第四次產檢 - 胡醫生

2014年4月25日  15W4D

時間過得好慢呀, 等左6星期先見到胡醫生, 今次約左3點半, 同老公下晝請假, 嘆個牛涮鍋先去診所!

醫生成4點半先返黎, 診所已經8個人係度等, 好彩我係第一個!

入到去醫生先講聲唔好意思, 之後就問我覺得點呀, 15週喇喎, 我就問佢有關開刀既野, 佢話我可以揀30/9, 2/10或3/10, 咁2/10係重陽節我又唔想, 心思思係最想30/9做9月b, 時間佢話多數係上晝七點幾或下晝兩點幾, 叫我考慮下下次再答佢!

之後就探BB了, 幾星期冇見喇, 上次係QE仲要係唔清楚既見面, 又大左好多, 今次終於見到佢第二個姿勢, 就係趴左係度, 哈哈!!

好清楚望到佢成條背脊骨, 佢似係瞓梗覺, 咁我話想睇下男定女, 胡醫生好努力咁整醒佢, 終於見到........醫生話多數係女仔黎架, 我今次破產喇!!

探完BB, 醫生叫我開始轉materna, 之前有人俾左樽我, 所以醫生冇開俾我了, 收費$650!

離開診所返屋企途中, 先發現唔記得攞到診紙, 俾老公話我開心得滯, 哈哈!!

荃灣BEANS

之前見過有人post盆栽甜品, 係Tiramisu, 不過地點係元朗, 一直好想試但我對Tiramisu興趣又不大, 地點又唔方便!

到最近知道荃灣都有盆栽甜品, 仲要係我鍾意既木糠布甸, 心思思一直想試, 但成日排長龍!

琴晚八點同老公去望下, 見得幾個人排梗, 就照排了, 幸運地好快就入得, 不過呢度d位好迫, 隔離食乜都睇到晒, 傾計更加會聽到!!

本來試叫個pizza, 可惜賣晒, 最後叫左"芝士肉醬薯條"$39, "卡邦尼意粉"+熱檸蜜$65, "和風珍寶帶子蜆肉意粉"+熱咖啡$88, 仲有"盆栽木糠布甸連雪糕球"$48 (唔知有冇記錯)!

呢度裝修幾舒服, 用既杯碟都好靚, 仲有餐具係木造, 睇得出落左好多心機去經營!

食物方面, 我最鍾意個薯條, 真係好正, 老公唔鍾意食薯條都忍唔住係咁食, 卡邦尼意粉都唔差, 意粉軟硬適中, 不過最貴既珍寶帶子蜆肉意粉就差d了, 帶子冇味的, 蜆肉幾新鮮, 不過個汁我又覺得麻麻, 食左幾啖就俾老公搞掂佢, 我專心食埋個卡邦尼同薯條, 哈哈!

芝士肉醬薯條, 正!

蜂蜜檸檬, 好鍾意佢既餐具!

卡邦尼意粉

和風珍寶帶子蜆肉意粉

其實已經好飽, 最後當然要叫埋個木糠布甸, 好彩size好細, 呢個甜品我都識整, 所以我覺得佢呢個價錢好貴! 味道都算幾好, 唔算好甜, 個盆係食得既, 不過真係好飽, 食唔晒了!!

總括黎講, 荃灣黎講呢度算幾好了, 如果唔駛等太耐位, 我一定會再黎!

分子雪糕 x ANNA SUI (限時)

最近分子雪糕當紅, 其實我一直都好想試, 但佢之前係大坑太遠, 尖沙咀開左分店我又唔知, 到最近又......大左肚, 真係好難搵到藉口食!

網上見到分子雪糕最近加入左ANNA SUI口味, 仲要係限時, 8/4~21/4, 心思思好想食, 就約左老公放工去食喇!!

佢地址寫美麗華商場地下, 去到搵完一輪又唔見喎, 原來唔係商場裡面, 係上諾士佛台既樓梯下面, 仲好擔心去到會排長龍, 好彩又冇喎, 幫襯既都係後生仔女!

限時既紫色有四種味道: 紫薯+黑竹炭蝴蝶曲奇 ($44), 藍莓燕麥乳酪 ($44), 紫米露 ($39), 凍檸賓 ($39), 我對藍莓乳酪比較有興趣, 就叫左黎食, 但原來係得紫薯先靚!!

