車厘茄病了

嗚嗚...種左兩個月既車厘茄唔知咩事病左, 之前佢d子葉黃左, 有d仲枯左, 後尾問人話子葉係唔緊要, 點知而家真葉都出事喇, 唔知點解起晒黑點, 上網問人又冇人識, 琴晚返到屋企見到有d葉黃埋添喇, 真係唔知點做, 把心一橫, 將有問題葉全部剪晒, 而家棵茄好光允允喇, 都唔知剩返個d葉會唔會都係咁, 又唔知原因, 嗚嗚~

博藝會新裝修

上星期五放工同男友去左博藝會拎coupon, 因為之前落訂佢地唔記得俾我地, 所以等到而家先去拎, 順便睇下4M個新裝修, 佢話幢門好多人投訴, 所以換左, 另外門口天花加左好多水晶吊飾, 之前個假暖爐拆左, 變左一塊茶色鏡, 成個門口清左好多, 光猛左好多, 而樓梯盞燈都換左, 除左幢門我覺得好睇左 (因為之前個個真係幾娘), 其他我都冇乜特別感覺, 不過個晚都幾多閒人出入, 仲以為下面個層多閒人, 原來呢層都好多架, 好多都係小朋友上d興趣班經過, 希望我結婚個晚唔會有咁多啦!

backdrop方面, 佢話出年七八月轉, 咁即係我仲未知搵唔搵佈置, 點算好呢? 冇理出年八月先搵架嘛, 定係我搵定先, 到時backdrop唔掂先叫佢搞? 真係煩!

呢邊好似同以前差唔多~

門換左, 天花加左水晶裝飾~

冇左個假爐, 成個位清左~

樓梯既燈~

又多一隻小紫王

話說養左屋企隻小紫B後, 同男友簡直好似多左個仔咁, 佢返屋企都剩係掛住叫佢唔叫我, 又成日玩佢喎, 吊住粒芝士引佢, 搞到係咁跳好辛苦先有得食, 冇諗過佢會咁鍾意喎, 而我平時每晚返去掛住打機, 而家都變左同佢玩, 生活轉變真係大左, 既然我地兩個都鍾意, 於是我決定....領養多一隻返黎, 哈哈!!

話咁快就搵到, 其實真係好易搵, 係我n年前咁stupid走去買, 如果各位都想養小動物, 不論係貓狗鼠, 不妨先上各大forum或愛協睇下有冇得領養先, 被遺棄真係好慘架, 呢排上網睇得太多, 個心都好唔舒服!!

新養既都係小紫王, 不過唔係BB喇, 成四個月大, 係女仔黎架, 問返屋企隻B既前主人, 原來係10/7出世, 而呢隻係20/4出世, 相差三個月, 雖然我會一籠一鼠, 但聽聞佢地聞到有其他鼠, 都會識得呷醋, 希望佢地唔會啦!!

第一晚黎到屋企, 佢兩個互相聞, 好好笑呀, 未諗到叫佢地咩名, 暫時叫佢地阿仔阿女算喇, 阿女好大隻呀, 大到有d嚇襯我, 上forum睇返, 有人領養同一批倉鼠, 幾日後生左一堆BB, 搞到我而家好驚呀, 佢又咁大隻, 唔通真係有左BB?

佢地初次見面既一刻, 好好笑呀!

分享毛毛處理

呢期好多人講脫毛, 之前我都團購左兩間, 另外join埋musee, 等我都分享一下先!

首先係musee做underarm, 我都去過兩次了, 俾我既感覺係環境舒服, 而且唔hardsell, 佢地似係想"薄利多銷", 不過真係幾難book, 好彩近我公司, 時間上我可以就到, 如果真係要等放工後, 應該起碼排三個月! 而做左兩次後, 我d毛毛真係生少左好多, 同埋新生出黎既係幼左, 基本上我都冇自己再剃, 因為真係唔多覺, 不過網上睇到好多人都話做左幾次都係冇少過, 所以我都問左幾個身邊做過既人, 佢地都話生少左喎,不過musee真係比較慢, 可能係彩光既原因, 但另一好處係唔痛, 我幾滿意, 如果佢地做手腳都唔貴, 遲下都可能會join埋!!

