呢個月BB已經學識左反身, 比起同期BB黎講算係快, 我亦都提早擔心了, 成日驚佢會焗襯, 雖然佢都識抬起頭, 但有時見佢抬得太耐會攰, 真係好擔心呢!
返左工一個月, 另一大問題就係突然收左奶咁, 試過直頭泵唔出! 雖然本身都係超窮媽媽, 人奶只係俾佢當零食, 不過冇諗過返工會收左!
本來想過就咁放棄, 但係又唔甘心喎, 所以.....我好努力追梗奶, 帶埋個泵返公司泵, 每日好似走難咁, 奶泵, 奶樽, 冰袋等等, 真係好鬼辛苦!
有媽媽介紹淘寶既優合奶泵, 只係$99人仔, 我就淘左個放公司, 帶少個泵同火牛返公司, 優合仲可以USB插電, 又輕, 遲D去旅行帶去就仲正!
呢個BB仲開始認人, 雖然話認人好煩, 因為唔係個個俾抱, 咁會好痴身, 但係佢認人起碼唔怕俾人拐左去嘛, 哈哈!
而家每日既時間表又唔同左, 由於帶左泵返公司, 所以唔駛早起身泵奶, 其實應該要的, 不過實在太辛苦了!
7:30 起身梳洗, 執奶泵返工
8:05 出門口+湊女去阿哥度
9:00 返公司泵奶
13:00 公司泵奶
16:00 公司泵奶
19:15 返到家泵奶, 或者有時遲左返就唔泵, 改做洗奶樽, 或者其他家務
20:00 上阿哥度食飯+接女返家
21:30 返家做家務+沖涼+泵奶
成日話全職媽媽辛苦, 其實冇工人既在職媽媽仲辛苦, 打兩份工咁, 放工返黎仲要湊女+做家務, 好多朋友話不如請鐘點, 但暫時黎講我仲想慳D錢, 鐘點時薪太高了!
經過半個月追奶, 叫做好返D了, 不過真係好好好辛苦, 一日泵6次, 一日冇左幾個鐘, 都咪話唔癲! 好彩既係公司俾我泵奶, 一開始我仲會借間房泵奶, 不過公司冇乜人, 行開左電話響, 有人黎都唔方便, 所以到後期我披條餵奶巾就係個位泵了, 哈哈!
阿女而家仲係飲梗奶, 雖然話4個月可以試下米糊, 果蓉等等, 但我都係會聽健康院指引, 等到6個月先試, 暫時都係飲奶先啦!
過左三個月, 最開心係出街可以用孭帶, 咁我可以自己帶BB出街了!
 |
| 百日宴, 好鍾意呢頂帽! |
 |
| 剛睡醒 |
 |
| 第一次用孭帶出街, 阿女好開心! |
