搵龜辛酸史

話說我好鍾意龜, 之前已經諗定要用龜做結婚公仔, 好彩呢幾年有出大頭龜既結婚公仔, 前排同男友睇過都幾鍾意, 但係男友話, 想用屋企個大中小黎做結婚公仔, 屋企既龜主要係大中小同大頭龜類, 大中小係六七年前係萬寧買架, 三個size我都有買, 所以叫佢地大中小!

佢一句話想, 好啦, 我搵搵搵, 其實鍾意龜既係我, 點解係我去搵? 應該你去搵呀!!!

搵淘寶, 上yahoo search龜公仔, 萬寧公仔, 龜, 乜都search, 結果乜都冇, 打去萬寧hotline, 長期冇人聽! 咁樣都搵左好耐, 男友仲要成日扮d公仔問我: 幾時幫我搵女朋友呀? 女朋友呢? ......

其實當年我另外都買左大中小俾個時既男朋友(而家都仲有contact), 迫於無奈, 我就問佢, 會唔會仲有keep係度? 佢話之前放左係其中一個女友屋企, 之後散左冇俾返佢, 個女仔而家結婚生埋仔, 唔好搞人喇! 好啦, 即係冇...

拎住佢地, 見到個掛牌, 好彩我不嬲都唔會剪佢地d牌, 有個代理商, 於是又走上網搵, 搵到佢地個web-site喇, 睇晒所有都冇大中小呀, 梗係啦, 六七年前喇! 有一日, 搵埋佢地香港個電話, 打去問, 哈哈, 一打去我話想搵返六七年前你地公司代理個隻龜, 駁左幾次線, 終於有個女仔聽, 佢叫我留email, 幫我搵下喎, 好啦, 等左幾日都冇影, 都估到佢係敷衍我!

點知有日真係收到佢個email, 裡面有三張相, 問我係咪呢三隻, 嘩...個一刻勁興奮, 即刻覆佢話係呀, 留埋電話叫佢打俾我! 其實都唔應該太開心, 可能佢會話, 係咪呢幾隻呀? 冇晒喇喎! @@

最慘佢幾日先覆我一次email, 吊左我幾日癮, 最後佢話有呀, 但要等半個月先到, 價錢同之前差唔多, 好野, 真係俾我搵到呀!!

約左好耐終於約到交收, 大中小到手喇, 男友口衰衰又話, 多左三隻阻住佢瞓覺同埋坐喎, 頂你, 我搵得咁辛苦都唔安慰下, 仲要講呢d說話, 吼~

話說回來, 要幫佢地做衫喇, 起碼可以分到男女先, 我地將會有好多好多既結婚公仔, 希望大個隻d衫唔好太貴啦!

下一步要做咩?

book左酒席個心係舒服d, 起碼有個日子, 可以book到其他野, 又唔駛再俾人問到口啞啞!

今朝返黎又睇睇睇, 問問問, 個個都話大把時間啦, 駛唔駛咁急住搵野book? 但係我見好多blog友同我差唔多時期, 已經book晒MUA, 攝錄, 花車等等, 我而家先開始咋!

首先兄弟姊妹先, 我都唔知應該搵幾多個, 有人話要雙數, 咁計唔計自己呢? 我同男友會搵相同人數, 暫時有六個兄弟六個姊妹(包括伴郎伴娘), 咁total 12個, 但加埋我地兩個14人, 又好人話唔好意頭, 即係點呀? 我唔想搵太多人呀, 上次朋友每邊九個, 加埋新人一共二十人, 真係好混亂, 又冇地方企, 我仲駛唔駛搵多1-2個呢??

第二睇花車, 好想租倫敦的士, 但係都唔平呀, 三千幾坐一陣, 我男友話唔抵呀, 但係一生人一次嘛, 最多我自己俾錢, 哼! 原本想要紫色, 因為鍾意紫色, 但好似唔襯結婚, 唯有揀紅色系列啦, 呢d車全港好似唔多, 我驚唔夠人爭, 所以又要book左先!