第二間係秀身文化做小腿, 之前我分享過一次,呢間係團購買, 包6次小腿, 佢寫住基本上做6次就唔會再生, 同埋係laser, 所以會痛, 不過我都幾唔鍾意呢間, 我係去佐敦個間, 估唔到佢地咁出名, 原來間鋪咁細, 其次係非常hardsell, 係我等候期間就見過佢地點sell一個女人join facial, 而我好好彩, 佢只係問過我一次有冇興趣做打個d唔知咩針, 類似係整容個d, 打左個鼻高d, 塊面瘦d個隻! 第二次去, 我已經好醒目叫男友較o岩時間打俾我, 而個次真係時間剛剛好, 我一做完出黎, 個女仔好似想sell我, 問我之後去邊, 我話...約左男朋友呀(當然係講大話), 電話就即時響起, 我就話男朋友打黎催喇, 一路講一路走, 哈哈!! 而效用方面, 可以話係一d用都冇囉, 正常黎講做完會有d毛毛脫落, 我搵唔到有囉, 仲有佢地唔係每個位都打, 真係勁求其, 仲有4次要上去, 其實都有d唔想去, 但冇理由蝕架嘛, 可能做多4次會有少少用卦, 但呢4次都要搵男友夾計俾我易d逃走!!

第三間係reveiler做上唇, 其實佢地間野叫star house, reveiler係個牌子, 呢間直頭係公司隔離, 非常方便, 上到去感覺幾舒服, 都好似幾多人做facial, 我最鍾意係等候期間留意下d客人, 我見d客好似幾滿意既樣, 同d staff好熟咁, 佢地係用e-light, 我都唔知係咪算laser, 有輕微既痛, 做完仲會幫我敷返野cool down, 佢地有獨立房, 都幾舒服, 做完後個女仔話我個團購仲有張coupon, 加$80可以做一次facial, 由於我都想搵間做facial, 覺得佢地幾舒服, 所以就加左錢, 只係$80當試做, ok啦!! 第二次上去做, 順便做埋facial, 感覺幾乾淨, 用既料都唔似係cheap野, 呢$80仲幫我做埋碌機, 幾好喎, 個一刻我個心已經諗住join佢地facial架喇, 因為好過我做梗個間! 做完後個女仔就講下佢地既package, 比我想像中平好多呢, 佢地係用劃格仔形式, $100一格, 每次最少用兩格, 每一格有好多選擇, 做面做眼減肥等等, 自由度好大, 計起上黎即係做一次facial係$200, 仲可以碌埋機, 我覺得幾抵, 而美容院多數都係要俾錢先架啦, 佢地最少要買30格, 於是我就乖乖俾左三千大元了, 其實佢仲有叫我買50格, 可以再送reveiler既護膚品俾我, 不過我一口拒絕左了, 佢都冇再迫我, 個女仔幾好禮貌既, sell還sell唔會迫你, 好過秀身文化十幾倍! 至於腳毛既效用我未留意到, 因為本身都好短, 佢有冇脫落我真係留意唔到, 唯有遲d再留意下!!

我的新寵-小紫B

最近又比較忙呀, 不過係自己攞黎, 首先係PATPAT痕走去做農夫, 屋企而家已經有六盆野種梗, 四盆蕃茄仔一盆椒仲有盆通菜, 種野之餘仲玩埋養寵物, 哈哈!!

事緣我早幾年養過小露寶倉鼠, 到最近發夢見到佢地, 所以又想養返, 其實我好怕養寵物架, 因為驚佢地死個時會好傷心, 尤其係倉鼠壽命得2-3年, 但我又好想養, 換個角度諗, 就等佢呢2-3年在世時間俾我錫佢啦, 本來諗住去寵物店買, 但發現原來forum都好多人俾人領養, 其實除左鼠, 好多貓貓狗狗都等梗人領養, 最衰我係驚狗, 如果唔係都會領養, 見到佢地個樣, 同埋知道佢地既故事, 覺得佢地真係好可憐!!

係forum留言左兩日, 終於有個女仔話可以俾我, 佢之前執左幾隻返黎, 點知冇耐其中一隻生左十幾隻出黎, 佢養唔掂所以要俾人, 佢話有小紫王BB同埋小灰霸BB, 最後我揀左小紫王BB, 其實我都唔知有咩分別, 剩係知道當年我養既小露寶係出名跑得快同埋唔俾人掂!

13/8終於領養左小紫B返黎, 係男朋友放工專登過去藍田拎, 個女仔話小紫B係10/8出世, 其實唔知佢有冇講錯, BB唔係要食奶架咩? 遲D要問返佢!!

我一早已經係淘寶買晒D籠同埋用品返黎, 小紫B好細隻好得意呀, 不過我唔敢抱佢, 驚整痛佢同埋嚇襯佢, D人話要等佢適應新環境先好搞佢!!

呢幾日我地好似多左個仔咁, 返工又會諗住唔知紫B做梗咩呢? 會唔會熱襯呢? 夠唔夠野食呢? 一隻倉鼠都咁, 第時真係生左小朋友唔知點算!! 而家我同男友仲成日爭住同紫B玩, 估唔到佢又會鍾意, 最初仲驚佢唔想添, 而家多左隻紫B更加忙喇, 我地一返到屋企就爭住睇佢做梗乜, 真係好似多左個仔咁呀!!

