我們的安樂窩(下)

30/7正式收樓, 個晚提早一日同男友食生日飯, 食完飯就衝入去拎KEY了, 不過個日我地兩個都唔舒服, 上左去一陣, 帶左把呎去度左D位就返屋企瞓覺, 之後就係忙碌既開始!

個一排不停上網睇資料, 男友就度呎, 同埋畫左個floor plan, 一齊再諗下d傢俬點擺同埋點裝修! 由於想快d搬入黎, 我唔想一邊交租一邊供樓呀, 30/7晚收樓, 31/7男友生日, 只係下晝帶左我媽同二哥一家上黎睇一睇, 1/8男友媽咪生日, 飲完茶就上去拜五角了, 收完樓2日就拜五角, 實在太誇張, 仲搵左裝修師傅上黎睇同埋報價, 呢個裝修師傅係朋友介紹架, 後生仔一名, 個人都幾老實!

我地講左大約要點整, 越講越多, 我知道佢媽咪唔多like架喇, 因為唔想男友洗咁多錢嘛, 佢想我地留返d錢快d結婚, 可能佢都覺得同居唔係咁好啦! 我地買料+裝修, 到23/9就正式入伙了, 其實都未搞掂晒(例如梳化未到), 不過最緊要係有張床俾我瞓!

總括講下間屋整過d咩:
1. 全屋油油(用ICI), 因為近海, 驚會好快潮濕剝落, 趁未入黎住都要油下先
2. 全屋鋪膠地板, 唔駛起地板所以平好多, 呢個item我諗左好耐, 呢個係最平既方法, 嘻嘻!
3. 廁所個企缸全換, 睇相都睇到, 上手唔知搞乜, d磚中間會唔同左色, 好肉酸, 同埋佢d喉係入晒wall, 有咩事真係好煩!
4. 廁所換洗手盆同鏡, 仲有原先鏡既小燈改為電掣位
5. 全屋既門改油白色, 因為愛上希臘, 我地間屋會以白為主
6. 加左幾個電掣位
7. 安兩盞燈
8. 上手用黎間房既活動板拆晒, 整返靚個天花
9. 加左幾個窗花
10. 上手既電視櫃(唯一我地要返既傢俬)油白色
11. 拆左上手廚廁既門, 因為本身係一大塊玻璃趟門, 好o徒位, 廁所門仲要冇得鎖, 同埋好大條隙望到入去, 可能上手一個人住冇咩所謂
12. 上手唔知點解整到間屋好多鏡, 可能睇落大d, 我地除左門口個塊之外(留返黎出門口照鏡用), 其他都封返晒, 男友話咁多鏡夜晚會好恐怖!

好似係咁多, 本來想加鐵閘, 但好似唔多夠位, 所以冇整, 呢度裝修費比我地想像中平呀, 只係$30,000, 可能個廚房冇整所以平d, 人地話廚廁係最貴, 咁又係, 個廁所剩係換個企缸, 佢再補防水膠同埋換埋磚, 呢度要$6,000!

傢俬又點呢? 我地就上左田貝四路, 個一排又係差唔多個個星期上去, 搭車都搭左好多錢, 但係傢俬真係平好多, 由於整地台, 香港剩係整個地台都要八九千, 咁我今次北上又有d咩收鑊呢? 睇下啦...
1. 全屋窗簾, 冇用遮光布, 驚會太黑, 所以只係用中間有一層黑線個d, 遮光ok之餘又唔會話好黑
2. 全屋膠地板, 因為平, 每塊好似係3mm厚, 唔駛起原先地板就咁鋪上面就可以, 我地仲好型咁揀左深啡近黑色既木紋地板
3. 企缸磚, 玻璃企缸門, 洗手盆連櫃, 鏡櫃, 廁所摺門
4. 兩盞廳燈
5. 係一間傢俬鋪訂造左地台, 大衣櫃, 用黎間房既房電視櫃+書櫃+向廳既酒櫃, 薄既C字櫃鞋櫃, 細細張電腦檯, 廳既吊櫃

以上既野加埋我係淘寶買既電腦椅, 廚房同房既門簾等等, 大約都係$30,000

即係全屋我只係用左$60,000就改頭換面左, 真係比我想像中抵好多呢, 間屋係我地自己設計, 鍾意可以有我想要既白色地台, 大家睇下改頭換面後既相啦!

呢張係收樓個晚影, 第一次睇到個夜景, 好開心!!

傢俬運晒黎個時, 望到間屋都頭痛!

房既地台, 呢個係門口, 上一級就到, 仲整左個梳妝檯!

入到房, 地台床隔離係我個六呎大衣櫃, 哈哈!

呢個c字鞋櫃係我畫俾佢造, 可惜佢地會錯意, 搞到每層size都怪怪地!

最貴就係呢個企缸磚, 我同男友對呢隻石磚一見鍾情, 另外花灑購自香港, 人地話大陸個d好易壞, 呢個有埋男友要求既雨淋花灑, 難得佢有要求, 點都要俾佢, 哈哈!

我地保留返中間既玻璃層架, 其他都換晒, 又係白色架!!

油左白色既電視櫃, 同埋灰黑色既木紋地板!