同老公好快就食完個藍莓, 好好味呀, 平時都鍾意食乳酪, 佢加左燕麥, 食時會咬到d燕麥, 食完後又心思思, 不如試埋個紫薯, 哈哈!!

紫薯真係好靚呀, 仲有係呢個雪糕係唔甜架, 紫薯咬落去有d脆卜卜既蕃薯乾, 比我想像中好食, 食完兩杯好滿足, 可惜佢限時, 如果唔係我想試埋另外兩款架! >.<

紫心蕃薯+黑竹炭曲奇

藍莓燕麥乳酪

唐氏綜合症篩查 - QE

2014年4月3日  12W3D

今日約左10:30去QE照OSCAR, 因為可以探BB, 所以老公都請假同我去!

係樓下食個早餐就搭車出去了, 準時去到, 因為唔係上次既日間醫療中心, 而係去E座取收據先, 再去B座睇, 所以搵路搵左一段時間!

原來都幾多人呀, 好彩間候診室都大同埋有電視睇! 等左大約九個字先到我, 係一位著醫生袍既白髮女人照, 仲以為佢係醫生, 後尾D人講返原來佢係姑娘!

開始照啦, 個MON好大, 不過我覺得唔夠私家個D機清, 見到BB又彈下彈下, 老公話乜大左咁多, 其實咪同上星期差唔多!

個姑娘.....都幾COOL, 十問九不答, 同埋都幾大力按我個肚, 按到我有D痛, 照左大約10分鐘就照完, 我問左好多野, 佢都冇答冇睬我, 唯一答既係......頸皮1.67mm, 再問佢係咪即係正常, 都係唔睬我!

經過上次抽血慘痛經歷同今次冷淡對待, 我絕對覺得另外搵私家照結構係明智既, 不過我要澄清, 呢度D人態度絕對唔差, 只係冷淡, 當然應該只係我黑仔, 因為有其他媽媽話醫生照係好好多, 仲會講仔定女你知!!

照完後等抽血, 又等左半個鐘, 抽血個姑娘好過上次好多, 仲會講笑添, 手勢都好好, 唔太痛又冇瘀, 我都黑唔晒!!

搞掂晒後就走了, 前後用左差不多兩個鐘呢!!

醫院話如果有問題, 兩星期內會有電話俾我, 頸皮1.67mm, 又有鼻骨, 我諗唔會打俾我喇卦!!

第三次產檢 - 鄧醫生

2014年3月28日  11w4d  5.34cm

今次係突如其來既產檢, 話說琴晚大解完後, 抹到有血, 但我大解過程冇用過力, 又冇痛過, 完全係暢順, 所以就好驚啦, 心諗: 可能損左吧, 以前都試過, 好快冇事!!

到之後去襯廁所, 都會抹到有血, 甚至到今朝起身都有, 當然係patpat有血唔係陰道!

本來都諗住算, 之後同朋友傾下, 都係叫我穩陣d睇下醫生, 但臨時臨急去邊度搵醫生睇?

問左幾個醫生都話今日冇位了, 好彩10月媽媽即刻俾幾個電話我打, 最後鄧悅翹醫生叫我可以即刻過去, 佢係我公司附近, 行過去只係幾分鐘咋!!

以為少人佢先叫我即刻上去, 原來都好多人, 最後等左個幾鐘, 同醫生講左後, 佢話睇左bb先, 嘩, bb比起兩星期前大左成倍呀, 仲見到佢彈下彈下, 好得意, 可惜老公唔係度呢!!

之後鄧醫生每個部位睇下, 話見到鼻骨, 頸皮都薄, 之後心跳, 腳仔等等, 心跳162下, size都正常, 亦睇唔到我子宮有其他問題, 再幫我睇下陰道分泌, 都冇血, 即係bb好健康!

再幫我睇patpat, 佢話表面睇又冇損冇瘡, 可能係裡面, 但如果係都冇野可以做, 唯有飲多d水, 等d便便軟d冇咁易整損!

睇完放心晒, 有兩張超聲波相連一隻DVD, 埋單$750!

預約照結構

一開始知道QE有期俾我照結構, 好開心, 但返到計下, 原來成22W4D先做, 即是差唔多23W, 大吉利是有D咩, 我真係冇咩時間, 就算想搵個私家睇都難, 所以就心思思想搵私家早D照!

