Guam+Tokyo之旅 Day 4 (22/1)

今日又要早起(基本上冇乜邊日可以遲起), 五點幾起身, 六點就搭車去築地, 聽聞五月就冇了, 好彩有機會黎到!

冇諗過晨早七點都咁多人囉, 個天都係剛剛開始光咋, 不過多人都係"壽司大", 真係多到離晒譜, 我地冇咁既時間耐性, 轉陣去第二多人既大和, 門口雖然有條龍, 但唔駛等好耐就入得!!

好多人, 其實呢度只係少部份咋, 仲有條長龍係後面~

未試過晨咁早食壽司做早餐, 哈哈, 樣樣都好想食, 其實佢有set架, 不過我唔係樣樣都食, 所以選擇散叫, 老公就叫左個set! 個日本人好好笑架, 一路整壽司一路同我地講笑, 佢都識好多中文, 而我見到邊樣正就叫佢整俾我, 叫下叫下都唔少野呢!!

d壽司真係好美味, 仲成功叫佢唔好放wasabi入去, 因為我唔食架, 食得好開心, 佢個湯都好正, 好多好細既蜆煲架, 呢餐食得好開心, 不過唔平, 繼餐蟹之後, 呢餐係第二貴架喇!!

老公叫既set, 豐富早餐~

我散叫既, 其實唔止呢度, 不過一黎到即食唔記得影相!!

食完個早餐就走周圍行, 阿哥叫我買蟹返香港一齊食, 見到有得賣鱈場蟹同毛蟹, 佢仲俾左我地試食, 毛蟹好多膏, 本來諗住買鱈場蟹就算, 但佢話買埋毛蟹計平d, 所以我地就買左1鱈場蟹2毛蟹, 佢幫我地包裝可以存3日!!

我地買返香港既蟹, 3隻蟹加埋7000yen咋!

由於買左蟹, 我地要即刻返酒店放低, 個陣都只係八點幾, 遇著d人急急腳返工, 日本人生活節奏都好緊張呢!!

係地鐵站見到有間賣栗子, 忍唔住又買了, 超大粒架, 仲可以用SUICA俾錢!!

大大粒栗子, 臨返香港都再買多包!

返酒店hea陣我地又出發去下一站, 就係原宿喇!!

原宿有我鍾意既卡樂B, 我指定要黎架, 一入到去我就癲左, 哈哈, 佢仲有堂食, 忍唔住入去食少少先, 行完先再返轉頭買野!!

終於黎到卡樂B喇!

周圍行行行, 買左孖寶賽車隻龜公仔, 仲有anna sui耳環, 半價好抵呀!!

今日行程除左卡樂B, 仲有食豬扒, 老公係本書見到話好想食, 本書寫住係全日本最好食既豬扒喎, 去到個環境似飲茶多D, 有幾款豬揀架, 我地揀左最貴既黑毛豬同平少少既紅毛豬!

其實食落, 我真係唔識欣賞, 覺得同平時食差唔多, 或者好少少之嘛!!

呢間就係所謂全日本最好食豬扒

食完豬扒行返去卡樂B買野, 我又再次發癲, 乜都掃一餐, 最後買左成千蚊, 仲叫人俾紙箱我地返去pack!!

本來下站係去涉谷行街, 但因為太大袋卡樂B, 我地要取消了, 改左返酒店放低野再去新宿行街+晚飯!!

又再周圍行同買下手信, 再搵地方食飯, 本身老公plan左食牛角, 我話黎到日本就咪鬼食牛角啦, 雖然我鍾意食燒肉, 要食都搵間香港冇既!

誤打誤撞上左間野, 一個人都冇, 有d嚇襯, 坐低後見到佢真係有個炭爐架, 我地好豪咁叫左和牛, 嘩....正到不到了, 仲勁搶火, 我地食完又再叫, 停唔到口, 呢度啤酒100yen任飲, 仲有免費wifi, 只可惜係冇人識英文, menu亦冇英文, 落單搞左好耐, 我地仲要即場wtsapp個menu俾香港朋友幫我地翻譯!!

夜晚呢餐, 真係大大個炭爐, 佢夾梗炭俾我地~

睇到都流口水!

好滿足既一餐, 仲平過係香港食添, 之後就返池袋了!!

今晚又例牌十一二點落街食宵夜, 我地揀左食一蘭呀, 幾好食呢, 仲有得買一包包返去自己煮, 但我都忍手冇買了, 費事爆o急呀!!

最後宵夜, 一蘭~