第三步做咩好? 係咪要開始寫賓客list? 要計圍數預budget, 叫左男友寫個list俾我了, 都係等佢交左功課先搞!

剛剛醒起, 仲要搵返蘇師傅寫紅紙呀, 佢叫我地有日子再搵佢架, 差d唔記得左, 仲有咩漏呀? 我覺得自己已經開始有婚前xx症了...

終於都confirm場地 - 博藝會

經過一輪辛苦, 終於都confirm場地喇, 就係博藝會 - 4M宴會廳!

講返上次去睇場, 兩個都有人擺梗, 我地先去到4/F, 見到有埋會所既reception, 仲有長長走廊, 同埋好多人, 有個kelvin既人帶我地周圍睇, 由於我地擺廿幾圍, 所以帝后廳冇睇了, 第一間睇帝皇廳, 其實我之前都睇晒相, 知道係咩樣, 只係男友未知姐, 睇完之後上4M, 個reception細好多, 但我覺得ok啦, 仲有個假既火爐for裝飾, 入面樓底高過4/F少少, 不過我鍾意樓下盞燈多d, 話晒成排過都靚過一個一個圓形咁, 再問下有冇我地日子, 首先係星期六, 4/F有13/10, 排一個, 4M有8/12, 但排3個, 男友話佢想要4M多D, 4/F太多閒雜人喇, 佢想D賓客一出LIFT剩係見到我地個場!

同kelvin傾下有乜送, 網上既人都話博藝會冇乜野送, 個kelvin又企得好硬, 真係聞名不如見面, 樣樣都話唔得, 原因係我年尾同埋星期六, 個個搶梗場, 真係唔休做咁! 呢度min charge只係11萬+10%, 即係12萬1, menu又要加10%, 酒水另計, 主題婚宴$3900, 席前小食$3800, 仲要冇橙冇回門豬送, 乜叉都冇, 佢話我join晒主題同席前就會酒水七折俾我, 傾完我地話考慮下, pencil mark左呢兩日就走了!

返到屋企即刻上黎做功課, 睇下d人可以R到d乜返黎, 個個都話冇, 不過價錢平過我囉, 有d話送主題, 有d話送席前, 又或者只係一二千, 有冇爭咁遠呀? 個晚有人生日, 我地又出左去玩, 第二朝佢去左拜山, 我係屋企繼續做功課, 男友話, 就呢間啦, 雖然呢間唔係我既1st choice, 不過真係睇到好攰, 見呢度都ok就算啦!

心有不甘打俾kelvin再R野, 真係又"蟻"又西咁, 最後講到酒水六折(呢樣佢話唔好講出去, 但我知有JM都有囉), 同埋佢會送橙俾我, upgrade鮑魚最平只可以$150/圍, 佢話呢度都平左好多俾我了, 買橙平時要收$50/圍, 鮑魚upgrade要$300/圍, 真係又一次皇恩浩蕩咁! 好啦, 幫我問期啦, 聽天由命...隔左一陣, 佢話ok了, 12月8日冇問題, 個兩個都唔要, 好, 我地聽日黎落訂喇!

今日放工就去落訂, 我問佢點解個席前小食同人地價錢爭咁遠, 佢話婚展加左價喎, 呢度真係平唔到, 仲會越黎越貴添, 再R都R唔到野, 只係換黎佢既解釋, 話咩年尾既星期六呀, 又話你揀平日我咪平俾你囉, 你上網見咩平我都俾你, 好鬼寸, 因為明知我唔會揀平日吖嘛! 男友之前又話要R乜R乜, 去到又係個d是但啦, 之前又話唔upgrade鮑魚, 鮑片就鮑片啦, 去到又話計返都係十幾蚊隻, upgrade啦, 乜都係佢講, 不過算啦, 原隻鮑魚係好睇好多既!

