換樓 - 煩複的文件

第一次換樓, 乜都唔識, 好驚做漏野, 話晒我地都係要靠賣樓錢黎買樓, 唔同之前買樓咁, 所以有乜差池就好大鑊架嘛!

賣樓:
簽臨約時我地定左成交期係大約45日, 諗住快d收錢穩陣d, 簽好後基本上都係交晒俾律師樓搞!

臨約後既14日就簽正式買賣合約, 呢日之前我地要約律師簽約, 順便交文件俾佢地, 主要文件有管理金按金單, 銀行供款單, 差餉單!

律師建議我地唔好交新一期管理費, 因為我地會同新業主對數, 而我地條數一定有多, 咁寧願係個度扣好過!

簽好後就自己搞掂cut水電煤呢part, 之後就係更煩既執野搬家!

成交前兩日, 我地再上左律師樓對數, 律師會將收到既錢扣返律師費+雜費+欠銀行既按揭供款+地產經紀佣金, 剩返既錢就會入去你指定既戶口!

另外有d管理費, 差餉等等既數, 即係要清楚計返幾多日收幾多錢, 佢地會另外計清楚同對方收返再俾你, 但係我到今日(交左樓兩日)都未收到囉!

買樓:
簽臨約我地定左60日成交, 之後就同平時買樓差不多啦, 都係交細訂後, 14日正式買賣合約前簽約, 律師要收一半律師費先, 我地連埋大訂+一半律師費+印花稅, 一次過俾左律師先, 其實真係好肉赤, 層樓未收到錢就要俾幾十萬出去!

之後當然係搵銀行搞按揭, 第一次買樓時我係漁翁撒網咁搵左好多間申請, 其實間間個rate差唔多, 只係覺得搵多間報價冇蝕! 今次我只係搵左三間, 一間係上次按揭用既恒生, 一間係永亨, 另一間係中銀!

其實銀行真係好得意, 你打去問時一個價, 到你申請完批核又另一個價, 到最後, 我地揀左中銀, 原因係佢個rate好同埋大行, 多分行方便d!

好快搞好按揭, 只係係度等成交, 賣樓同買樓個成交期係爭18日, 咁我短租其實真係幾金, 於是買樓個度就打去要求提早成交, 業主又ok, 所以成交期就提早左一星期!

早幾日再上律師樓宣誓同俾埋尾數, 即係例如我做八成按揭, 之前俾左一成訂金, 咁剩返一成就係而家連埋律師費尾數一齊俾, 而對數呢part就未做好, 所以唔駛俾住!

律師俾左封信我地, 証明新屋係我地既, 咁我地就可以去申請野, 主要係管理公司先需要呢封信, 而我趁呢兩日得閒, 水電都開埋戶, 由於本身都用開, 所以其實好簡單, 而電費因為我地仲有錢係佢地度, 佢地話可以將筆數直接轉去新屋戶口! 而煤氣公司話一開左氣就唔用都要收最低消費$29.5, 建議我地臨入住先開, 所以遲d先搞!


一切準備就緒, 新屋將會係8月9日成交, 我地專登揀星期五, 咁放工趕去攞匙睇屋, 星期六就約左裝修上黎睇, 星期日就拜四角, 希望可以盡快開始裝修!!

換樓 - 令人頭痛的搬遷

比起買樓, 換樓真係一件辛苦事, 記得之前由簽臨約到成交, 覺得日子好長, 但今次覺得時間太快了!!

首先搵短租已經令人頭痛, 之後到舊屋cut水電煤, 由於呢度係中央石油氣, 所以要約人上黎拆鏢!

cut好水電煤又要安排轉地址, 記得既我都通知晒, 不過都係驚有漏, 所以係郵局申請左三個月郵件轉遞, $100/3個月, 上網download張form填好連支票同佢要既文件寄出就搞掂, 一星期唔駛就搞掂, 好快手!!