佢瞓襯覺都好似個波咁架!

最鍾意食芝士, 瞇起眼食得幾開心!

財赤+沒有FACEBOOK

今日都算係黑仔, 首先見到張月結單五位數既卡數, 主要原因係媽媽搬屋, 男友既生日同埋台灣既酒店, 呢個月仲要剛交左五千幾蚊既保費, 戶口數字真係直線下降, 開始好擔心唔夠錢去旅行同埋搞結婚!

第二樣黑仔係公司突然BLOCK左FACEBOOK, 真係成個人DOWN晒, 呢排同各位2012 B2B 傾得好開心架嘛, 搞D咁既野, 佢地仲想連MSN都BLOCK埋, 有冇咁慘呀? 本身係度做都好開心, 因為好FREE, 我地自己上司知我地上網都冇管我地, 佢話只要我地做晒野就可以, 唔通真係冇野做要我地係度呆坐咩? 呢度返工已經要打卡, 最慘係連LUNCH都要打, 十足十人地工廠個D工咁, 年假又少,真係好少聽到返OFFICE既工係要跟足勞工法例囉, 即係一年得七日大假, 放病假都要扣錢, 除非你有連續四日既醫生紙啦, 我係度做左三年幾, 幾辛苦先可以到今年有九日大假, 真係病都要死返黎, 而家連唯一開心既野都要剝削, 好彩佢剩係BLOCK FACEBOOK, 如果連其他網頁都BLOCK晒, 日子真係唔知點過!

今日先係第一日, 平時FACEBOOK既時間唯有用返黎睇結婚野啦, 但真係得個睇字囉, 好窮呀, 放工同男友講我財赤, 佢問我夠唔夠錢洗, 個一刻好感動呀, 不過冇理由因為你生日搞到我財赤, 而家又問你攞錢用, 同埋暫時係夠既, 只係心痛個戶口突然少左咁多錢, 黎梗呢兩個月真係要勁慳先得喇!!

訂婚戒

由於男友想帶對婚戒去台灣影相, 所以我地而家就開始搵喇, 本來佢諗住去返佢買求婚戒個間, 即係我朋友既公司, 因為佢話上次揀戒指時已經睇中左, 咁我地就諗住上去睇下, 我朋友晏晝話其實佢地公司好少婚戒款, 不如俾左d相我睇先, 費事我專登過去, 咁好啦, 佢就send左俾我, 講真我冇乜款睇得中, 後尾再知道男友睇中邊對, 個對我又麻麻地鍾意, 真係話睇得上眼只有兩款, 不過佢地公司又冇現貨, 我地約左下星期上去!!

之後我上網搵下, 又俾朋友提醒左, 有間係百利ADIAMOND都好多人幫襯, 呢間之後男友都提過, 佢話佢朋友都係叫佢去呢間, 網上comment都好好, 仲有d款式好特別, 最緊要個個都話唔貴, 本身我budget係$8000內, 我男友係話$10000內, 因為我都冇打算要石, 同埋粗帶唔想買咁貴, 咁呢間好似唔錯, 就約左男友放工一齊去睇!!

開頭仲驚會好多人, 點知好好彩, 七點半去到冇人呀, 店主係一對小夫妻, 佢地真係好nice, 一坐低我地係咁話試呢對個對, 放到成枱都係戒指, 哈哈, 佢地又好好喎, 冇黑面, 仲笑晒口話唔緊要, 唔試過點知自己鍾意咩, 或者諗到咩款都可以俾佢地造, 真係超級好人!!

本身我對婚戒要求係: 1. 同男友一樣  2. 唔要一排石  3. 唔貴  4. 有feel   而男友對婚戒要求係: 1. 冇石   2. 簡單   3. 唔貴
我地試左十幾款後, 開始out梗d款, 有d佢鍾意我唔鍾意, 或者我鍾意佢唔鍾意等等, 試完之後, 我知道自己真係唔鍾意一排石, 反而鍾意三粒or五粒既石, 而男友係一定要磨砂面!

搞完一輪, 我地終於揀定左喇, 男裝會同相既一樣, 不過底粒石會變做紫色, 女裝既面同男裝都係一樣 (睇下我幾就佢), 底個粒都係轉紫石, 而我地另一邊跟相一樣, 男既係一粒藍, 女既係三粒紅, 我同佢講, 紅加藍係紫色吖嘛, 底個粒整紫色啦, 哈哈, 老屈佢一齊有粒紫色石係戒指!! 而刻字方面, 一邊刻名一邊刻日子, 我覺得呢對戒指好特別呀, 真係獨一無二, 起碼d字都唔同先, 最緊要係唔貴吖嘛, $7900/對, 真係係晒我地budget內, very good!!!!