有其他十月媽媽遲過我預產都早我9日照, 大家都係QE, 所以我真係唔明佢地點編? 不過成間房既10月媽媽都話, 就算政府有得照, 都會出去搵私家, 因為政府真係好hea, 甚至乎佢地有朋友試過QE照完冇問題, 但BB出世個心係有問題要做手術, 聽到我地都好驚!

開始上網搵下資料, 照結構真係好貴呀, 仲要年年加價, 好多都要$2000了, 搵到個平D$1500既佢只接係佢度做開產檢既孕婦!

好啦, 一路搵一路都覺得好貴, 再同另外個朋友傾下, 佢老婆係政府做結構, 都有搵私家, 佢話政府真係好求其, 又唔會同你講野, 呢D錢唔慳得, 我仲要咁遲先照, 一定搵私家照左先!!

就係咁, 我決定搵私家照喇, 可以多D相, 又可以早D知仔定女, 又可以安心D!!

最後.....我搵左孫錫鴻醫生, 因為實在太多人讚佢喇, 同埋佢係我公司對面, 我已經約左20W照, 到時我五點去登記, 再返公司等放工, 放左工去到應該差唔多時間了, 老公只要早走一個鐘就得, 唔駛請假, 好完美, 哈哈!!

第一次政府產檢 - QE見姑娘

2014年3月17日  10w

之前fax資料去QE約左今日見姑娘, 因為知道唔會有得照, 所以叫老公唔好駛陪我了, 有個好姊妹話佢得閒可以陪我去, 好開心!!

約左13:30, 我放下晝即刻去搭巴士, 好好彩一去到就有車, 因為佢15-20分鐘先一班架, 大約10分鐘就到了!

由於我未睇過, 其實唔知去邊座, 只知公務員係L座, 好彩個姊妹提左我應該係日間醫療中心4樓, 落車好快就搵到了!

一黎到.....竟然冇乜人, 連姑娘都冇乜, 應該係食梗飯, 搵到個4號窗先登記, 我好醒目帶晒資料黎, 包括自己HKID, 老公ID COPY, 住址証明同醫生証明(一定要正本), 之後佢俾張紙我叫我跟住做!

原來度高磅重都係自助形式, 遲D仲要自助量血壓添!! 搞掂後姑娘叫我地去睇電視順便等叫名, 電視內容係講唐氏BB的!

好快就叫名了, 我係第一個呢, 入到去姑娘問病歷, 因為我做過手術, 所以問得仲詳細D, 聽聞呢度係連老公都唔入得, 因為佢都問好多私人野, 我朋友話佢之前試過問有幾多個性伴侶, 第一次性行為係幾時添, 笑死我, 而我又冇問呢D, 最多只係問有冇生過性病, 同埋有冇試過墮胎, 哈哈, 我當然冇試過! XD

搞掂後佢仲一次過俾晒四個期我返黎, 包括照唐氏, 見醫生, 照結構同飲糖水(因為我媽有糖尿), 咁我唔駛再去7號窗排期了!!

拎埋到診紙, 再有一個講座, 介紹下QE服務, 呢度D姑娘幾好, 好滿意!!

聽完後就去2樓抽血, 嘩, 呢度好多人, 仲要乜人都有, 要即刻帶返個口罩, 原來大肚婆唔駛等, 一去到就抽得, 可惜我遇著個手勢差既姑娘, 好痛呀, 抽完我痛左幾日, 仲要瘀晒添! >.<

抽完血就走得, 4月3日就要返黎照唐氏喇, 好快呢!!

第二次產檢 - 胡醫生

2014年3月13日  9w3d  2.7cm

等左三星期, 又可以睇bb, 由於今個星期開始冇乜作嘔頂胃, 搞到我好擔心唔知有咩事!

今次見胡廣森醫生, 係個幾月前book架喇, 因為等唔切我之前先去睇羅醫生, 應該唔會再返去了!!

同老公請左一日假, 上晝產檢, 下晝係我伴娘結婚, 要去觀禮, 好充實既一日!!

約左11:00, 我地10:50上到去登記, 好奇怪呢度係唔駛磅重呢!!

大約一個鐘就入得, 胡醫生比我想像中後生, 佢首先會問我病歷, 好彩佢都話我之前個心律不正同手術對bb係冇影響!!

之後就入去照超聲波, 好緊張呀! 第一次照肚, 仲驚唔知會唔會我肚腩大照唔到, 哈哈, 醫生好快就搵到bb了!