搞好晒就到搬屋, 屋企裝左有線, 無線收費仲有係用pccw上網, 所以要搵晒呢三間搞搬遷, 呢個真係好勞氣, 首先有線同無線第一次搬遷都可以豁免, 但幾個月後搬新屋就要俾錢了, 有線$350, 無線$150, 我覺得好合理!

到pccw, 真係激死人, 首先佢單方面更改合約, 明明第一次係可以豁免但改左, 仲要收費唔平喎, 電話線四百幾, 上網$680, 我搬兩次咪即係成二千幾?

係forum見到好多人鬧呢樣野, 原因係佢地已經將呢樣野外判左, 所以次次都要俾錢, 大佬你公司自己問題, 簽約時你話第一次豁免, 簽完約就自己改左, 太冇天理!!

一肚氣打去嘈, 佢話最多可以豁免電話線一次, 上網$680可以回贈$340既超市coupon, 一唔係就轉貴plan就可以豁免, 揀無可揀下唯有接受, 因為電話線少用, 所以我會停用幾個月, 到搬新屋時先直接搬去!!

因為呢件事, 我決定一到期我唔再用pccw, 月費已經貴過人, 但服務又唔係好過人, 反正service都係咁差, 我寧願揀平d既公司用, 哼!!

換樓 - 搵短租

一輪賣樓買樓, 定下左成交期, 賣樓會係29/7, 買樓係16/8, 中間有半個月時間, 文件上有足夠時間, 而新屋要大裝修, 問過要兩個至兩個半月, 所以我要開始搵短租了!

短租難求, 地產已經唔駛諗, 唯有上網搵下, 留左好多言, 但好多時回覆都係: 不考慮短租, 或者係提早起租, 開天殺價等等, 真係有d擔心!

我首選係揀返新居或舊居同屋苑, 咁搬起上黎都方便d, 但都搵唔到, 最worse既情況係要租service apartment, 問過價錢: 汀蘭居最平$15000 (冇廚房), 雍澄軒$13000-$18000 (水電另計), 帝景酒店$18000, 其他已經要兩萬以上了, 實在太恐怖!!

幾經辛苦, 搵到以下短租: 青衣藍澄灣$13000, 青衣美景$12000, 青衣翠怡$12000, 荃灣中心$11000, 我預計短租3-4個月, 其實真係好金!

有次同個朋友飯, 佢係以前住娘家樓上, 我地由細識到大, 當然唔算係好熟, 原來咁橋佢屋企(即係我娘家樓上)都諗住放租, 可以租幾個月俾我先, 當然租金係跟市價, 其實娘家唔平架, 係荃灣綠楊, 不過就真係好方便, 至少老公返工樓下就有廠車, 車錢都慳返!

思前想後, 雖然係唔平, 但真係方便同埋近娘家, 得閒可以落樓下痴餐, 而朋友亦好好, 俾我半個月咁計租, 同埋等我成半個月先起租, 所以我地決定租了!

總算又搞掂一樣野, 其實換樓真係好辛苦, 賣樓買樓租樓同時做, 真係會癲架!!

換樓 - 第三次睇樓+買樓了~

話咁快又睇第三次樓, 今日只會睇兩房, 但冇咩盤, 有d業主唔係度, 有d又有租客住梗, 不過唔緊要既, 我地之前已經睇過, 大約都知係點!!

首先睇既係一個低層, 3樓咋, 其實娘家都係住3樓, 我由細到大都唔覺得低層唔好, 仲好方便添, 因為唔駛等lift, 直接行樓梯就得, 趕時間尤其覺得方便, 仲有停電, 電梯維修等等!

去到睇間屋係有人住梗, 基本兩房單位全部都係有人住梗, 一個吉左既盤都冇, 由我第一次睇時已經係, 可以想像呢度幾咁渴市! 講返間屋, 一入屋感覺好黑, 原來係低到連個天都望唔到, 俾座山遮住左! 間隔就都係一樣啦, 四四正正咁, 廚房好大, 再入房睇, 原來係對住個網球場, 嘩, 萬一放假有人打波, 我咪會俾d打波聲嘈醒!

