輪到婚紗禮服, 好多同期既人一早book晒, 而我一直都拖住呢個item冇理, 因為又係有熟人囉, 我表嫂年頭同朋友夾份係銅鑼灣開左間婚紗店, 其實主力係sell影相, 佢地個攝影師又真係幾掂, 不過我冇多餘既錢再搵佢影了! 早排問過佢, 同我同期既b2b都book晒了, 我係咪應該上黎睇下, 佢話唔駛咁急, 等冇咁熱先啦, 放心啦, 一定搵到靚靚衫既, 咁我就諗住去埋台灣返黎搵佢! 終於....琴晚同男友過左去搵佢喇!!
佢地間鋪叫LEGEND HOUSE, 係CWB百德新街, 原來附近都有好幾間婚紗鋪, 我估係呢區既價錢都唔平, 所以上去前係有少少擔心, 始終有人提過唔好乜都搵熟人, 尤其去到錢方面, 如果佢開天殺價我點算?? 上到去覺得好舒服, 表嫂帶我睇佢地既衫, 其實唔算好多, 可能始終新開, 佢首先就問我鍾意閃閃誇張個D定簡單D, 我話簡單D, 佢話咁就好, 因為佢地多數都係簡單款, 結果一睇之下, 又真係好多都鍾意!
自問試婚紗晚裝其實都經驗豐富了, 第一次影PRE-WEDDING係百利玩過, 個陣已經試過十幾套, 去到台灣又試左十幾套, 真係乜款都俾我試晒, 大概都知自己適合咩款, 男友一眼就睇中左件婚紗, 難得地我都覺得鍾意, 係比較簡單同埋yound d既款, 我之前試過心形胸, 美人魚款都唔太適合, 一試呢套就鍾意了, 唔駛落鋼都好挺, 又唔會太誇張! 表嫂叫我試多幾套比較下, 不過我好懶, 試多兩套話唔試喇, 都係覺得第一套好d, 所以婚紗話咁快就搞掂hold起先!
輪到晚裝, 佢知我鍾意紫色, 係第二度拎左件俾我睇, 原來係有客人hold起準備拎去改, 佢隻紫色好特別, 唔算係好sharp既款, 下面全部係紗, 又係唔落鋼都好挺, 好簡單既款, 咩都唔理又hold左先, 其實係表嫂叫我鍾意就hold, 有新款會send相俾我, 鍾意可以隨時上去試同轉, 自由度好大呢!! 之後試左件桃紅色, 佢地話我襯桃紅色, 咁我都知, 可惜個款我麻麻地鍾意, 同埋我唔想咁sharp嘛, 所以冇要! 再試另一條旗袍, 其實本來話唔試, 因為一睇就知唔o岩, 咁佢地死都要我試, 好啦, 如我所料, 拉唔到拉鏈, 不過著出黎出奇地好睇, 後面係一個大露背, 即係唔著得girdle, 其實呢個款好多間都有, 不過我又真係幾鍾意, 原來我著旗袍都ok架, 著得我好瘦個下先開心嘛, 男友係十萬個鍾意, 話一定要hold呢件, 結果又hold左!
之後佢地不停拎俾我試, 我一早講左唔鍾意一層層個d蛋糕裙, 佢地又係拎埋俾我, 係淡黃色, 都係著得好瘦, 男友鍾意架, 不過我自己麻麻地, 另外有件類似雅典娜個d款, 著左上身佢地話我好似保護色咁, 同d膚色太似, 所以唔得, 另外我見到有一條紅色幾靚, 睇落似皺紙質地個d, 主要係鍾意個裙尾, 著左上身都好鍾意, 不過又係紅色, 冇理由兩件紅色嘛, 佢仲有件紫色架, 但係紫色感覺又唔似新娘晚裝, 所以冇得揀呀, 我叫表嫂留意下新貨, 我鍾意呢d裙尾, 如果有第二隻色就好喇!
就係咁hold左幾件就唔試了, 真係試到出晒汗!輪到男友, 佢地禮服唔多架, 本身男友打算租1-2套, 表嫂拎左件新既黑色俾佢試, 老實講, 男禮我真係唔識睇, 所以男友自己睇返啦, 佢好似有研究多d, sorry, 幫你唔到!
