由於阿女每日都會落街, 首先係我會抱佢落樓交俾姐姐, 之後姐姐又會帶佢去百佳買餸, 所以病既機會更加大!
六個半月, 一個星期三, 放工返去姐姐話阿女有D鼻水, 我仲諗住好小事, 而且阿嫂話過BB病由佢身體打下仗先有抗體, 如果一病就俾葯會唔好, 咁我諗住由佢啦, 或者捱到星期六先帶佢睇醫生!
點知夜晚阿女開始發燒, 傷風都好嚴重, 佢個鼻塞晒, 成晚都瞓唔到不停喊, 搞到我地都冇得瞓, 老公要打直抱佢先叫瞓到一陣!
第二朝餵第一餐奶, 阿女嘔返晒出黎, 於是我決定請假同佢睇醫生了!
一早問下其他媽媽邊個醫生好, 咁打電話去問下, 第一個醫生放假中, 第二個話冇得掛號, 要親身去登記! 十點幾餵阿女飲奶, 煲落粥仔, 洗左轉機衫, 再執埋野就拿拿聲出門口, 因為太重了, 我冇帶奶出去, 阿女四個鐘一餐, 應該唔會搞咁耐卦!
去到診所登記, 排15, 姑娘叫我九個字左右返去, 診所多菌, 我唔想係診所等, 唯有孭住個女周圍行!
行完返去, 點知佢先話醫生仲未返, 個陣十二點幾了, 佢話應該一點三就返, 但返到黎我仲要等15個, 真係嬲到我呢!
即刻走左去第二度搵醫生, 一間診所放LUNCH, 另一間都要等13個, 咁我唯有照登記等, 姑娘又叫我行半個鐘返, 結果我又周圍行住等, 真係攰到我呢!
終於有得睇了, 開左葯就拿拿聲返屋企餵阿女食粥, 再食葯, 第一次餵阿女食葯, 好緊張, 匙羮餵佢都肯食, 餵完佢就瞓覺了! 到四點幾我終於有時間泵奶, 真係未試過咁耐冇泵, 仲要我全日都冇食過野, 好肚餓, 個刻真係覺得自己好慘呀, 終於明白小朋友病, 最辛苦係父母點解!
到夜晚再餵葯, 唔知點解阿女又唔肯食, 最後要用針筒餵先得, 不過阿女食左次葯都已經好返好多, 冇乜燒了, 個樣都舒服返D, 同埋叫瞓到覺了!
 |
| 孭住阿女周圍行等醫生, 見佢咁慘就買左新奶咀俾佢! |
No comments:
Post a Comment