睇完後老公話覺得ok, 人家開價370萬, 冇價講, 其實已經有少少out budget, 我本來係想買350萬既樓, 但睇完後知道呢個只係妄想, 咁370萬都可以接受, 但係如果370萬買一間低層我又覺得唔值囉!

老公話: 反正而家有個大海景我地都係長期拉埋窗簾架啦, 買間低層有咩問題?

所以話男人其實唔多用腦, 低層....比較難甩手, 同埋370萬真係唔值, 我唔鍾意望唔到個天既屋, 所以我堅決唔買!!

之後....突然彈左一間出黎, 原來係地產專登幫我搵返黎, 真係新鮮熱辣未推出市場, 仲要係同座同單位, 不過係25樓, 算係高層, 終於叫望到個天, 真係感覺好唔同囉!!

滿心歡喜有個鍾意既單位.....但業主開價400萬, 真係想講粗口, 駛唔駛咁貴呀? 我睇過同類單位, 明明之前係仲係360-380萬左右, 突然升到最近兩單都係39x萬, 仲話樓價跌?? 唔覺囉, 一係麗城除外!!

地產努力講價, 業主只可以平多10萬, 即係390萬, 我都覺得好貴呀, 個業主話: 單位放租可以有$13000, 其實佢寧願一年收十幾萬租!

其實真係好有道理, 但地產應該真係好努力游說, 仲搞到業主夫婦鬧交, 聽聞地產上到去佢地係面紅耳赤, 個男人就冇咩所謂, 女人就唔想賣, 寧願收租!

而我老公呢? 就不停話買啦買啦, 我真係好鍾意! 我問左佢十次, 你真係好鍾意? 唔好後悔喎, $390萬既樓, 月供萬幾, 你要有心理準備呀, 再諗清楚呀, 佢話佢已經預左, 同埋真係諗清楚, 又真係好鍾意!

即係決定權在我手, 其實我都好大壓力呀, 間屋係唔錯, 高層, 景觀開揚, 間隔四正, 位置方便, 但.....390萬呀, 結果....我交俾個天啦, 就同地產講: 390萬我一定唔會買喇, 佢肯減多一兩萬都好, 佢企硬時我都企硬!

呢個時候, 地產朋友就同帶睇樓個女仔講, 一係減佣啦, 我唔收我個份, 咁個女仔又話唔好, 叫我地俾d時間佢, 咁我地就去左食個下午茶!!

我諗地產女仔真係好努力, 佢用足足兩個鐘, 先叫到個業主減2萬, 即係388萬, 亦即係我地將會買呢層樓喇!

返地產鋪簽臨約, 見到業主夫婦, 個女人真係黑晒面架, 全程冇笑過冇出過聲, 連俾票佢都冇望過一眼, 我諗佢真係好唔想賣!!

簽好臨約好, 向好友同院友們宣佈消息, 個個都話我地好快手, 一星期內賣樓+買樓, 之後開始有排忙喇!!

之後問返業主俾相我地, 係度post一張俾大家睇, 而家間屋係全海, 下間屋將會係望山!

換樓 - 第二次睇樓

幾經辛苦寫晒蜜月既blog, 可以專心寫換樓同之後裝修既野喇, 不過有d會係私有化, 有興趣先叫我add你地啦!

上次講到突然賣左層樓, 咁下一步就係睇下樓, 就約左地產幾日後睇麗城!

是日係星期六, 睇左好多個盤, 但全部都係三房, 因為兩房既.....冇盤!

我地睇既全部都係麗城二期, 其實都知道買唔起, 不過個地產都話睇下冇所謂, 既然佢明知混吉, 咁就一齊混吉啦!!

其實識個人做地產都幾好架, 賣樓又會俾指示我, 買樓又會幫下我咁, 起碼冇俾人呃既感覺先!

睇左咁多個盤, 有一個真係好吸引, 因為係全海景, 價錢係460萬, 668呎三房, 我知三房+全海黎講叫做抵, 但無奈買唔起就係買唔起, 所以睇完就算了! 總共睇左7個單位, 第一次買樓時都冇一日睇咁多, 原來三房盤係咁多!!

