3rd Pre-wedding (Majesty) - 揀衫

琴晚同男友放工去左Majesty揀衫, 準備六月中影相, 我地個coupon係$688, 包一件婚紗或晚裝同埋一套男禮, book左七點, 佢地地點係上環, 放工去到都七點四, 一入鋪要除鞋的, 感覺好似幾舒服, 有一pair人揀梗相, 佢話我地每人可以試四件, 之後就俾左d相我地睇!

serve我地呢位原來係化妝師, 佢話冇job就會返黎幫手, 之前我揀左影中西區, 咁佢就俾左d中西區既相我地睇, 仲問我會唔會加錢影埋夜景, sell左幾句話夜景好靚呀等等, 咁我都話其實我已經影過兩次, 所以唔駛了! 之後揀衫, 呢度選擇唔係好多, 仲要係拖尾就要upgrade, 加$300, 咁我張coupon都係$688, 冇理由加$300姐, 於是揀d冇拖尾囉, 想要個d又話俾人租左, 是但揀左兩件試, 之後就睇晚裝, 選擇多d, 不過都係幾難揀, 又揀左兩件試, 試晒四件後, 有一件婚紗同一件晚裝都ok, 諗左陣都唔知點, 不過講真婚紗真係有少少厭, 所以我最後揀左晚裝, 係一件金色歐陸式既晚裝, 好有公主feel!

男友又揀四套試, 之前兩次佢都係著黑色影, 咁我叫佢試下其他色啦, 佢就揀左, 白, 黑, 藍短, 銀, 白色個套太大件, 佢話件褸冇得改, 即係唔駛揀啦, 黑色就正正常常, 藍色短褲佢話想試下, 點知諗唔到襯咩鞋, 最後揀左銀色個套, 即係我地會一金一銀去影, 哈哈!!

佢唔俾我地影相, 所以冇得影上黎俾大家睇, 唯有等睇相啦, 另外佢都有少少煩, sell完我地影夜景, 又sell我地租多件, 話影3個鐘, 可以換下衫架, 第時影完你見到d相咁靚, 就會後悔唔影多套衫, 咁我就話, 婚紗晚裝我屋企都有, 一係我自己帶去影啦, 估唔到佢又ok喎, 講真, 我揀一套黎影都咁辛苦, 你仲叫我揀多套租, 真係咪玩啦!

我地個package係包20張softcopy連dvd, 另外有本細相簿(10張相), 佢又話我地可以加錢轉大相簿, 點點點呀, 佢對佢地個攝影師都幾大信心, 成日講到佢會影得好靚, 咁我都係話, 睇左相先算啦!

走個時都八點四, 揀相個pair人仲未揀完, 我都好擔心到時我會揀幾耐!

重返地獄

過左生日都成半個月, 但係生日飯就食到琴晚都仲有得食, 冇辦法, 香港人多數都好忙, 要就時間唔係咁容易, 齊人出到黎已經係好好! 一輪既生日飯後, 就係返回地獄既開始, 話說我影完第一輯相後, 真係覺得自己好肥, 下定決心減喇, 對我黎講運動冇用, 唯一可以做既係節食!

兩個半月後影第二輯相, 終於睇到成效, 個個都話我瘦左呀, 到生日月又放肆一輪, 而家又要停喇, 因為仲有半個月又要影相喇!

首先重溫一下我既生日飯先:

Tomo Tomo with my cousins

銓滿記with my best friend

Bostonian with my colleageus

Bostonian with my colleageus

JW Marriott with my boyfriend

JW Marriott with my boyfriend

金山with my family

鳥華with my cousin

南亭with my friends

興記with sisters

佢地都會係我結婚既姊妹, 識左就快廿年喇, 呢一晚有兩個驚喜蛋糕, 左邊係親手整, 右邊係去zoe度買, 多謝兩位好姊妹!

