台北婚照之旅 6/10 - Day2

本來今日約左攝影公司六點去佢鋪集合, 後尾改左七點, 咁我地可以搭捷運, 不過都係食唔到酒店既早餐(7:00-11:00), 男友又懶懶地, 因為要搬晒d行李走(佢話放酒店過夜信唔過), 所以又係搭的士, 六點起身執野, 我地未夠七點就到喇, 原來佢地除左鋪頭, 仲有另一個鋪位係studio, 化妝師同佢男友, 即係攝影師徒弟帶我地過去化妝!

兩位男士冇野做, 就出左去食早餐, 食完先買俾我, 餓死我喇, 所以冇影相, 個早餐係涼伴麵, 好正呀, 我覺得正過香港個d好多呢!! 我化完到男友化, 其實我覺得自己個妝一般咋, 不過算啦, 可能台灣既化妝我唔慣!! 化好晒後攝影師都返左黎, 佢叫我換左紫色晚裝先, 男友就黑色禮服, 之後就出發喇!! 原來都有成4個人跟我地: 攝影師steven, 司機+助手: eone, 攝影師徒弟(負責幫我地拍mv): 小安, 化妝師小米, 小安同小米係一pair黎架, 佢地都係靚仔靚女, 年紀同我地差唔多, 大家幾傾得埋呢!!

有冇覺得奇怪, 點解有人拍mv? 咪就係臨出發前一晚, steven問我拍唔拍埋mv囉, 因為佢地都係剛開始, 如果有興趣佢地要準備喎, 咁我地又覺得幾特別, 加三千幾港紙, 咁...就落左搭喇, 哈哈!  我揀呢間公司既原因係佢地可以去露營, 亦因為咁我男友先肯同我黎咋, 鬼叫佢係d運動型, 我知道一定吸引到佢, 哈哈!!! 而佢地架車都設備齊全, 有檯, sink盤, 雪櫃, 仲有收埋好多露營設備, 真係好掂!!

第一站係去合興火車站, 好似係新竹, 佢有個車廂係廢左, 擺係度俾人影相, 影個時我要求影火車路軌, 因為我去唔到十分車站(好無聊), 估唔到佢真係記得, 影左差唔多一個鐘就去第二站, 係男友要求既水管, 黎到後我地係車上換衫, 男友好簡單, 只係件褸變左黑色背心, 好似waiter咁, 而我就換黑白晚裝! 呢度似地盤, 好多管狀既野係度, 影呢度都幾辛苦呀, 因為要爬上爬落, 好彩我全程係著拖鞋!

影左一粒鐘後又走, 之後就去左一間7-11開餐, 只係食左少少野咋, 因為著到咁好多人望, 快d食完走好過, 食完就去第三站, 換左藍綠色晚裝, 男友就換自己既花恤衫, 呢度好靚呀, 似係一個森林咁, 仲有一個湖, 不過好多蚊囉! 影左一粒鐘又去下一站, 係一間cafe, 環境好靚, 呢度最低消費一人一杯野飲, 呢2日剩係呢一餐係我地俾錢!

影完四個站, 今日行程就完喇, 出發去露營區, 原來只係隔離, 好近, 睇到牌呢度係苗栗, 一黎到我就要求沖涼洗頭喇, 因為好辛苦, 太多蚊咬我喇, 我地兩個沖涼洗頭, 佢地就準備晚餐, 就係打邊爐喇, 湯底係"薑母鴨", 男友好鍾意, 不過我唔鍾意薑, 如果冇薑既味就very good!

今晚個露營區冇人, 我地包晒成個場, 係呢d環境下打邊爐, 真係感覺一流, 天氣又非常好, 唔熱又唔凍, 唯一唔好就係多蚊囉, 好彩佢地都有點蚊香, 否則我咁惹蚊實被咬到豬頭咁! 食完晚飯都係八點幾, 小情侶負責洗碗, 我地坐係度傾計, 好寫意, 好似兩國交流團咁, 乜野都傾, 最搞笑係大家互相教粗口, 真係好好笑, 仲有原來古惑仔套戲係呢度係好hit架! 傾到十一點左右, 個個都攰喇, 所以就瞓覺, 我呢d夜鬼當然未捨得瞓, 睇返今日影既相, 好開心呢!!

呢度係架車入面~

三部機對住我地, 哈哈~

我想要既路軌, 真係會有車經過架~

男友要既水管~

呢度真係好大自然, 男友話要求有大自然, 但我話一定唔要花海呀!

個景同條裙都幾襯!

呢度係CAFE, 其實影左好多相, 仲有影埋我地既婚戒同小白佢地, 不過部相機冇電喇!

晚餐, 真係地道台灣火鍋!

架車真係可以收好多野架!