睇完係地產鋪簽睇樓紙, 帶我地睇個位女仔既上司話兩房盤都有, 但要聽日先睇得, 由於一期得三座, 每座35層, 每層有4個係兩房, 所以唔好預會有好多盤!

睇完7個盤, 真係幾攰架, 仲要成日遇到其他睇樓既人, 或者係地產自己爭匙, 其實個市都唔係想像中咁靜之嘛, 我地都係鎖定好一期, 因為維修完真係差好遠, 仲靚仲新過二期, 最緊要係部lift快好多嘛!!

北歐蜜月之旅 - Day 11 (芬蘭)

最後一天了, 發生了一段小插曲, 因為3月31日係歐洲轉夏令時間, 出發前明明提醒自己要記得, 因為呢一日要搭飛機返Helsinki, miss左就要等兩日先再有機, 同時會冇埋返香港程機!

點知我真係忘記了, 好彩iphone自己識轉咋, 我地係去到Helsinki見到個鐘唔同時間先醒起, 真係好好彩呀, 偉大既iphone, 哈哈!!

講返最後一日行程, 我地又係起身食早餐, 今餐仲要食得好飽,因為有排冇得再食野! 食飽就call的士去Ivalo機場, 呢度去機場好快呢, 好方便!!

Ivalo機場好細, 連張登機証都係手寫! 呢度好多動物公仔, 仲造到好真, 我地影左幾張相後就上機, 正式離開北極圈了!

老公傑作~

大約個半鐘頭機去到Helsinki, 我地係機場搵locker存行李後就搭巴士出市區了!

第二次黎火車站, 我地搵左間便利店買1-day pass, 之後就坐電車去church, 其實呢度都幾細, 可以行到去, 但買左飛當然唔好蝕, 一兩個站都要搭!

第一站係岩石教堂(Temppeliaukio Church), 落車後要行一小段斜路上黎, 睇外表真係唔知係一間教堂, 好彩我做晒功課, 一早google map左, 慳返好多時間搵路!

呢個教堂好特別呀, 可能我對岩石有d興趣, 所以Helsinki幾個教堂我一定要黎呢個先, 不過入黎逗留5分鐘, 影幾張相就走了, 因為真係冇咩好做!

又坐返電車去火車站附近, 即係Helsinki地標既大教堂(Helsingin Tuomiokirkko), 真係好大間, 不過我地冇入去了, 間間教堂都差唔多款架啦, 我地慳時間去多d地方好過!

行到攰了開始餓, 係附近搵左間餐廳食野, 係食pasta, 又幾好味喎, 仲有free wifi添!

附近都幾多手信鋪, 我地行左幾間, 最後都係空手而回, 之後再搭電車去最後一個教堂(Uspenskin Katedraali), 估唔到都幾多人, 我地又係到此一遊, 影完相就走了!

行返落去時, 呢度附近都有條情人橋, 又係好多鎖係度架, 唔知世界上有幾多情人橋呢?

由於我地速度太快, 所以有時間剩, 可以搭船去埋芬蘭堡, 不過搵左陣都唔見個碼頭, 最後都係要問人!

呢度搭船去大約15分鐘, 原來都幾多人去喎, 見到個結冰既海面, 有少少擔心坐隻船唔太安全, 原來又唔會, 因為隻船都幾密, 成條航道都出左黎, 唔會話撞到d冰!

芬蘭堡係以前既軍事機地, 原來都幾大喎, 雖則明明見到好多人黎, 但去到行可以係附近一個人都冇架, 我地周圍行, 有d地都幾危險架, 又滑又多暗地方, 老公行到差d pk添呀!!

我地係度逗留左一個鐘左右就走了, 行唔慣街既我, 都幾攰架! 搭船出返去時剛好日落, 睇埋最後既日落先走!

返到市中心, 我地又四圍逛, 其實係想搵地方晚餐, 但附近d餐廳全都好貴呀, 真係逛左幾個圈都揀唔到, 最後唯有食麥記!

