北上做傢俬

寫完買材料, 就輪到買傢俬, 有個好姊妹之前都係深圳做傢俬, 不過係寶安北路個邊, 我地都諗住去問下價, 不過原來都幾貴, 所以最後去返田貝四路家合居做, 呢度其實得兩三間做傢俬, 我地做呢間好似都幾多香港人做, 問左價錢都幾抵, 上門度呎要俾HKD300, 如果confirm做佢會回返HKD150俾你!

我地俾晒D idea佢, 佢就畫圖俾我地睇, 再深圳上黎我地屋企度呎, 都幾後悔俾佢地度, 因為最後d傢俬上到黎都係唔o岩size, 要即場鋸木呀, 早知我地自己度仲慳返HKD150!

我地做既有以下傢俬:
1. 成間房既地台連床位, 我地用盡左間房, 冇留走廊位
2. 間房既電視櫃, 書櫃, 酒櫃
3. 客廳吊櫃
4. C字鞋櫃
5. 電腦檯
6. 梳妝檯
7. 六呎大衣櫃

第一次上去佢用size計完條數, 佢話用高壓木, 而家多數公司都係高壓木, 報價係一萬八, 但我男友想用夾板, 因為實淨d, 不過夾板貴好多呀, 計完出黎差唔多貴左成萬蚊, 咁我地就走左, 去我朋友幫襯寶安北路個間, 佢都係高壓木, 不過就厚好多, 佢地剩係計個地台, 衣櫃同鞋櫃已經要萬幾蚊, 所以我地已經決定返家合居幫襯!!

諗過度過, 我地最後決定淨係地台用夾板, 因為地台承重太多, 搵實淨既木好d, 埋單條數好似係二萬頭, 等我返去搵返張單再上黎報告!

佢地做好左會打黎約你上去佢地廠睇, 冇問題就安排運落黎, 好似用左兩三個星期佢地就做起左, 只係我男友上去睇咋, 因為好似都幾遠, 夾板同高壓板既廠係唔同, 所以要去兩個地方, 男友仲影左d相添!

一直都好地地, 不幸既事開始了, 首先約好左某一個星期六送貨連安裝, 叫左佢地一早黎, 我男友專登請假架嘛, 點知中午都未到, 打去佢地話咩過關等左好耐定扣關之類, 再等到三點幾, 又有唔知咩藉口, 到四點幾我已經發晒脾氣, 男友又搞笑喎, 人地講乜佢都哦哦哦, 四點幾都未黎, 仲要安裝, 今晚想搞到幾點? 於是到我出馬(呢d醜人都係要我做), 打上大陸一輪咀狂鬧, 佢地幾個字後即到了!

得兩個人係度裝, 七點幾我地仲要買飯盒服侍佢地, 到夜晚十點都未裝完, 佢地話聽日再黎喎, 結果當然要俾佢地走啦, 無端端又要俾多日佢地, 星期日係唔俾鑽野架, 俾人投訴都唔知點算!

到星期日, 佢地十點幾就到, 結果裝左一日, 仲要發現其中一個鞋櫃門做錯左, 另外酒櫃既玻璃又爛左, 下星期又要再上黎喇! 我仲要趕住過幾日入伙, 結果又要俾多一個星期六佢地上黎執手尾, 真係嬲爆呀!

總括黎講呢間野點呢? 傢俬係ok的, 我地都預左過幾年有小朋友就會換樓, 應該可以用到幾年, 不過安裝既工人就有d求其, 可能太夜佢地又趕住走, 真係裝得好求其, 不過睇落去冇乜野就算了, 呢d真係叫一分錢一分貨!!

大陸傢俬間廠, 夏天咁熱真係唔想去, 男友一個人上去算喇!

另一邊, 唔知點解冇乜人~

我地張電腦檯, 佢寫個d字, 真係好難抹甩囉!

地台上既梳妝檯, 因為上面有窗, 所以只可以做揭蓋式既鏡!