落左$12000(有$2000係主題同席前)訂, 一個月內要再落酒席30%-$10000, 我地當左20圍計, 即係二訂要俾差唔多三萬蚊, 真係未見官先打八十大板, 不過有日子有場地, 真係舒服晒喇, 可以book其他野lu!

大日子係2012年12月8日 - 博藝會4M宴會廳

補返d場地相先, 首先係門口, 呢度細過4/F, 一出LIFT就係咁~

個場裡面, 我地join左主題婚宴(好x貴), 到時會有琴師彈三粒鐘~

呢度個台高過但細過4/F, 我到時會鋪晒毛毛地顫架喇~

另一個角度~

船景, 唔知夜晚會點~

樓梯都好靚~

新娘房紫色架, 不過我唔鍾意個地板囉, 係白色磚地, 怪怪的~

有獨立廁所~

仲有呢個假火爐~

第六次睇場 - 博藝會

今日去左博藝會睇場, 應該睇埋呢個就算喇, 真係好攰, 上網SEARCH過好多, 想睇既都睇晒!

博藝會係幾好, 個經理叫KELVIN, 佢話佢係度做左九年, 好似幾NICE, 但係企得好硬呀, 乜都唔肯送, 上網見到有D JM本身酒席已經係全單有折, 仲可以鮑片升級做原隻鮑魚, 但係佢話冇喎, 個D只係2011年, 呃我.... 主題婚宴特價$3800 (佢話原價$5800), 席前小食又要$3900, 佢話如果我兩個都JOIN, 酒水就七折俾我喎, 23圍的話就平返三千幾, 嘩...真係好似皇恩浩蕩咁, 俾七千幾蚊先話俾個酒水七折我, 我見有D JM唔JOIN都有七折啦!

有冇人BOOK左2012年博藝會呀? 可唔可以講下你地有咩OFFER呢? 我諗住呢兩日決定架喇!

第五次睇場 - 悅來酒店 (熊貓酒店)

估唔到要黎到第五次睇場, 我呢幾日個心仲係不停鬧梗同一句: 死德藝會, 害我要周圍睇! 當然個心仲係好掛住佢, 呢d咪就係又愛又恨囉, 唉...

同男友的起心肝周圍睇場後, 今晚我地又睇喇, 地點都係荃灣, 不過係酒店 - 悅來酒店, 即係熊貓酒店, 其實對呢間酒店冇乜好感架咋, 我係荃灣人嘛, 以前成日經過, 都係覺得裡面好暗, 好多大陸人, d親戚黎hk, 或者朋友屋企裝修, 都係揀呢度住, 因為平! 打左電話問佢價錢, 又ok喎, menu同美心差唔多, min charge係$170k, 酒店黎講真係好平, 就決定去睇下!

約左19:15等, 去到lobby搵人call左個sales落黎, 足足等左15分鐘, 真係有d燥, 我同男友講, 我覺得我地好似黎見工囉, 等咁耐, 話晒我地都係客喎, ok啦, 見到個sales好衝忙咁落左黎, 知你忙, 算喇!

佢首先帶左我地去7/F既Marquee, 之前上網都睇過, 好靚架, 不過我始終驚室外場打風落雨會好煩, 黎既目的係睇ballroom, 又估唔到佢俾埋我地睇Marquee, 仲要明知我地唔會擺, 因為我地係要擺廿幾圍, 呢度最多17圍架咋!

今日冇婚宴, 成層樓鎖左, 上到去原來係一個平台, 隔離仲要係公眾停車場既路, 佢話如果d客人渣車, 上到7/F行過黎就得, 之但係, 都有可能有好多閒雜人走黎喎! 開左燈, 我同男友"嘩"左一聲, 好靚呀, 因為佢地聽晚有婚宴, 已經佈置好晒, 真係好好好靚, d椅套都好靚, 仲有得揀添, 隻紫色我好鍾意, 隔離仲有個室內地方, 係洗手間, 新娘房同娛樂區, 仲有d好華麗既梳化俾人坐, 又有個bar可以拎野飲野食, 感覺好grand, 最緊要唔算貴喎, min charge只係$100k, menu貴少少, 最平要七千幾, 如果唔係佢擺得17圍, 我同bf應該都揀左!