食飽後已經入黑, 我地就搭巴士去機場, 返香港了!!

北歐蜜月之旅 - Day 10 (芬蘭)

話咁快就第10日喇, 即係最後一日玩, 最後一晚睇北極光, 要返香港繼續勞碌生活, 好唔捨得呀!

今日起身後係酒店食早餐, 之後就call的士去Guesthouse Husky, 原來都幾近喎!

黎呢度當然係搵Husky, 即係我驚既狗狗, 一直都好擔心呢一日既行程架, 因為我實在係太驚狗, 但老公好鍾意, 一場黎到又冇理由唔玩, 所以我豁出去了!

呢度自成一角, 真係要的士先黎到, 我地首先又係要換衫先, 其實唔係換衫, 係著衫, 即係再加多件外衣, 所以個個都變肥左一倍, 當然你唔怕凍, 可以選擇除左件褸去著佢d衫, 但老板娘叫我著埋, 所以我信佢!

換衫時終於遇到香港人喇, 仲要係6個咁多, 我地係會同一個Husky Safari, 佢地係呢度住添呀, 就係佢地book左, 所以我book唔到! 同行仲有兩位外藉夫婦, 但我地冇交談呀, 因為佢地都幾寸的!

換好衫就去狗場喇, 嘩.......呢度大得恐怖呀, 好多狗狗, 好似話有150隻左右, 每隻都有自己既屋仔, 離遠已經聽到d狗狗係度吠, 好驚好驚!!

入到狗場, 原來d狗隊已經準備好, 佢地好high呀, 係咁吠係咁跳, 不過俾架車扣住左走唔到, 個一刻我真係腳仔軟, 係咁捉住我老公, 我地影左陣相, 老公仲迫我同d狗狗影, 話一場黎到丫嘛!

影好相大家ready晒, 領隊教我地點控制架車, 我同老公一架, 當然我係乘客啦, 我咁驚狗做唔到司機架喇, 之後老公護送我上狗狗車, d狗狗又真係唔會聞我!

開始起行喇, d狗狗可能太耐冇跑, 一開波真係快到恐怖, 係咁衝係咁衝, 前面架車個司機墮車添呀, 跑左陣佢地開始攰, 速度開始減返少少!

d狗狗應該行慣條路, 佢地係認得路架, 穿插d樹林, 大雪地, 其實呢度真係好靚, 忍唔住危險d都要拎部相機出黎影相!!

仲有呀, 原來d狗狗一路跑一路便便架, 好臭呀, 同埋跑得熱佢地會低頭食雪降溫, 好得意!!

跑左個幾鐘, 終於都有得休息, 去左一個營, 領隊點火俾我地取暖同埋煮午餐, 開頭仲好期待有咩食, 原來係鹿湯, 我飲左啖真係頂唔順呀, 唯有係咁食麵包飲果汁充飢算!

食飽飽出去睇d狗, 佢地好攰呀, 隻隻都攤晒係度, 攰到唔得閒理我, 我就趁機同佢地影相喇, 哈哈!

休息夠了, 有d狗狗都起身了, 我地就回程了!!

換返衫後, 我地就搭返的士返酒店了, 由於太攰, 我要小休一會, 老公就係附近周圍行, 佢話見到有人冰上釣魚, 本來我都想join架, 但驚太悶所以放棄了!

我地都算好彩, 睇到北極光之餘, 日照時間又算長, 八九點先天黑, 所以我地天未黑就晚餐了, 北極圈既最後一餐我地係酒店餐廳食, 叫左兩份steak就算了, 因為呢度d野唔平呢!!

食飽飽返房執下行李, 沖涼休息又等睇北極光, 我地今晚搬左去二樓, 冇露台所以要開窗睇, 差唔多兩點又開始有了, 不過今晚弱好多呀, 仲只維持左一陣就冇了!!

既然係咁我地都唔等了, 反正已經睇到三晚, 我地已經覺得好好彩!!

