2016 出院了!

2016年9 月5 日

今日係入院第五日, 等醫生黎檢查完, BB退左黃就可以出院了!

係港安五日, 真係幾鍾意呢度, 有D唔捨得, 張床好舒服, 一定好過QE個張好多倍, 環境舒適, 老公過黎又方便, 個女黎到又開心, 不過真係好好好貴, 比起2年前生大女時又貴左一萬零!

餵奶房, 大過以前好多, 仲有另一邊

估唔到遇著落大雨, 好彩二哥黎左車我! 今次我講到明第一日要休息, 謝絕探訪, 同埋我真係好想沖涼洗頭, 所以一返到屋企即刻沖涼洗頭, 同上胎一樣, 都係用花灑, 冇用薑水, 只係好求其買左薑沐浴露同洗頭水用!

沖完涼又試下泵奶, 之後就俾家姐同妹妹玩下, 家姐覺得好新奇, 未開始呷醋, 仲試左抱下妹妹, 我地自拍左第一張一家四口照, 自拍反而係影得最好, 呵呵!

2016 入院生B - 第四天

2016年9月4日

今日第4日, 聽日出得院了, 同家姐一樣, 又係第四日要照燈, 好彩揀左港安生, 照燈唔駛另外加錢!

今日係投票日, 好無奈冇得去投, 老公就帶埋個女去投票, 仲好招積影相我睇, 好唔抵得!

終於有朋友黎探我, 又幫我地影左全家幅, 叫做好少少, 另外開始上奶了, 係好突然, 妹妹又唔太識啜, 我又唔識手擠, 最後叫老公帶個奶泵黎!

泵左一陣都唔太出, 有個KIWI姑娘上胎已經係度, 估唔到佢認得我, 我同佢講好痛好辛苦, 原來佢學過催乳, 之後佢幫我推左半個鐘, 終於推到D出黎, 不過真係好好好痛, 老公望到自己都好驚咁, 哈哈!

結果成晚都痛, 不停泵, 泵左2次終於都叫舒服晒, 我開頭諗住用針筒餵人奶, 但醫院話用針筒餵要$100日, 好搵笨呀, 最後都係用奶樽, 因為都搞到半夜四點幾, 頂唔順放低俾姑娘幫我餵, 希望唔會浪費我既黃金初乳啦!

2016 入院生B - 第三天

2016年9月3日

今日都一樣, 老公晨早拎鮑魚粥俾我, 之後返去湊女, 而我都好準時去餵奶, 依然係未上奶呢, 又話第二胎早D既?

午餐晚餐一樣, 媽媽送飯俾我, 今日工人姐姐黎探我, 幫我地影左全家幅, 不過妹妹係隔住玻璃, 所以影得好差, 唯有等出院再影!

家姐黎襯醫院都好開心, 好似去左遊樂場咁, 見到妹妹都未知咩事, 不過知知地我個肚唔見左, 希望佢唔會呷醋同愛錫妹妹!

今日第一次見到妹妹笑, 開眼, 仲有大喊, 雖然已經第二次做媽媽, 但仍然感覺新奇同興奮, 如果發左達, 我真係會考慮生第三個!😰

2016 入院生B - 第二天

2016年9月2日

今日開始落床同試下餵奶, 由於係床已經不停郁, 所以落床同上次一樣, 都係接受到既痛, 當然動作要慢!

上胎係醫院叫粥水, 之後就係阿媽帶飯俾我, 今胎早餐老公煲粥俾我, 係果皮鮑魚粥, 鮑魚係打碎左既, 好好味, 另外就狂飲準備好既炒米茶, 到午餐同晚餐就食我媽媽帶黎既瘦肉飯, 由細到大我都好鍾意食, 有瑤柱冬菇瘦肉, 真係生B先有機會係咁食咋!

到夜晚, 醫院安排我地影全家幅, 本來想帶埋大女一齊入去, 但醫院話唔得, 不過轉頭俾我地見到另一家庭得囉, 激死!

終於可以抱下妹妹, 再次感受下做初生BB既媽媽滋味, 個感覺好滿足, 已經好多野諗, 唔捨得咁快大, 又好想再生, 哈哈!

人地話第二胎快上奶, 可能開刀關係, 上胎我第四日先上奶, 今胎第二日都係一滴都冇, 所以餵奶粉先, 今次醒目, 叫左最貴既ILLUMA, 唔好蝕, 不過試過味, 覺得好腥好難飲, 唔知係咪奶水先會咁!