嘩, 比三星期前大左好多, 成個人形出黎, 睇到頭仔同手腳, 仲見到郁下郁下, 醫生話俾心跳聲我地聽下, 好似火車聲呀, 哈哈!

第一次聽心跳聲, 覺得好好笑, 所以我就係度狂笑, 之後見到bb手腳瘋狂咁郁, 醫生話我笑到整醒左佢, 真係好得意呀!!

上次照到心跳都冇咁大感覺, 今次真係好開心, 覺得好得意呀!!

照完後同醫生傾左陣, 問佢港安開刀收費, 佢話佢收$21000, 麻醉師$5000, 另加港安既5日4夜package價錢, 五人房大約$52000, 包埋我同bb巡房費, 因為都係佢睇埋, 不過唔駛咁快book住, 再諗下先都得!!

佢問我食開乜野維他命個d, 我話食梗另一個醫生俾既葉酸同鈣片, 剩返一星期左右, 佢就開多五星期俾我!!

好奇怪, 兩個醫生都話唔駛食materna住, 等我舒服d先食!!

另外胡醫生話如果我會去政府產檢, 就唔會再幫我驗血驗尿, 如果醫院有期俾我照唐氏, 咁我6星期後先返去睇佢都得, 冇期先再打去搵佢照!

今次覆診$680咋, 仲有5星期既葉酸+鈣片, 我覺得好抵呀!

預約埋下次產檢, 係4月25日, 有排等喇!!

第一次產檢 - 羅醫生

2014年2月19日  6w2d  0.6cm

呢個星期身體開始不適了, 唔食野就會餓同胃痛, 食飽又頂胃想嘔, 真係唔知點好, 最慘又瞓唔到, 人地話大肚會成日瞓架嘛, 我除左頭星期會眼瞓, 之後都冇乜了, 反而係失眠添!!

等左兩星期, 終於可以再見羅醫生, 今日好緊張呀, 因為期待傳說中既閃閃!

有人話6w應該照到, 亦有人話可能7-8w先照到, 如果今次照到, 我唔駛又等2星期再黎嘛!!

今日老公又請假陪我去羅醫生度, 姑娘話我得6w要照陰超, 好緊張呀!!

等左大約一粒鐘先到我, 開始照陰超, 我真係好緊張, 醫生話佢會輕手d, 哈哈, 佢真係好輕手, 奈何我真係太緊張, 醫生不停叫我放鬆, 因為支棒入唔到! >.<

終於成功照到, 一開始我唔知咩黎, 見到有野郁, 醫生話呢個就係閃閃喇, 之後就放大俾我地睇, 個個都話會好感動, 反而我第一個反應係: 下? 呢個就係閃閃喇? 同我想像中有出入, 哈哈!

照完後, 醫生話一切正常, size都係6w, 叫我放心, 聽完真係安樂晒呀, 起碼叫過左第一關先, 黎梗仲有好多關要過, 加油!!

預約私家產檢

5W1D

先講一下感覺, 兩星期前開始就開始有M痛感覺, 仲痛得幾密下, 不過今日已經冇乜了!

成日都有想嘔感覺, 食完野會頂胃, 搭車又易暈車浪, 搞到我唔敢再玩電話了!!

上篇講到預約政府醫院, 呢篇到私家, 好辛苦終於等到心水既胡醫生開工, 打去約.....最快竟然都要三月, 同政府一樣咁耐, 好彩我一早約左羅醫生下星期咋, 唔係有排等!

黎梗既產檢:
2月19日 羅醫生 - 6W2D, 希望可以照到閃閃
3月13日 胡醫生 - 9W3D, 第一次見胡醫生, 如無問題多數會搵佢開刀生
3月17日 QE - 10W, 第一次既政府產檢

由驗到到而家已經2星期, 又未夠時間睇醫生, 身體有咩情況都會好擔心, 等待既日子真係好難過呀!!

預約QE產檢

我不嬲係一個有計劃既人, 包括生BB, 我地搬屋都係為左生B, 而另一樣要諗既就係邊度生! 私家同政府價錢差幾百倍, 當然好多人覺得應該去政府生, 但係聽太多恐怖野, 對政府醫院真係冇乜信心, 我成日覺得你係政府生完覺得冇問題只係你好彩, 而我....唔會相信自己有咁好彩, 所以都係決定私家生!