今晚上去冇見到呢架車, 唔知係咪包埋呢?

呢度真係好舒服!

個場係咪好靚呢? 我地現場睇仲靚d, d佈置係佢包埋架, 連埋台個座燈都係!

呢度係室內個娛樂區, 我地上去個時係見到幾張麻雀檯, 唔知點解張相會係食飯檯!

睇完呢度就落5/F既ballroom, 呢度好大, 我地擺廿幾圍就要同人share了, 仲要係有兩個reception擺埋一齊, 門口係正隔離, 我地已經大打折扣, 入到去, 可能冇佈置啦, 感覺一般, 樓底都ok啦, 好似有11呎, menu最平好似六千幾, 好快睇完就走了, 因為我地都好唔想同人share場, 佢話就話塊板隔音姐, 但真係一板之隔, 我唔太鍾意, 仲要兩個reception打孖一齊擺喎, 真係唔鍾意囉!

呢度真係幾大, 但感覺一般!

張相係esd copy落黎, 另一隻色既佈置~

個reception佈置幾好, 我地上黎個陣乜都冇, 見到兩個門口就係兩個場既入口, 廿幾圍既大場係入d個個, 即係要經過人地門口先去到我地個度, 真係唔得囉!

場地問題

呢排心情都好差, 尤其係上星期, 首先搞結婚初期, 俾佢個不知所謂既ex煩, 到之後book場又有問題, 差唔多晚晚失眠, 結婚真係好煩, 仲發左我男朋友脾氣話唔結添, 佢婚又未求, 又要我睇所有野, 搞到好似係我要結咁, 唔結喇... 後尾當然佢氹返我啦, 話佢會睇喎!

難得睇中德藝會, 偏偏又租約問題唔book得, 我不停打去, 甚至email去, 依然係同一個答案, 未book得, 唔知幾時得, WTF?

心灰意冷下, 我都係要準備搵第二間, 乜都要睇下, 即係之前冇諗過既都要睇下, 包括皇上皇, 彩福(改左名叫咩宴好d), 迎囍同埋美心, 一定唔會揀既係好彩同聯邦, 實在係接受唔到呢個名, 佢ex會擺煌府, 即係呢間又唔揀得, 連同區我都唔知揀唔揀好, 一陣又話我跟佢, 真係好鬼煩!

身邊既朋友(熟個d), 唔係富貴人家, 就係小康之家, 我真係唔想搵d太差既地方擺, 當然人都要有自知之明, 出年既酒店真係out晒budget, 我地afford唔到每圍過萬既酒席, 唯有睇下其他啦!

其實荃灣美心皇宮個場真係幾好, 符合晒我地要求, 只可惜我好介意佢係荃灣美心, 因為我細個就係綠楊大, 成日落去飲茶, 美心對我黎講係飲茶既地方, 同埋真係好似屋企樓下擺酒咁, 好怪呀!! 男朋友就當然越平越好, 佢好想係美心, 當然佢話德藝會都係佢首選啦(可能係氹我)!

打去問身邊既姊妹(全部都係荃灣人), 如果我話擺荃灣美心, 你地會點睇?

姊妹話: 吓, 你問我實會話介意架喎, 你知我不嬲都唔鍾意荃灣區!

姊妹: 吓? 冇其他揀喇? 咁近....

姊妹: er....我會介意美心個名囉, 如果人地問你係邊度擺, 你話美心囉, 會唔會覺得好肉酸?


唉....當然呢3位好姊妹最尾都會話, 我地係咁睇姐, 最緊要你自己鍾意, 同埋唔會後悔囉!

