮菜花炒牛肉
我係唔食韮菜花既, 屋企有牛肉粒剩, 老公又買左韮菜花返黎, 炒埋一齊算!!

韮菜花炒牛肉

7. 煎廣島蠔
屋企冰箱永遠有d食材係度, 廣島蠔係其中一樣, 因為我地都係蠔怪, 而近年我地打邊爐已經唔鍾意桶蠔, 反而愛上左廣島蠔, 平d又好食d, 得閒仲可以整黎做餸, 我失敗過幾次架, 後尾睇肥媽先知原來蠔要慢火凍油就開始煎, 果然係好好多, 仲好好味添!!

煎廣島蠔

8. 牛油炒蜆
曾幾何時江戶前有個牛油炒蜆好好食, 好香既牛油味, 但我整極都整唔到佢個種味道出黎, 唔知點解牛油味都係冇咁出, 希望有朝一日會煮返個味道出黎!!

牛油炒蜆

Friday, 22 November 2013

三日兩夜時間太短, 所以好多地方都要放棄, 我盡量揀d老公未去過既地方!!

早幾日同台灣朋友講我會過去, 點知佢話佢買左車, 可以車我地去玩, 仲會攞一日假同我地出去, 而地方係同我心目中一樣添, 實在太好喇!!

暫定既行程如下:

Day 1: 落機後提款+買電話卡 > 西門町二十輪放低行李 > 附近午餐, 想去牛店試下 > 搭捷運去婚照公司探攝影師 > book左17:30玉鑫帝王蟹, 呢間上次黎食過令我地念念不忘, 所以成為我地結婚周年既晚餐 ^^, 食完再諗地方去!

Day 2: 台灣朋友車我地一日遊, 十分車站放天燈 > 九份 > 基隆廟口夜市 > 回台北市中心, 台灣朋友住新竹, 第二日又要返工, 所以我叫佢早d走, 夜晚我同老公再諗地方去!

Day 3: 起身就去台灣既築地上引水產, 希望唔太多人, 之後返西門町買鴨舌同其他手信, 再附近或台北車站附近行下, 大約三點就要搭車去機場了!!

同上次一樣, 我要去龍山寺幫阿媽買八仙果, 順便去埋華西街夜市, 另外我想去寧夏夜市, 希望可以搵到時間攝呢幾個地方落去啦!!

第四次去台北, 以上行程我係未去過十分車站, 上引水產同寧夏夜市架, 好期待放天燈, 要諗下寫咩願望好! ^o^

Tuesday, 19 November 2013

籌備台北紙婚之旅 - 機票酒店

以前去旅行, 我都會用好多時間去準備, 但今次真係太急, 一個月都冇, 不過只係去三日, 而且呢個地方我已經去過三次, 所以應該唔難既!!

我第一樣book既係機票, 睇過fanfare, 國泰港龍package同散買機票, 長榮, 華航等等, 好多平得黎d時間好差, 頭尾冇左日仲唔抵!

由於得三日, 星期日我係諗住一早就出發, 而回程第二日就要即刻返工, 所以唔可以太夜, 黃昏就最好, 夾晒時間後, 華航係最平+最好時間, 連埋稅每人$1500左右咋, 真係好抵!!

book完機票就睇酒店, 其實台北真係好多選擇, 而我今次主打係平同方便, 方便黎計係台北車站同西門町, 我地想隨時落街食宵夜, 所以揀左西門町!!

搵完一輪, 最後決定揀"二十輪", 貪佢夠新同夠平, 雖然好多comment話佢隔音差, 不過我地都接受到, 要平就要犠牲下架啦, 反正我都會帶耳塞訓覺, 老公就任何情況下都可以訓到既!!

當晚睇酒店睇到好夜先訓, 諗住第二日先book, 點知第二日睇, 高級客房竟然做特價, 同標準房一樣價錢, 前一晚睇明明係六百幾一晚, 今日變左五百幾, 諗都冇諗就book左了!!

原來華航book機票, 如果經agoda訂酒店會有discount, 加埋我agoda積分, 最後七百幾蚊搞掂兩晚酒店, book完之後自己都忍唔住笑左出黎, 機票加酒店兩個人$3800有找, 平到笑!!

呢間係高級客房, 幾型架, 唔知我地係咪真係呢間呢?

廁所

客房另一角

大堂, 型到呢, 唔知實景係咪一樣!

突然的紙婚之旅

之前老公問過我, 結婚一周年想食乜, 哈哈, 其實我都幾似男仔, 因為我真係冇為意呢一日咁快就到, 更加估唔到平時老公咁鬼懶乜都唔理, 提返我轉頭, 不過佢依然係唔諗食乜!!

拖左一排, 上星期四食晏係公司無聊睇下openrice, 真係唔知食乜好喎, 食餐好既都千幾蚊埋單, 好似好貴咁!

結婚周年日係星期日, 不如去個short trip啦, 反正我agoda有積分, 去個澳門應該唔駛太貴既, 咁又上agoda睇下, 但澳門....我又麻麻地, 一來酒店唔抵, 二來我地又唔鍾意賭, 三來真係太多人, 又冇咩特別野我地想去想食!!

咁.....我就睇下台北, d酒店真係好平呀, 再睇下機票, 其實...都唔係好貴之嘛, 我地今年報左6299, 唔駛交稅之餘仲有稅退, 咁就當攞交稅錢黎去囉!!

打俾老公問佢, 佢一聽到就話好, 哈哈, 不過佢星期六要點倉, 不能請假, 我地只可以星期日一二去, 請兩日假, 我已經冇假了, 所以no pay leave!

由睇下食乜到真係訂機票, 只係短短三四個鐘, 到夜晚我都仲未接受到, 一年去三次旅行, 真係好興奮呢!!

Wednesday, 13 November 2013

領養新鼠鼠

好耐冇update過四籠四鼠近況, 其實細佬鼠上年未夠一歲就因病去左彩虹橋了, 個時仲喊到發癲, 返唔到工添!!

今年奀吱吱同家姐鼠都相繼係我兩次搬屋前走左, 得返烏卒卒陪我地搬屋, 搬到入黎, 可能得返佢一隻唔慣, 又或者真係太老了, 已經兩歲多d, 係一個老婆婆, 見佢精神好差, 成日訓覺又食好少野, 真係好擔心!!

上網睇下有咩鼠鼠領養, 見到又有人話生左一堆bb唔要, 咁我就留左了, 明明佢個隻係奶茶鼠, 唔知點解會生左小灰霸+銀狐出黎, 最後我揀左銀狐, 琴日仲帶左佢返屋企了!!

銀狐bb係10月17日出世, 一個月都冇唔知點解可以肥到咁, 佢個頭同埋d便便係好細架, 只係個身真係肥, 唔會又有左卦??

我地想驗下佢係男定女, 但佢太細膽, 少少事就係咁走, 可能未熟悉新環境, 咁我地都唔搞佢住了!!

另外驚烏卒卒會以為我地貪新忘舊, 所以兩個籠都放到好遠, 之前細佬鼠有呷醋架, 今次要小心處理呢!!