荃灣港安係我既首選, 因為....我係呢度出世架, 哈哈, 係呢度出世又係呢度生B, 應該好大感受! 就係咁, 我地婚後用一年時間儲錢, 換樓, 準備好晒先開始我地既B計劃!

雖然都決定私家生, 但我會照報政府醫院, 貪佢會照埋唐氏同結構! 我住既地區應該係瑪嘉烈, 但係QE口碑較好, 可以跨區, 同埋近公司, 我可以蛇出去睇都得 (之前講過, 我公司係冇病假呢回事, 產檢都要扣錢)!

發嫂提過政府醫院可以fax去預約, 打去QE問下要咩文件同FAX NO., 好快就fax我同老公HKID copy, 醫生信同住址証明, 一心諗住fax完等幾日就覆, 過左幾日冇回應, 就打個電話去問下!

原來....人地話冇收過, 好啦, 咁我再fax, 次次打去都問你id no., 名, 之後就等等等, fax完又話我地張id copy唔清楚, 要放大較淺色再fax, 好啦, 又搞一輪, 打到去.....收左工!!

第二朝又打去問, 講講下cut埋我線, 再打去, 先有個女仔話收到了, 如果佢再話收唔到, 我真係嬲嬲地諗住轉返去瑪嘉烈就算!!

佢話大約等三個工作天, 點知下晝就打黎了, 俾左3月17日我第一次見姑娘, 好緊張呀, 希望到時可以俾埋唐氏既期我啦!!

懷孕証明

2014年2月5日 4W 2D

今日約左羅醫生五點, 老公下晝請假陪我去!

黎到見到好多人呀, 原來咁多大肚婆, 登記之後要磅重同見姑娘, 姑娘一知我咁早, 好大反應話咁早照唔到住喎, 你黎係想做咩??

大佬呀, 你估我想咁早黎, 唔係流啡我都唔會咁早黎啦, 於是我話早幾日流啡, 有d擔心所以黎囉, 同埋想要個懷孕証明去排政府!

等左大約一個鐘見醫生, 羅醫生幾後生, 仲好nice, 同佢講完情況, 佢話咁早唔同我照住, 可以開定d安胎葯俾我, 仲有葉酸同鈣片!

我話其實我小腹一直都有痛, 佢話係正常, 去到6W就應該唔痛, 另外有透明或淡黃既分泌都正常, 唔駛太擔心, 之後就開懷孕証明俾我, 我話你乜都唔駛驗就俾証明我? 信得過我架喇? 佢話棒棒驗到有就係有架喇!!

就係咁, 攞完葯就走了, 6星期既葉酸+鈣片, 加一張懷孕証明, 埋單$600, 我覺得好貴呀! 最後我決定唔要安胎葯, 再流先返黎配, 如果唔係仲貴呀!

初五開工

2014年2月4日

公司係放紅日, 所以初五開工了, 因為流過啡, 始終都好驚, 一返到公司就搵醫生資料!

一心諗住搵胡廣森醫生, 但原來佢下星期先開工, 咁就搵第二個啦!

第二個搵盧乃本醫生, 最快既日子係2月17日, 嘩.....駛唔駛咁誇張呀??

第三個就係搵發嫂介紹既羅宇帆醫生, 原本最快要2月7日, 我話早幾日流過啡, 可唔可以早d? 佢話咁聽日下晝過黎啦!

由於公司係冇病假呢回事, 產檢亦會扣錢, 盡可能我都唔會請假, 好好彩羅醫生係公司附近(呢個亦係我揀佢原因之一), 咁我可以出去睇完再返黎!

晏晝公司去左北京樓食開年飯, 我發現.....原來我好多野唔食得, 一向為食既我, 第一次有想喊既感覺!!

其實都有聰明既同事知我咩事, 佢地係過來人嘛, 知道左都好照顧我同會提點我!!

回顧返呢餐飯, 真係好可憐:

1. 一坐低就指明話要淡普洱, 其實我真係唔太鍾意飲普洱架咋

2. 第一碟餸係拼盤, 有牛展, 海哲, 素鵝, 有同事叫我唔好食, 可能係牛? 定海哲生冷野? 但....我真係好肚餓, 所以冇理, 每樣都食左舊

3. 第二碟餸係片皮鴨, 天呀, 我好鍾意食架, 唔止一個同我講, 鴨同鵝都好毒, 一定唔食得, 但竟然有個同事話, 鵝毒之嘛, 鴨得架, 我都忍忍忍, 但個轉盤不停轉, 香味一直傳黎, 轉左幾個圈, 個個都食得津津有味, 我終於忍唔住, 食左一舊!