好喇...開心完喇, 呢d都係回憶, 有排都唔可以再咁食喇, 呢幾日直頭唔敢磅重, 見到自己個肚腩都知肥左好多, 定下計劃先:

1. 戒甜
2. 唔可以飽肚
3. 餐前記得食fancl蟹殼素(唔知有冇用, 不過成日唔記得食)
4. 忍口
5. 戒味精, 盡量屋企煮飯

祝我好運!!

同日影兩輯

真係好好笑, 一寫完上一篇話俾人話我地影咁多相, 轉頭又有朋友係我facebook個album寫: 你都影左好多次喎!!  唉...咩叫好多次? 只係第二次, 咁都叫好多, 我都唔知之後d相仲放唔放出黎好, 因為....我下個月又影喇, 哈哈!!

book左Majesty Wedding 17/6影呀, 下星期一就去揀衫, 咁問左佢話係影上晝, 我同男友都請左全日假, 就覺得唔好蝕, 幫我影第一輯個朋友話想影男友間拳館呀, 都講左好耐, 無奈拳館剩係可以俾我地平日去影, 難得今次我同男友請假, 下晝又有時間, 咁就約左下晝去影喇, 所以同一日我會影兩輯呀!!

我想問下各位影過Majesty既JM, 你地影完佢有冇要你即刻落妝或者拆晒個頭? 因為我唔想又洗錢搵個mua, 如果佢唔駛我拆, 我可以用返呢個妝同呢個頭吖嘛, 係咪好慳先? 呵呵!!

影得太多??

前排同男友傾計, 佢開始投訴我地影得太多相, 其實應該唔係佢投訴, 而係佢近排多左同d同事朋友食飯, 太多人問佢, 搞到佢有壓力, 佢話d人問做乜影咁多輯相? 你地真係有錢, 咁呢d係我男友講, 我覺得佢d朋友係覺得我大洗, 影咁多相洗咁多錢等等... 即係男友主要係話, 唔想d人覺得我地好似好有錢咁, 係咁影, 個個都話你地又影呀?

其實聽到都幾唔開心, 因為我記得佢之前已經問我, 想要隻靚d既戒指, 定係想影多d相, 咁我都係揀左影多d相, 點知而家又話我影得多! 咁我都好詳細解釋左俾佢聽, 你知唔知出面俾錢影一輯pre-wedding幾錢? 就算返大陸影都要起碼一萬啦, 我唔講台灣個輯住, 剩係香港影:
1st: THE AMOR - 朋友幫我地影, 前後用左$4000
2nd: G3 - 又係朋友影, 前後用左$3500 (連埋淘寶婚紗晚裝)
3rd: MAJESTY - 貪平影, 都冇諗住加相 $688
4rd: MONA LISA - 用酒樓coupon upgrade最平個個, 都係想要個相簿擺酒樓, 同埋想影汀九橋, 都係冇諗住加相 budget $5000內

我已經推晒所有之前搵既freelance話免費影個d, 呢度四輯加埋用既錢, 其實係等於其他人係香港影一輯既價錢, 但係我地有四輯, 仲有十幾個景點, 我覺得好抵! 我地不嬲都成日影相架啦, 個facebook我都有幾百個album, 真係唔知有咩問題!

台灣相我地budget係$28000(連機票酒店), 反正我都冇諗住結完婚即刻honeymoon(冇假同埋要等兩日先回門, 回完再honeymoon就會太耐), 呢個package又會包一晚露營, 真係好似一個蜜月之旅, 同埋之前係講左去日本影, 而家改為台灣, 其實平左之餘仲有一個難得機會既台灣露營!

我覺得影pre-wedding除左d相可以做一個回憶, 影既過程都係一個珍貴回憶, 第時仲邊會有機會咁樣出去影相? 可能太多人講, 搞到佢有壓力, 而家d壓力去左我度, 搞到我遲d有都唔知擺唔擺出黎好呀, 或者我應該係facebook度澄清: 影得多唔代表我大洗呀!!

2nd Pre-wedding (G3) - bloggers only!!

