北上買裝修材料

原來都幾多人煩間屋既裝修, 等我分享埋點解可以平價將間屋改頭換面先!!

我地收樓後就度呎畫floor plan(費事問管理處), 再諗下點樣設計間屋, 因為我地個裝修師傅唔會幫人設計埋架, 佢只會俾意見你! 呢間屋係525呎, 實用面積其實得三百幾呎, 本身呢度係兩房一廳, 不過好多人都會拆左d房,  上手就直情拆晒兩間房添, 但係我想要返一間房, 間牆又好似o徒左d位, 於是就諗到用櫃黎間房!

諗好個設計就叫師傅上黎睇同報價, 我地都冇搵過其他師傅了, 一黎貪佢後生易溝通, 二黎佢報個價都幾合埋, 三黎覺得佢個人幾老實, 四黎我做地產既朋友誠意推介(佢地本身唔係FRIEND)!

落實後就開始北上, 主要都係田貝四路, 羅湖搭的士去會平d, 應該廿零蚊就得, 我地黃崗搭去好似要三十幾, 亦都可以搭其他車架, 不過我地上去個時係夏天, 同埋我不嬲都幾驚上大陸, 所以都係搭的士!

田貝四路主要係買裝修材料, 我個師傅都叫我自己上大陸買料俾佢, 咁樣會平d, 佢真係超老實, 哈哈!! 個度真係好鬼多, 你有時間可以周圍格價, 或者行多幾間睇, 不過我地呢d懶人, 剩係係個家合居廣場就可以睇晒, 都費事再周圍睇, 最重要既係, 你一定要講價!!

家合居1-2/F主要賣廁所, 地板等等, 3/F係燈同窗簾, 我地屋企既野都係晒2-3/F買, 非常方便!! 等我報下價先:
1. 全屋(唔計廚廁)膠地板 - RMB1323 - 香港買大約二千幾
2. 企缸磚(我地揀左貴既仿石磚, 仲係閃閃地既添) - RMB1500 - 企缸磚仲貴過全屋地板
以上呢兩樣趕住用, 所以運左返黎先, 個度好得意架, 就算係兩間唔同鋪, 只要你同其中一間講低, 佢就可以幫你group埋一齊運落黎, 運費都係收一個, 上面兩樣一齊運係HKD250(即係一車價錢)!

3. 全屋窗簾 - RMB1700 - 我地d窗比較大, 同埋用左中間有黑線既布, 呢個價錢我覺得少少貴, 不過相信都係平過香港!!
4. 兩盞廳燈 - RMB1080 - 其實都唔係好平, 不過講到口水乾都唔肯再平俾我!
5. 洗手盆連櫃, 鏡櫃, 企缸玻璃趟門 - RMB2500
6. 廁所摺門 - RMB610 - 我覺得貴, 呢個係男友有日北上工作順便訂埋, 男人都係唔會講價的!!
以上4樣一齊運, 又係HKD250

買以上既野好似上左去3次, 一邊裝修一邊買, 所以D磚同地板係比較趕, 而質量方面我覺得樣樣都幾好, 只係窗簾有冷氣個位有少少唔o岩位, 同埋個廁所摺門開關都唔順, 買野都係要同埋男友一齊上去買先得, 佢都唔會咁好心機揀同講價!!

膠地板

企缸仿石磚, 貪佢防埋滑, 現場睇靚好多架!

客廳燈

飯廳燈