之後表嫂都俾左幾套佢試, 又真係第一套好d, 再試埋白色, 又係好快就hold左先, 反而要諗白色上身襯黑色褲怪唔怪, 表嫂話好多人都係咁, 因為懶得買多對又要帶多對白皮鞋, 不過佢會俾埋白色褲我地, 仲有handmade既bow tie, 睇過d相真係好特別好靚!!有個中年女人黎到, 原來係專業改衫嬸嬸, 個樣又真係好似個d上海專業裁縫咁, 咁佢地傾梗計時, 我就同男友密斟, 男友好鍾意呢度, 話佢地d褲型真係靚d, 質料又好好多, 所以都決定租呢度! 表嫂開價喇, 佢一開始拎住張紙寫住$6800 - 1婚紗2晚裝, 之後當然係俾左個親戚價我地租1婚紗3晚裝2男禮, 呢個價錢可能係好多間都租到好多件, 不過係呢度租真係超級特惠價, 表嫂有介紹過佢地既衫, 佢好多都係外國訂返黎, d料真係好靚, 之前係百利試個d真係冇得比, 呢度呢d唔駛落鋼都好挺, 仲要係好輕身, 著上身好舒服, 表嫂話其實我唔駛著girdle, 因為佢地既衫係nude bra就夠, 外國d人都係用nude bra, 事實上之前我加拿大表姐結婚, 佢地又真係冇人用girdle, 咁我新買個girdle點算呀??
落左一半訂金, 佢有新衫到會通知我, 我鍾意的話可以打俾佢約時間上去試, 之後坐係度傾計, 佢話我男友件恤衫好唔掂呀, 件恤衫係我地第一次影時係百利純美新娘度買架, 個次我地係佢地度租衫, 男友冇恤衫, 咁佢地拎左件新既俾男友試, 試完話呢件o岩, 咁就買左喇, 都唔平架, 咁表嫂拎左佢地訂造個間既恤衫俾我地睇, 真係差好遠呀, 兩件拼埋一齊我地覺得好瘀呀, 人地個件厚身d, 挺d, 有暗紋, 男友試左上身真係好鍾意, 搞到好想即刻掉左而家個件, 仲有佢話個件根本唔o岩男友著, 個領位係鬆架, 不過男友話佢之後係荷里活都買左件好d, 咁當然冇佢地個件咁好, 但都好過係百利純美新娘度買個件囉, 人地又有袖口鈕, 原來買恤衫都唔係咁簡單! 表嫂又冇講訂造恤衫幾錢, 但一世人一次, 我地都預左會訂造, 估唔到表嫂話佢到時會訂造一件送俾我男友, 嘩...真係好開心呀, 咁佢都話, 其實真係著一次, 如果你之後唔要, 可以俾返佢放係度俾人試衫用, 咁都ok吖!
仲有講下佢地d褲, 佢話好多客會返黎搵佢地訂西褲返工用, 因為佢地d褲型好過好多間, 唔係一般個d蘿蔔褲, 男友好認同, 同埋佢話著得好舒服, 又好fit身, 呢d...我又係唔識咁多啦! 我地真係傾左好耐計, 佢地仲有講金都個d衫真係唔得, 價錢又唔平, service又唔好, 佢地真係行一次已經唔想行! 我同佢有提過cocoon, 佢話佢好多客係cocoon租衫, 但好多返黎都話唔upgrade根本揀唔落手, 有d係佢地影完相直頭改左係度租衫, cocoon就轉俾其他人, 咁又唔出奇, 今日問個富貴同事, 佢係cocoon租四套, 要成萬八蚊呀, 痴鬼線!!
大家係咪奇怪點解我冇影相? 因為...我唔記得左囉, 事緣係我地本身遲大到, 差唔多遲左一粒鐘, 明明試之前我都記得要影相, 點知一試完又好興奮, 同男友一直係咁講, 講到唔記得左, 我又驚阻住佢地收工咁, 所以拿拿聲就換第二套, 就係咁我地一張都冇影到, 不過唔緊要, 下次我一定會記得!
上去試衫同埋傾計搞左成三粒鐘, 我地好肚餓, 就拿拿聲走了, 一落到去我問男友覺得點, 佢好開心呀, 一黎學識左好多野, 二黎佢好鍾意d衫, 仲有佢覺得好抵, 本來佢budget係一萬蚊內租晒我地兩個既衫, 黎到佢見間鋪既位置同埋隔局, 預左要萬幾蚊, 估唔到而家係budget內仲有多餘錢剩, 咁我地又搞掂一樣野喇!!