呢度俾多d相你地睇(比起上一篇), 睇到既都係我朋友黎架, 哈哈!! 我而家有樣諗梗, 就係打算會做結婚証書套, 裡面有相個d, 咁我覺得d相應該係正經d, 諗住用係studio影既相, 好冇呢??

黑底既studio!

轉左白底呀, 仲有小白同女朋友!

呢d搞鬼動作都係我fd加插, 話冇咁悶喎, 估唔到呢張係fb最多人like!

呢張我幾鍾意架, 可能濛濛地, 有加soft效果!

唔知點解呢套晚裝會深色左, 我覺得咁睇好娘呀!

觀塘碼頭

呢度係大潭, 影個時其實大風又落梗雨, 我朋友幾驚部機會濕呀!

煤氣燈街, 黎到時有隻巨型小強架, 諗起都驚, 我隔左好耐先肯放隻手上去個扶手度!

我mua june冇介紹錯呀, 呢間starbucks真係一流!

去到高街, 影左15分鐘咋, 因為已經好夜, 笑足成日, 黎張chok樣先!

2nd Pre-wedding (G3) - 收晒相了!!

等左差唔多一個月, 經我三催四請, 我朋友終於俾晒d相我喇, 呢輯相同上一輯唔同style架, 上一輯會係cool d, 感覺藝術d, 呢一輯就似返d一般既pre-wedding, 開心d, 好開心可以試唔到唔同既野, 兩輯都係朋友影, 好開心身邊有做攝影既朋友, 影個時又輕鬆d, 實在太好!!

今次個化妝師係攝影朋友既朋友, 不過都有收錢, 其實算係幾抵, 因為佢個日真係跟足我地一日, 仲有而家d相出黎, 個個都讚佢化得好, 頭又set得好, 雖然我唔like第一個婚紗頭, 但係我同佢講完, 佢之後set個d頭我都好鍾意, 諗梗好唔好俾返d相我個big day mua睇, 叫佢幫我set返類似呢d!

係呢度我唔放晒喇, 因為呢篇冇私有化, 有我facebook既會睇到多d, 另外我會開多個for blogger only!

Photo - G3 Professional Photography http://www.g3photo.com.hk/
MakeUp - Kinny Lee

好正經地係studio影!

估唔到條裙同成個景都好match, 尤其係d花呀!

影呢一張落雨好煩, 不過可以影埋個倒影, 個婚紗裙尾黑晒呀, 我洗左好耐!

呢個係我招牌惡樣黎架, 係我個fd叫我擺, 哈哈!

門牌

話說買完樓但又未收樓時, 我已經急不及待走去旺角整門牌, 呢個係我之前去二哥屋企見到架, 簡直係一見鍾情, 見到個門牌就真係有"家"既感覺, 不過都幾貴呀, 我試過上網search都冇乜人整, 唯有去返佢地做個間啦!

呢間野係旺角中心, 去到見到佢有好多野整架, 例如相架, 門牌, 鎖匙扣等等, 我已經構思左個門牌係點整, 就係要白色+藍色+有我d龜龜, 咁我都有成12隻龜龜(而家已經唔止), 原來佢係每個item計錢, 原本話每隻龜計添, 之後講下價, 要成$600呀, 我覺得好貴呀, 後尾話加$200可以整多個, 即係$800有兩個, 但係我已經整左一個, 另一個點呢? 佢話有一年限期, 我遲d諗到再整或者送俾人都得, 咁我就放低$800大元喇!

等左幾個星期先有貨拎呀, 一到個日放工仆去攞貨, 點知佢話仲係廠未送到佢鋪, 叫我行陣先喎, 有d嬲嬲地, 人地好心急架嘛, 到拎左之後, 好開心呀, 勁鍾意勁鍾意!!

而剩返個個點處置呢? 咁橋有個舊朋友結婚, 送左俾佢做結婚禮物lu!!

係咪好可愛呢?

