台北婚照之旅 5/10 - Day1

終於都打旅行既野, 籌備呢個旅行好艱辛, 之前都有寫過情緒病, 咁多年黎同男朋友去旅行都係我一手搞晒, 例如機票酒店行程, 都冇咩怨言, 係上年去希臘夾埋其他朋友佢地又唔做野先搞到我第一次為旅行野發脾氣, 到今年又要煩倉鼠既野同埋成日要做家務, 最慘叫佢睇下野真係可以一d都唔睇, 真係人都癲~

話說回來, 最後呢個旅行咪又係我一手包辦囉, 機票酒店錢都係我俾, 因為佢之前俾左一萬蚊訂金去pre-wedding公司, 所以機票酒店我俾啦~

而家住個屋苑冇直接車去機場, 點都要分幾程搭, 車錢都要幾十蚊, 仲要我地有一個o急一個大背bag同一部notebook, 男友話call的士算啦, 又快又方便, 仲慳返好多時間, 於是之前一晚call定, 可以瞓多一粒鐘呀~ 的士準時八點到樓下接我地, 去到機場折左係大約$170, 慳返既時間同方便, 我地都覺得值得~ 之前係屋企已經揀左位, 去到寄行李就ok, 之後有時間剩就食個m記早餐, 好耐冇食薯餅呀, 雖然話去影相, 但我真係冇戒口, 之前幾日仲食梗薯片, 而家又m記~

話咁快去到台北, 已經係第三次黎喇, 男友就第一次, 呢個亦係佢懶既藉口, 估唔到機場變左好多, 而家仲裝修梗, 好鬼多木板係度隔住, 好似迷宮咁, 搵到個巴士站就買飛, 呢度靚左好多呀, 同之前殘舊既counter差好遠~ 我地住既酒店係凡登, 係忠孝敦化站, 但係機場巴士最多係去到忠孝復興站, 買飛時個女人話落車行兩個紅綠燈就到, 結果我地俾佢呃左囉, 行左成15-20分鐘!

去到凡登checkin, 間酒店係一個商場裡面, 樓下好旺呀, 有starbucks, 小食店, 7-11, 24小時既watsons等等, 上到去個感覺幾舒服, 揀呢度原因一黎近攝影公司, 二黎夠新, 呢度d燈光好暗, 我地行去房時好似係去梗卡拉ok既房咁, 好搞笑, d職員都好有禮貌, 仲有呢度有free wifi, 佢仲話可以提供旅行插蘇, 餐廳又有電腦俾人用, 廁所都有風筒(當然係弱個d), 唯一唔好既係佢唔俾丟廁紙落廁所, 話好易塞喎, 我本來諗住睬佢都傻, 但之前上網睇過有人真係丟廁紙都可以整塞, 搞到我驚左!

之前堂妹俾左張電話卡我用, 一到埗就打俾攝影師steven, 佢話兩點到凡登樓下接我, 之後佢就車左我地去試衫, 第一站係男禮, 原來佢鋪頭冇男禮要出去租, 我個package只包一套男禮, 但係四套婚紗/晚裝, 之前佢已經叫男友帶多幾件恤衫同禮服黎, 我地帶左上去淘既黑色男禮, 所以今次就揀白色禮服, 連鞋都可以租, 不過我地冇帶白襪, 要臨時買~

揀完男禮就返佢鋪頭揀我既衫, 不過我地餓死喇, 佢就叫左人幫我地買外賣, 係我指定既牛肉麵, 就係咁, 我地既第一餐係外賣牛肉麵, 好好食~~ 食飽就試衫喇, 有個女仔幫我換, 我今次帶左兩個nude bra, 一個girdle黎俾佢地揀, 估唔到佢地係揀最cheap個個nude bra, 佢地係會幫我帶埋架, 雖然係尷尬, 不過佢地應該都見慣, 所以我都唔理得咁多喇, 哈哈~

試左十幾套都有呀, 佢地真係好好耐性, 反而係我試到好攰, 幾經辛苦終於揀晒4套, 本來我話死都唔揀deep v, 但試完男友又話要揀呢件, 分明要我自暴其短, 激死~ 試完後就走了, 由於佢地近台北101, 我地就搭捷運去, 不過去到有d攰, 同埋我地趕時間, 所以就咁係附近影相就算, 當到此一遊~

之後搭捷運去龍山寺, 話趕時間因為要幫媽媽買八仙果囉, 佢要我買十包喎, 咁我又冇咩時間, 所以就定左今晚, 順便去埋華西街夜市! 呢度係艋舺既拍攝地點, 之前黎兩次台灣都冇黎呢個夜市, 今次黎一個未黎過既地方, 感覺開心好多, 哈哈! 華西街夜市都幾靜, 我地入左一間鋪頭食燒海鮮, 係一對公公婆婆開架, 我比較鍾意呢d殘舊鋪頭, 果然d野好好味呀, 冇揀錯! 出到去廣州街夜市, 熱鬧好多呢, 終於食左台灣腸, 另外仲飲埋排骨湯, 夠飽囉, 本來想去埋西門町, 但男友話好攰, 聽日又要早起, 所以返酒店!

我不嬲係夜鬼, 返去前係樓下7-11買定茶葉蛋上去做宵夜, 哈哈!!

我地既第一餐, 外賣牛肉麵, 正!

呢條裙我好鍾意隻色~

到此一遊~

買左15包八仙果, TWD150一包, 呢度幾百蚊港紙, 仲要冇得收返架!

黎到華西街夜市喇~

呢間公公婆開既店, 雖然好殘舊, 但係好正架!

個爐幾特別, D蝦好新鮮好好味!

D蜆都好正呀!

出到去買左第一條台灣腸, 不過一般~

我地既房, 而家D酒店興透明廁所, 好彩呢間有門, 仲有簾, 雖然同男友黎, 但我地都唔鍾意向住對方大解嘛!