北歐蜜月之旅 - Day 9 (芬蘭)

第9天, 係小木屋瞓醒後, 執齊行李就去酒店餐廳食早餐了, 環境唔差, 最難得係有三文魚, 老公等左食三文魚好耐了, 上次係食挪威三文魚, 今次係芬蘭, 我都係鍾意挪威多d!

食飽後就call的士了, 成個旅程第一次搭的士, 因為巴士太疏, 就唔到時間! 我地帶埋行李起行了, 呢度d的士真係好貴呀, 起錶都成舊水了, 不過架車又真係又大又舒服既!

我地繼續向北行, 目的地係旅遊區Sarrisekla, 呢度好多野玩架, 係香港就報左今日玩snowmobile!

一去到就要換衫, 著到成隻粽咁出發, 我同老公同一架車, 因為冇咁貴, 又可以親密d, 坐車尾一試烈火戰車感覺!

同行仲有個芬蘭女仔, 佢自己一個黎玩, 同佢傾左陣計, 原來佢媽媽係finnair度做, 佢都黎過香港架!!

我地行左好耐呀, 呢度好似迷宮咁, 唔係雪就樹, 冇人帶路真係會迷路架, 行左一個鐘左右, 去左個鹿場餵鹿, 佢地真係好得意呀, 不過對同類都幾惡架, 會爭食! 呢度有兩隻仲有角, 但教練話應該好快俾人斬了, 因為驚傷到人!

餵完後又再起行, 係樹林度穿穿插插, 估唔到會上左山, 呢度真係好鬼大呢!

快活不知時日過, 話咁快就夠鐘了, 我地玩到又攰又餓, 係附近搵左間餐廳, 食左個最貴既午餐!

之前係香港都睇到有介紹芬蘭食皇帝蟹, 但唔係周圍有得食, 所以放棄左, 估唔到黎到又俾我地搵到, d蟹真係幾鮮甜, 不過貴夾唔飽, 我地另外仲叫左個steak, 好好味呀!!

食飽飽就去搭巴士了, 又再北上去最後一站 - Ivalo, 呢度d巴士站真係完全唔起眼, 好彩我地次次都會預時間去搵定個站, 所以成個旅程都算幾順利!

終於去到最後一站了, 我地會係呢度留兩晚, 希望會睇到北極光! 第一晚會住酒店既mini suite, 有個露台可以睇到北極光, 但由於酒店得一間, 所以聽晚我地要轉房了!

露台堆滿雪, 基本上係冇得坐, 不過呢個位可以睇北極光!!

係酒店放低行李後就出去超市買野了, 間超市就係對面, 好方便! 我地買左杯麵, 肉丸, 乳酪同汽水, 就係我地今晚既晚餐黎架喇!

呢架車好得意呀, 小朋友又可以玩, 大人又可以放野!

呢間酒店冇廚房, 亦冇雪櫃, 水煲都要問reception借, 但係有私家sauna房, 我地將d肉丸放左去sauna加熱, 幾個鐘後又真係食得, 哈哈!! 而汽水同乳酪我地就放左係露台, 一個天然冰箱, 不過真係凍到結冰, 想唔結冰就係放窗邊, 開條小隙就得了!

夜晚等睇北極光, 老公話要瞓陣先, 咁得我一個係度等, 好彩係房就等就得, 唔駛捱凍! 等到一點左右, 真係有北極光呀, 仲要係勁過琴晚好多, 即刻叫醒老公一齊衝左出去睇, 我地好興奮呀, 不過呢度冇乜人, 好似係得我地兩個係大鄉里咁!

d北極光好似煙咁飄黎飄去, 好得意呀, 我地冇專業相機, 只得普通既數碼相機, 又俾我地影到少少, 其實我覺得影相係比較誇張, 現場睇係冇咁綠架!

極光出現左差唔多成個鐘呀, 雖然好凍, 但真係好值得, 因為睇極光真係要天時地利人和, 聽過幾個朋友都話去左十幾日都睇唔到, 所以我地好好彩呢!!

呢個係酒店既相~