婚前護膚計劃

早個幾星期生日, REGENE有生日優惠, 就係四件半價, 其實我都好少買REGENE了, 都係鍾意佢D PAPER MASK又平又幾好, 之後一年一次既生日優惠都係試佢D新野, 難得我呢D皮膚易敏感既人用佢又冇事, 呵呵!

男友媽咪係機場做, 成日拎到D唔同品牌既護膚品上黎(全新未開), 所以我都少買左護膚品了, 呢排就係度諗, 臨結婚前都應該要諗定點護膚, 前排搵過下D好既美容院, 不過都係搵唔到, 大家有冇好介紹呢? 最緊要係唔好HARD SELL, 同埋唔好一路做FACIAL一路同你傾計, 我做開個間都做左幾年, 仲幫襯佢既原因係平, 同埋真係好難走, 做剩四五次左右佢就已經開始叫你買定下一次既COURSE, 真係痴線的, 我有幾個朋友要走既時候都係剩返三四次, 唔想俾佢煩!

除左平仲有佢有全身按摩, 價錢仲好抵, 佢D按摩就真係好專業, 仲好過上大陸普通個D中式按摩, FACIAL方面就真係麻麻, 因為佢地用既係CHEAP野, 不過又有好既地方係會線埋面, 所以我隔個幾月就會幫襯一次, 當係做下普通既清潔!

除左FACIAL, 仲有會飲TENSE UP呀, 呢個真係好多準新娘都會飲, 因為我係FANCL VIP, 有八五折架, 好多朋友臨結婚前都走黎問我借卡用, 我就係度諗應該幾時開始呢? 因為太貴喇, 雖則話呢D錢唔慳得, 咁真係會幾肉痛嘛, 暫時想留半年時間飲, 唔好問我幾錢, 真係唔敢計!

仲有好想試神仙水呀, 呢個又係好貴, 同埋會唔會咁快用, 遲D老左用就更加冇用架? 神仙水係咪又真係咁掂呢? 有冇人有卡買會平D架?

另外如果各位B2B想買FANCL都可以搵我買架!!

魔麵@TST

繼食完鳥華, 難得男友黎tst幫我拎個行李箱, 帶左佢去試埋另一間"魔麵", 買埋張六合彩黎到都八點幾, 地方幾大喎, d卡位冇晒, 黎到客人佔左3成左右, 唔算多, 睇個menu, 款式多過鳥華, 叫左個waiter黎問佢碗麵會有d咩料, 佢非常細心講解, 首先講下佢地既湯底, 係用左150斤豬骨去整, 同埋佢話會有少少膠質, 即係好似落左花膠既感覺, 有d人會未必鍾意, 咁我又覺得ok, 所以都係揀左最基本既豚魔(豬骨湯), 男友原本想揀一樣架, 俾我制止左, 個waiter都叫佢如果食得辣可以試下個辣魔(辣味湯), 同樣係豬骨湯底, 不過會辣d, 另外我地再加左個魷魚餅!!

等左陣就黎喇, 我地兩個急不及待試左第一啖湯, 真係似落左花膠咁, 豬骨味濃, 真係好唔錯, 而男友話佢個辣湯係咸少少同埋辣少少, waiter話如果唔夠辣, 可以再加, 但男友話好夠了, 哈哈! 落order時佢地會問幾樣野, 例如駛唔駛走葱, 麵身要軟, 中定硬, 我地兩個都揀左硬身! 唯一一樣少少唔鍾意就係d麵, 佢地既拉麵唔似平時個d咁, 不過呢個好似係佢地賣點, 但我唔鍾意咁幼, 好似天使麵咁, 我本身都唔太鍾意食天使麵同米粉, 不過男友就話ok!

最有驚喜除左個湯, 仲有隻蛋呀, 真係非常美味, 如果另外要再加$10, 而正常個碗就會有半隻, 我地兩個都一路食一路係咁話好味, 哈哈!

魷魚餅都唔錯呀, 我地兩個係咁食食食, 仲飲晒d湯添, 埋單要加一, 仲要佢會唱到d錢好散, 即係想你再俾tips, 同埋呢度俾既係凍水唔係茶, 雖然話日本d拉麵店都係咁, 不過我都係鍾意飲茶!!

