台北紙婚之旅 Day 3 (10 Dec 2013)

眨下眼就第三日, 時間雖然少但係好開心!

同老公旅行, 雖然佢咩都唔會理, 但係佢會執行李同pack野, 我真係一d野都冇執過, 全部係佢pack佢搬埋! 琴晚就執晒d手信同幫人買既野出黎, 真係有好多呀, 辛苦晒老公!!

呢度係兩日收穫, 仲未計第三日買既老天祿!

今日我地可以晏少少起身, 大約九點半先離開酒店搭的士, 目的地係台北近年熱點上引水產!

搭的士既時候同司機吹下水, 佢話車我地去機NT900, 抵過我地上次呀, 本身我地都諗住搭的士去機場, 見佢架車幾舒服, 就約好左四點酒店樓下黎接我地!

去到上引水產, 一入去係似漁市場咁, 行左個圈就再入去, 係一個類似超市既地方, 而立食既地方都係呢度, 再出去就係室外既燒烤地方!!

我地一心只會係立食, 十點先開始, 未夠鐘我地就行陣先, 呢度D野睇落好新鮮呀, 尤其係D海膽, 我地都好期待!!

十點準時入場, 我地叫左個特選壽司+特選刺身既餐, 食落又冇我想像中咁好, 可以話有D失望, 可能我真係期望過高, 又真係拎左佢黎築地比, 總之我覺得.....冇乜特別, 只係平過香港少少!

之後再叫多個象拔蚌+帶子刺身, 個帶子.........完全唔得, 切得薄之餘仲要係冇味架, 我係香港買一盒盒個D正過佢多多聲, 總括黎講我地只覺得三文魚同海膽係正, 其他都麻麻!!

好快食完就走, 因為企係度食真係唔舒服, 見唔夠飽, 就係佢個超市買返去食, 好抵呀, 碟三文魚刺身係NT210, 海膽NT737, 兩個都係超大超多份量, 個海膽係可以塞滿個口, 呢兩碟野我地差D食唔晒添!!

我地同酒店要求左1:00先退房, 所以就可以hea多陣, 諗下之後去邊, 呢間酒店service真係好好, d女仔好有禮貌架!!

退房後我地就行下西門町, 不過呢幾日都俾我地行晒咁滯, 見仲有幾粒鐘剩, 張悠遊卡又冇乜用過, 就搭捷運去台北車站了!!

行地下街, 仲幫老公同事買左李儀太陽餅, 原來呢間係特別貴, 不過真係幾好食! 之後去左行新光三越, 好鬼多人呀, 我第一時間睇LC既煲, 呢度多D款, 好吸引但我都係會忍到!!

再行就見到有個幾特別既行李箱, 真係幾吸引, 老公鍾意呢個牌子, 而我就鍾意個款, 屋企又只得個24寸, 不如買個大少少既用, 今次咁多手信又可以塞晒入去拎得舒服D, 真係差D買左, 好彩......最後都忍到手, 拿拿走人, 哈哈!!

兩點幾左右, 我地就返西門町了, 今次我地唔搭捷運, 係行返去呀, 仲經過見到R仔介紹既清玉, 可以飲多次個翡翠檸檬玉茶了!

返到西門町買埋老天祿, 我三個阿哥都話要食鴨舌, 所以買左兩盒俾佢地, 我地帶左個吉既大蝴蝶袋黎都唔夠裝手信, 今次真係辛苦老公!!

搭的士去機場, 真係舒服同快好多, 搭18:40機我地早左兩個鐘到, 係機場hea下, 搵到個位可以伸長對腳抖, 老公瞓著左, 我就掛住上網!

有朋友報料話台北機場免稅店買酒好平架, 同老公講完, 估唔到佢即刻彈起身話去睇, 本來係想買black label, 但呢度冇呀, 不過chivas就做特價NT440, 真係超抵, 買左兩支!! 我問老公係咪真係拎到, 佢話得架喇, 所以話男人.....都係一時一樣!

返到香港搭巴士, 搭搭下阿哥打黎叫我落車, 佢開車黎接我地, 實在太好喇, 因為架巴士有排行架!