妹妹暫時仲好細食, 都係30ML左右, 佢冇家姐咁易嘔奶, 我記得家姐係醫院已經成日嘔奶, 俾姑娘問我係咪大肚成日飲凍野, 其實兩胎我都飲得多凍野, 天氣熱嘛!

呢度每4個鐘一次餵奶, 通常醫院都叫媽媽休息, 所以日頭先會多人, 夜晚好少, 我呢D夜鬼當然唔放過夜晚, 12點幾都走黎餵, 係醫院係最舒服架, 要好好珍惜!

2016 入院生B - 第一天(下)

觀察過程, 都係我冇野做發呆, 諗返成個過程, 真係俾上次舒服, 起碼種豆支針冇咁痛先, 其他既痛苦都係可接受範圍, 比想像中好!

觀察完後返房休息, 當然又係休息唔到, 而係不停篤電話同人報喜! 之後屋企人都陸續黎, 老公都帶埋個女黎睇妹妹, 佢好似好新奇咁, 仲有好鍾意間醫院, 係咁走來走去, 希望冇人投訴!

同上次一樣, 開始郁下手腳, 等落床冇咁痛, 好期待食野, 醫生話8個鐘就可以食野, 其實下晝生真係好D, 如果有機會再生, 都係揀返下晝!

麻醉葯開始過, 對腳有返知覺, 不過姑娘KEEP住塞止痛葯, 所以傷口唔算太痛, 嘗試睇下第二胎會唔會快D上奶, 結果都係未, 暫時一切都感覺良好!

2016 入院生B - 第一天(上)

2016年9月1日  37W6D

今日瞓醒同老公出去嘆個早餐, 揀左去飲茶, 返黎沖個涼, 同個女影幾張, 中午就出發去醫院了!

臨出門口前影相

港安裝修左好靚, 之前個女入醫院已經見識過, 今次再見識多D, 真係靚過前年黎生多多聲!

同上次一樣, 搞一輪入院手續, 之後安排左我地去產前房, 有兩張病床, 我就駁機聽心跳, 老公攞野去我之後住既房先, 同張醫生講既一樣, UPGRADE左去二人房, 之前覺得二人房好細, 但老公話都幾好, 不過就冇窗邊床, 得近門口個張!

靚過同大過以前好多, 仲有個大衣櫃!

係我駁機期間, 有間幼稚園打黎話有位俾我女, 叫我呢兩日去辦手續, 我話我係醫院等梗生B喎, 哈哈, 笑死我, 之前好想讀呢間, 但而家呢間我已經俾晒錢了, 所以都唔會再諗住轉!

差不多夠鐘就入手術室了, 有D緊張, 不停同麻醉師講我好怕痛架, 就住我, 尤其係手個支, 我上次生痛左幾日, 結果今次真係唔太痛喎, 好明顯係上次個麻醉師手勢唔好!

麻醉完開始生了, 今次感覺良好, 冇上次咁俾人綁住我咁, 老公入左黎, 大家吹下水, 我問醫生我個肚多唔多脂肪, 可唔可以幫我抽出黎, 哈哈, 佢話唔係好多咋喎, 之後諗諗下都傻, 咁低位置開刀, 好難會多脂肪!

之後開始拉扯, 今次比上次勁呀, 感覺係拉到我成個人郁晒咁, 仲要係好多下, 之後BB出黎了, 聽到喊聲, 當然冇上胎咁大感動, 但係都好開心, 妹妹出黎了!!

醫生話真係好多胎水, 笑死我, 姑娘抱左妹妹黎, 仲多頭髮過家姐呀, 成隻馬騮咁, 影完相, 老公剪臍帶, 我又推左去發呆等觀察了!

2016 產前一日

2016年8月31日  37W5D

聽日就生了, 今胎我選擇左擇日, 因為好難選擇, 又搭到農曆七月, 又唔知揀暑假好定開左學好, 問過好多人都有唔同意見, 所以擇日算了!

本來張醫生一直話唔駛急住決定邊日, 因為實有位, 點知我揀好後, 姑娘先話手術室冇位, 我話你而家先講, 我得2個日子揀, 你上晝俾唔到我, 一係下晝, 但下晝佢又話有附加費, 因為醫生要睇症, 呢樣個樣, 我好嬲呀, 嘈左好耐, 最後佢話張醫生肯唔加錢!

由於下晝開刀, 唔駛好似上次咁早一晚入院, 我可以同老公同女食餐勁既, 再係屋企瞓一覺先入院! 今次揀左食放題, 仲行下街, 最後衝刺幫個女買開學既野, 好好彩見到之前睇中既鞋有特價, 好滿足!

唔知幾時先可以食

妹妹聽日出黎喇!