4. 第三碟係宮保蝦球? 總之係辣蝦啦, 我鍾意食蝦, 但好好彩我係唔食辣既, 而今次兩個同事都話呢碟一定唔食得, 所以呢碟我完全冇掂過

5. 終於有一樣可以放心食既餸黎喇, 就係小籠包!

6. 又一樣食得既餸, 就係松子魚, 右邊同事夾左俾我, 左邊個同事再夾多次, 仲加句: 食多d! 哈哈, 個一刻, 一方面覺得自己好似好可憐, 另一方面又有d感動!

再之後都係炒麵同甜品, 飲完餐茶, 其實我仲好肚餓, 冇陰公!!

雖則話未夠三個月唔可以同人講, 其實食呢餐飯, 已經好多人估到啦, 尤其係有經驗既女同事, 平時我咁大食, 今日突然呢樣唔食個樣唔食! 女同事就醒目, 知道就算! 有個男同事真係問我今日做咩, 我剩係答左句: 皮膚敏感呀!! 唔知佢信唔信呢??

我知道, 而家只係開始, 黎梗仲有好多個月時間戒口, 我會加油, 同埋盡量學識享受大肚既生活!!

流啡

2014年2月1日 大年初二

可能琴日太操勞了, 一走就走左幾場去拜年, 又可能係今日起身食左半底蘿蔔糕, 下晝開始竟然發然流啡!

好驚好驚, 唔知咩事, 如果唔係我晨咁早驗左, 真係會以為係m, 去左阿哥屋企打牌, 問阿嫂, 佢叫我睇醫生, 但係新年期間冇醫生睇喎, 急症室都只會叫你瞓床, 咁我係屋企瞓算吧!!

呢一晚流左兩次, 一返到家涼都冇沖就即刻上床瞓了!!

2014年2月1日 大年初三

起身老公煲左桑寄生蓮子茶俾我, 之後就返房繼續攤, 係度煲劇, 似乎都冇流了, 不過子宮位一直都係少少抽住抽住痛, 好似m咁, 再一度懷疑到底自己係咪真係有?

夜晚本來要去老公舅父家拜年, 但佢住上水太遠, 所以我都係留家休息一天!

2014年2月2日 大年初四

最後一日假期, 都係休息為主, 呢兩日瞓到我腰骨痛呀, 同埋感覺已好好多, 冇流啡亦冇咁痛, 反而係腰骨好痛!!

黃昏時分姪女打黎又叫我去打牌, 由於我地係住同屋苑, 見悶悶地就過左去打牌, 都係坐係度之嘛, 哈哈!!

驗孕記

2014年1月29日 年廿九

呢幾日覺得腰有d痛, 仲有少少m痛感, 以為係谷m, 但....開始痛得唔尋常, 仲有係好多屁屁放, 就係度諗....唔通中左??

放工即刻返家驗下, 我知道應該係用晨尿的, 不過當時冇理了, 痛到咁唔尋常, 唔中都要去婦科!!

結果.....有個好淺既印, 但係今日先係day 24, 係咪真係咁快就驗到呢??

驗到個下....我成隻手震晒, 之後仲要煮飯, 一邊煮一邊震, 老公返到黎, 我都唔敢同佢講住!

食完飯....我先忍唔住問佢, 你估萬寧閂門未? 我想買多支棒棒, 佢個樣似係呆左, 之後就好開心係咁摸我個肚叫bb, 但係都冇答過我問題!

不過個陣已經十點, 都係聽日先買吧!!

2014年1月30日 年三十

今日公司放早, 今晚要同老公返6299家食團年飯, 飯前我地就去左萬寧買棒棒, 本來好想買電子個隻, 不過價錢貴幾倍又真係唔捨得!!

今次決定要用晨尿驗, 準確d, 所以聽日大年初一起身第一件事就係驗孕喇, 哈哈!!

2014年1月31日 大年初一

今日係約左老公親戚十點鐘尖咀飲茶, 結果我地九點半先起身, 所以好匆忙, 不過都要驗下, 都係淺線, 睇說明書寫淺線係初期, 今日係day 26, 又真係太早喎, 不過應該冇錯喇卦, 我應該係中奬了!!