我內心仲好掙扎, 當然另外有朋友話, 乜擺邊咁重要咩? 黎得飲都係你d好朋友, 都係黎鄧你開心姐, 邊會介意你擺邊呀? 說話係咁講, 可能我係個d介意人地點睇既人啦, 所以好頭痛呀!

天呀, 你可唔可以俾返個德藝會我呀??

擇日問題

呢幾日得閒, 一連寫幾篇網誌, 仲有上網搵資料, 太無聊睇埋d黃道吉日, 之前蘇師傅俾左9個星期六日我地揀, 原來好多都full, 打去叫佢俾埋d星期五我地, 咁樣多好多呢, 不過其中一日唔揀得, 因為係男友ex結婚前一日, 為免呢個女人又唔知會講d乜, 同埋某d朋友一連走兩場辛苦, 我同男友講唔要呢日, 呢日唔揀, 煌府唔揀, the one我都唔想揀, 費事人地又話我地跟佢呀, 點點點, 反而男友話唔好理佢啦, 我地揀乜我地既事啦, 又唔關佢事, 說話係咁講, 人地而家針對既係我嘛, 我最怕俾人屈, 又怕俾人講, 最慘係最後又傳返黎我耳邊!

話說回來, 今日得閒拎d日子上網睇, 嘩...適宜嫁娶得2日咋, 其他個d唔係忌嫁娶就係諸事不宜, 咩事呀? 睇完嚇左一跳, 適宜嫁娶其中一日仲要係唔揀得個日添, 即係得返1日, 但個日係星期日, 男友又唔想, 師傅俾得呢d日子我地, 係咪應該要相信佢? 上網睇到好多人話咩三娘煞, 原來一個月有六日又唔揀得, 就係因為三娘煞, 農曆初三, 初七, 十三, 十八, 廿二同廿七都係, 相傳三娘專同月老作對, 呢幾日會專門破壞新人, 所以不宜嫁娶, 講得幾恐怖, 但我又見呢d日子係有適宜嫁娶, 真係R爆頭!

其實睇返酒席full既程度, 應該好多人都冇信呢d野, 諸事不宜我都可以接受, 寫明忌嫁娶就真係唔多敢揀, 我地既選擇又少左喇!

第四次睇場 - 荔枝角裕滿人家

呢幾日上網不停睇, 想搵到一間可以好過美心, 原本星期六日想同男友去觀塘個邊睇玉桃苑同clubone, 但再諗下...觀塘區我真係會揀? 我連megabox都唔考慮, 因為唔想d親友排隊等shuttle bus後再要等lift, 所以冇去了! 見到都幾多人讚荔枝角裕滿人家, 話幾grand, 幾乎見唔到有人彈呢個場, 男朋友就話今日放工去睇啦!

去到荔枝角, 都行一大段路先去到, 好彩佢而家起左個出口直達, 行得舒服d, 去到個商場, 我地搵左一陣先搵到, 仲要見到住呢度既同事, 佢話呢個場幾好架, 佢成日黎飲茶的!

我地一去到, 樓底比想像中高, 仲有d椅全部都係好舒服個d黎架, 感覺都幾好, 個經理帶我地周圍睇, 新娘房都ok, 有獨立廁所, 不過比較暗, 會唔會好難化妝呢? 佢呢度分兩邊, 大d既係西式台, 細d既係中式台, 西式個台都幾大, backdrop都幾靚, 佢話會包埋, 仲有地下已經有白色地顫, 中式台都靚, 只係細d, 同埋個新娘房係個台後面, 出入都要拉開個backdrop部份, 好古怪!

大場佢話可以擺20圍, 如果我地23圍, 就要霸埋個細場少少, 俾埋個中式台我地喎, 咁即係L型, 我地即刻唔想啦, 因為個幾張枱就會睇唔到主場個台, 呢度d燈光都好似幾ok, 有射燈LED等等, 之後睇下個menu, 原來都唔平喎, 最平個menu五千左右, 出年應該貴少少, 不過d野食好唔得, 再貴一個menu就多一千, 即係六千左右, 未計酒水同加一, 比我想像中貴呢, 所以應該都會out!