九月中佢會叫我地試手, 十月前會俾我架喇, 另外仲叫我地諗下裡面刻乜, 因為個內環我轉左做扭花, 未必夠位刻咁多字, 佢提議我地刻中文, 因為面都有英文, 咁刻中文可以再特別d, 我地考慮中呢!

總括黎講, 呢間真係好得呀, 我地玩左個半鐘, 佢地真係好好耐性呢!!

男友一見到皇冠款就鍾意, 最奇怪係有石佢都鍾意!

呢邊會一樣, 三粒紅同埋一粒藍

呢個位我地會一齊轉紫色石, 另外戒指面我會跟佢一樣五粒石!

Upgrade後感

upgrade左兩日, 真係發現好多問題, 唔知其他人有冇, 首先"私有化"個問題上次講左, 我用左幾粒鐘去每篇改返, 之後個版面冇以前咁可以揀位, 揀幾多欄, 揀顏色等等, 我搞左成日去每個掣試下, 原來yahoo都未搞掂晒就俾人試用!!

佢而家搞到好似facebook+微博咁, 可以add為朋友, 另外又可以關注人地個blog, 又有相簿, 唉....blog咪blog囉, 搞咁多做咩, 仲有之前blog既"誰連繋著我"同"最近訪客"都冇左, 我去返舊版面睇返呢兩欄, 內容已經係upgrade前既野, 最近訪客都已經係之前既訪客了! 仲有好似成日有bug, 有時click入自己blog睇內容, 又會彈出"未有新post", 想點呀??

琴日整個background整左半日, 因為原先佢俾我揀既主題我都麻麻地, 最慘係....冇得改色, 仲有你揀呢個主題, 就要係限死兩欄or三欄, 好多限制呀, 最最最唔開心係冇左個count down呀, 唉, 入人地個blog又冇以前咁方便, 仲有係唔知人地幾時有新update, 我add左百幾人, 係咪要我每個入去睇下先? 而家仲要舊blog同新blog根本係兩個星球, 睇梗新又去唔到舊, 未upgrade既會寫"無此人"囉, 要睇既我又要走返去舊版面, 仲有一個大問題呀, 就係"回應", 首先係冇公仔揀, 仲有如果你係"私人回應", 版主回覆你, 你係睇唔到架囉, 只可以係email睇到人地答你乜, 個blog都係會顯示"私人回應"(即使回應既人係你自己), 好低b呀, 即係你一係唔好私人回應, 留左私人既話只可以係email度睇返版主reply你d咩, 咁我係咪唔可以delete email呀? 

仲有....每次save任何野都好慢呀, d名又唔同晒, 俾佢搞到人都癲!!! 

種車厘茄 - 六星期進度

六星期喇, 放左出花槽, 但反而冇乜大過, 好彩仲未有蚊同蟲既出現, 開始擔心四盆大晒點算, 仲有盆椒黎梗, 大得超慢, 所以唔update喇, 個四盆茄可能要俾一兩盆人喇!!

人up我又up

呢排個個既blog都寫yahoo upgrade, up左既人係咁話唔好, 未up人又話死守, 點知轉頭個個都upgrade, 我梗係唔執輸啦, 哈哈!!

剛剛upgrade完試寫新blog, 唉, 真係好多問題, 之前私有化既blog變晒"只有我"睇到, 咁我咪要每篇改?? 120篇blog有八九成係私有化, 又要用一段時間, 仲有個背景冇左, 又冇左上面count down,  一個朝早因為呢個blog搞到個人炆炆地, 又要摸索下點用呢個新blog, 搞左幾個字已經想爆粗, 吼~~~~

未up既朋友們, 我係睇你地唔到架, 等你地up左我地先再見面啦!!! 

To Do List - 2011

其實我都懶左好耐喇, book晒野之後冇左團火, hea左幾個月, 雖然間中都有睇下野, 但係都冇左之前既衝勁, d人問到我都係話: 出年先啦, 遲d先啦, 到時先啦...

咁又過左幾個月, 見到d blog友好似仲有好大團火, 準備左好多野, 令我開始有d驚, 咁我都要plan下黎梗做d咩, plan下咋, 未做住架, 去埋個台灣返黎先啦, 哈哈!!

八月: 訂婚戒 (去台灣影相用), 去博藝會拎返coupon同睇新裝修
九月: 準備台灣行程, 影婚照要用既野, 申請台灣簽証
十月: 出發台灣, 休息 (嘻嘻)
十一至十二月: 睇婚紗晚裝, 去婚展book mona lisa, 睇出門酒店, 結婚証書, 場地佈置 (如有需要)

暫時係咁多先, 諗到咩先加!!