二月個時剛剛有, 冇理由咁快去, 五月都有個小型既, 聽聞又唔太吸引, 所以今次呢個係我第一次去既BB展!
事前做足功課, 首先係同老公請假, 因為驚星期六日多人, 所以我地就揀左星期五一齊請假去!
之後就係搵入場券喇, 因為門券每張要$25, 仲有coupon book都要$15, 慳家媽媽當然唔想洗呢d錢, 一見到有機構話送飛, 就即刻報名, 另外原來三嫂都識人, 幫我攞左4張返黎, 前後我有成8張飛咁多, 哈哈!
8張免費飛, 有三嫂俾既4張飛, 呢個4張我都轉贈左俾朋友同老公既波友, 另外2張係美贊臣送既, 佢仲會送埋本coupon book, 非常之好, 最後2張係安滿送既, 除左再有本coupon book, 仲有牛牛食物盒送添, 好開心呀!!
搞掂入場券, 之後就係print label, 呢個任務今次交左俾老公, 因為佢公司有label, 我仲諗住佢會覺得好麻煩, 又要set位print, 又要用公司資源, 點知低估左佢, 好快就print左返黎, 仲要print左成百個label, 痴左線, 之後仲問我, 佢駛唔駛print埋佢個d? 對於BB既野, 佢真係上心又盡力, 同結婚個時差好遠, 我開始呷醋了!
因為有兩本coupon book, 所以我都叫佢print埋佢個d資料, 不過少少就得, 希望用得著!
BB展前一直留意住有咩優惠, 要買D咩, 有咩禮品攞等等, 今次主要係會買奶樽尿片同參加疫苗計劃!
終於到BB展了, 十一點半去到, 已經見到好多人了, 仲要係唔少大陸人, 好多都推晒車咁, BB車, 行李箱, 車仔等等, 乜車都有, 真係好危險!
我地首先去左美贊臣拎書仔, 佢有個超大環保袋送埋, 之後就係排安滿, 佢有條隊係for大肚媽媽, 不過都唔見得好快囉!
安滿送左個牛牛食物盒, 係紫色架, 裡面仲有膠匙同叉, 非常好, 另外老公填多份form, 可以攞多個, 嘻嘻!!
開始我地既行程, 本身係約左另一對朋友發哥發嫂, 不過佢地有野做遲黎, 所以我地自己行先, 之後先join返!
其實我地都好迷惘, 唔知點行, 大型參展商例如pampers, 牛欄牌等等, 送既禮物好豐富, 我地本來想排, 但佢多人到要cut人, 真係痴線架, 我地唯有行其他啦!
見到DR.BROWN奶樽set連消毒機有優惠, 就決定會買呢set了, 不過佢冇送貨, 要即刻攞走, 我地就諗住臨走先買了, 另外佢只接受現金, 實在太麻煩了!
之後都係行行行, join埋發哥發嫂一齊逛同攞禮品, 幫上司買左套玩具俾佢孫女, 又係cash only, 真麻煩!
其實我本身已經唔係行慣街既人, 所以行左陣已經好攰, 所以中間去左個臍帶血既地方坐低聽下, 叫有得休息下! 另外報左個15:00美素佳兒既講座, 只係20分鐘, 都係諗住坐下, 同埋佢會送一本超聲波相簿, 好吸引!
講座其實幾悶, 個個都係志在去坐下休息, 不過佢送既相簿真係好好, 因為係印左我個名架, 粉紅色幾靚, 咁我d超聲波相可以有個相簿入住, very good!!
行到好攰, 仲要俾個大陸佬用架bb車撞左我一下, 望住佢仲要好似覺得我阻住佢咁, 豈有此理!!
開始要買野了, 買左個摺既沖涼盆, 好多人都買KARIBU, 不過我就麻麻地鍾意, 所以買左發嫂推既STOKKE, 原價$438, BB展9折$394, 粉紅色好靚, 不過老公就唔多like隻色, 哈哈!
本身諗住訂goon尿片, 但係超級勁多人, 所以去左kinetics join左疫苗計劃先, 我地揀左最平既K1, BB展只係平$100咋!
買完尿片去返訂goon, 真係唔知點解咁多大陸人買, 等左陣先到我, 好快填晒送貨資料俾埋錢就走了, 呢度收eps, 由於屋企都幾多片片sample, 所以我訂左2包nb, 7包s, 另外佢送9包x2片既sample, 我都係揀晒nb, 承惠$1120, 唔知幾時會送黎呢?
又行到攰, 走左去鑽石能量水度混吉, 原來咁貴架, 仲要係租機一樣, 個個月都要俾錢, 我覺得好搵笨呀!
之後就係買DR. BROWN喇, 本身想買$998既set, 係消毒機+4大2小奶樽+2替換奶咀, 但佢另外仲有set係多$300, 即係$1298, 除左以上講既, 仲會有奶樽清潔刷+安撫奶咀+baby ganics既洗衣液, 奶樽清潔液同沖涼+洗頭液, 好似幾抵, 因為平時baby ganics都幾貴, 所以就買左呢set了, 另外再買左$70有2set(4個)既替換奶咀, 即係2號咀, 其實我都好擔心BB會唔鍾意呢個咀, 不過唔理了, 唔俾佢試其他應該冇事既!
行到五點幾, 終於頂唔順走了, 雙腳真係好似就斷咁, 最後同老公走左去腳底按摩, 八點幾先食晚飯, 成11個鐘冇食過野, 我覺得真係好癲呀!!
雖然好攰, 但返到屋企都要點算下攞左咩禮品, 比我想像中差, 不過好多都係自己放棄既, 頂唔順太攰了!
No comments:
Post a Comment