呢度仲有樣好, 係佢會送帖, 仲要係有好多款, d款好靚架, 一定揀到合心水!!

個台同d椅都幾靚架!

中式台

收集結婚物資

阿哥就快搬屋, 阿嫂就執左d結婚野出黎俾我, 其實計落真係可以慳唔少, 首先係茶具, 佢地上年結婚前, 我同男友行金都睇飲裙個陣, 都睇中左呢set茶具, 點知到佢地大婚當日, 一見到呢set茶具即刻好興奮, 三嫂仲即時話會留返俾我添, 嘻嘻!

佢仲有俾左兩對鞋我, 一對係褂鞋, 一對係婚紗鞋, 佢話剩係著左一陣, 所以好新, 不過我都未必會著, 雖然size係fit, 不過個跟太高了, 我男友只係高我少少, 著太高會高過佢, 而且我平時都唔駛著呢d鞋, 上次做姊妹著1吋高我已經好辛苦, 唯有睇下有冇人要啦!

另一樣就係囍字利是封一疊, 有幾款添, 應該係for我大婚日派俾人, 仲有一個小花球, 暫時未知點用, 可能係場地佈置定花車? 同埋佢有一大條紗面既野, 男友話可能係花車個d佈置, 但好似已經黃左少少, 如果留到出年真係未必用到, 另外仲有兩個cushion, 係咪用黎斟茶用呢?

最後一樣係最寶貴既, 就係媽媽四十年前著既褂喇, 我一直好期待結婚當日著呢套褂, 應該都會好感動, 不過我唔知呢款係叫咩, 咩五小福, 龍鳳, 但我見得4隻野係度, 有冇人識呢?

堂妹好似仲會俾d物資我, 有紅傘同佈置用既花球, 其實仲有年幾先結婚, 收集返黎真係唔知擺邊好!

第三次睇場 - 荃灣美心皇宮

今晚男友去荃灣睇醫生, 同佢係荃灣食埋飯就諗住搭車返青龍頭, 食梗飯時又講梗酒席問題, 我話上網見到美心都幾靚, 不過我又唔想, 講講下就食完飯走去睇了!

呢度真係好方便, 當然啦, 我係呢度大, 實話呢度方便, 附近乜車都有, 我d朋友多數都係呢區, 佢d朋友多數都係青衣, 大家都好方便添, 呢個location以前係戲院黎架, 我細細個同屋企人成日黎呢度睇戲, 之後變左美心, 後尾又變過潮江春, 而家又變返美心, 真係睇住佢既轉變!

另外, 大約十年前左右, 同當時既男朋友行過呢度, 佢又係住呢頭附近, 個時我地仲話, 係度擺酒就真係好方便喇, 到而家當然唔想咁近啦, 雖然話我同男朋友已經搬左去青龍頭, 但感覺始終怪怪地!

好喇....去睇場喇, 今晚有人擺酒, 我地睇到人地既decoration, march in, 播成長片段等等, 個經理都有帶我地去樓上睇, 如果下面擺酒, 樓上係會拉窗簾, 呢度樓底真係好高, 佢地既氣氛都好好, 新娘房又有獨立廁所, 仲要比我想像中平, 當然食物質素一定好, 四大長老應該唔會有問題, 個經理都好好service, 斟橙汁俾我地飲, 仲好詳細講解呢度既環境, 有乜野送, 佢仲會送好多野俾我添, 真係好好, 係慳返好多錢, 起碼擺完酒唔駛book酒店, 直接返屋企都好近, 真係好掙扎呀!!!

灰~

最近發生好多事, 日本地震, kelly流產等等呢d令人聽到都傷心既新聞, 由於有朋友都住日本, 就算有d唔熟都會為佢地擔心, 係facebook不斷等佢地報平安, 好彩每個都冇事, 不過聽到佢地講既野, 都會幾心酸!