鳥華@TST

其實我都好鍾意食野, 仲會影相放上網同朋友分享, 不過我用既只係普通數碼相機而唔係專業個d, 寫開blog就唔爭在寫埋d飲食野, 加上堂妹請我食既一餐生日飯, 我真係好鍾意, 但係見到佢地可能係新開張, 生意比較差, facebook介紹左朋友之餘, 係度又寫下啦!

話說我想食拉麵, 地區當然揀返我地兩個工作地點尖沙咀, 堂妹搵完問我試唔試呢間"鳥華", 得3個食評但3個都係好, 話係雞湯拉麵, 咁我都好鍾意飲湯, 就決定黎試呢間!

八點左右黎到, 竟然得一個客係度, 呢度裝修都好光猛, 侍應都好好service, 首先俾兩杯茶我地, 竟然係凍茶而唔係熱茶, 哈哈, 幾特別喎! 睇下個menu, 嘩...得兩版, 拉麵款得四款: 雞湯, 味噌雞湯, 辣雞湯同埋冷麵, 我不嬲都唔食辣, 而且比較愛簡單原味, 所以叫左雞湯, 堂妹就叫味噌雞湯, 每碗麵只有兩塊雞肉叉燒加辣葱, 咁我地就另外再加蛋, 再叫碟餃子!

其實我都好肚餓, 碗麵一黎我試左堂妹個湯先, 真係味噌+雞湯, 咸少少, 到我個雞湯, 嘩...真係好正既雞湯, 好好飲, 而隻蛋都唔係普通蛋, 係溏心蛋, 不過我覺得冇咩味, 或者應該叫佢係溫泉蛋? 再食個餃子, 都幾好食呀, 而d拉麵都幾好, 我鍾意食呢d拉麵, 最後我係成碗湯飲晒, 原來都幾飽的, 好彩我冇加野咋!!

雞白湯

味噌雞湯

呢度service真係好, 話說我同堂妹都係長頭髮, 食食下個waitress擺低兩條紮頭橡筋係我地度, 我問佢有咩用? 佢話俾我地紮住把頭髮, 唔駛咁辛苦喎, 哈哈, 真係好鬼細心!!

我地坐到九點幾走, 途中都有三四檯客入左黎, 埋單時先知呢度冇加一的, 下次我一定會帶埋男朋友黎呀!!

淘寶 - 行李箱

為左準備十月去台灣, 係時候要買個行李箱返黎喇, 之前次次都係問阿哥借, 今次覺得既然我地已經有一個家, 應該要自己買返個喇!

我呢d淘寶精又點可以唔淘一下呢, 睇左一陣, 對一款一見鍾情, 因為有我鍾意既紫色, 後尾再搵多陣, 呢款行李箱賣去日本架, 原來好多間紫色24吋都斷晒貨, 26吋太大喇, 20吋又太細, 後尾已經係唔理價錢, 間間都係問有冇紫色24吋先, 終於搵到一間有喇, 價錢唔係最平架, 連埋運費都要RMB500, 鬼叫佢有咩, 千金難買心頭好呀!!

早兩日終於收到貨喇, 一拆開好鍾意呀, 隻色好靚, 我搵個時都搵左要有防撞角, 個角果然係好硬, 不過個行李身就好似好軟咁, 即係好似係普通膠質地, 咁我睇佢又全部都好評, 應該冇事卦, 另外佢d吊牌真係全部日文黎架, 大家睇下相啦!!

2nd Pre-wedding (G3) 睇住少少相先

過左半個月, 我個朋友終於有少少時間執我D相, 其實我都問左兩三次, 哈哈, 頭先佢話原來有好多, 要多少少時間, 之後俾住兩張我地吊下癮先, 好心急呀!!

黑色背景真係好型, 我地仲有影左少少白色架, 唔知幾時有得睇呢?

俾個男仔朋友話我男友似部長呀! >_<