由於天災, 再帶出好多謠言, 話2012呢套電影係真既, 出年就係世界末日? 我諗住出年結婚架喎, 又講話日本可能會陸沉, 我諗住去個度影pre-wedding喎, 再加上想book酒席既場地, 只可以book到2012年3月, 我不停打去問, 問唔同既人, 答案都係一樣, 乜都唔知, 等公司通知, 到底發生咩事呀? 你係唔做生意早d出聲, 咁我可以死心去搵第二間啦, 已經等左差唔多一個月喇, 有網友話去完wedding expo, 個sales話可能到2012年先知添, 有冇搞錯呀?? 咁我點book其他野呢??

一連串發生既事, 搞到我呢幾日好灰, 做乜都冇心機, 我應該點做呀??

1st Pre-wedding (The Amor) 收晒相了~

今日朋友專登走黎尖咀俾隻碟我, 其實都過左六點, 不過好心急睇相, 走返上office睇左先, 佢整左六十幾張俾我, 有原size同埋整細左既size方便我放上facebook, 不過就有埋佢地logo, 幫佢地宣傳下冇咩所謂既!

放晒d相上去, 收返黎既comment真係好不一, 有d真係彈到好差好差, 又有d讚到好好(唔係氹我個隻), 老實講, 我都知每個人想要既野都唔同, 每個人心目中既pre-wedding定義都唔同, 朋友一早講左佢地走既路線係同其他公司唔同, 因為競爭實在太大, 佢地唔係影個d好sweet既pre-wedding, 我同男朋友就真係乜都冇所謂, 人一世物一世, 當然咩都想試下, 反正我地都會再影其他, 可能都係得呢一輯係走"cool"既路線! 因為呢輯相, 我第一次俾人話我有女人味, 哈哈!!

Photo - The AMOR Professional Photography -

http://www.theamor.com.hk

MakeUp - Renee Tang

我覺得呢輯果欄雖然唔似pre-wedding, 但好劇照feel, 我鍾意呀!

我都幾鍾意呢張, 尤其加個logo係中間!

好多人都鍾意呢張!

呢個造型俾人話有女人味, 哈哈!

淘寶貨收到喇!

好多人都問我收到未, 終於收到喇, 其實我都好心急, 嘻嘻!!

婚紗我幾滿意, 當然係一分錢一分貨, 手工又唔算好好, 有好多線頭, 仲有D珠片好似好易甩咁, 同埋個胸位好軟, 唔似平時個D咁挺, 不過我用黎影相係冇問題, 唔會有人睇D手工架啦, 講係冇用, 大家可以睇相, 仲有個拖尾添!!

至於晚裝, 原本冇乜期望, 因為之前講過係求其買, 但估唔到黎到又OK喎, 係短左少少, 會露個鞋頭出黎, 當然都唔係叫好靚, 只係我本身覺得呢件野唔得既時候, 又覺得著佢黎影相應該冇咩問題!

第一次送花

上星期有一晚, 男友踢波返黎, 著住一身踢完波既裝束, 拎住紮花話送俾我, 嘩, 真係估佢唔到, 過左情人節, 又過左元宵, 佢話喎, 咁先有驚喜嘛, 哈, 其實係D花平好多就真啦, 不過我照受, 呢紮係佢第一次送俾我既花, 其實我都同所有人講, 我唔鍾意花架, 因為好唔抵, 出街又要拎住, 而且花會死, 到時丟左佢我又會唔開心!

佢送左十支俾我, 話係十全十美喎, 其實我都唔識, 乜唔係多數送十一架咩?? 佢仲話, 放工即刻走去花墟買, 問左佢幾次幾多錢, 佢話$80, 哈哈, 原來咁平就由佢啦, 而家D花擺左係屋企, 唔知可以捱幾耐呢?