裝修出事事件

裝修過既人, 都知道好難會事事順利, 總會有d突發事, 尤其我呢d全屋拆晒再裝, 如果冇事發生真係值得還神!!

今次就要回憶返呢兩個月既出過既事, 未必記得晒, 不過會盡量記下!

1. 煤氣錶
拆晒成個廚房, 先知道個煤氣錶位原來係窗口既對面角, 人地通常係近窗口架嘛, 唔知點解會做到咁, 師傅話咁樣個廚櫃會成個位穿個洞就返條煤氣喉, 而我會整消毒碗櫃, 有少少困難, 同埋我第時報錶都會好煩, 所以.......唯有係改錶位了, 煤氣公司改一改位話收我$6000左右, 師傅話試下搵d有牌既同行搞, 最後報左$4500, 仲會免費幫我裝返熱水爐, 如果唔係我又要俾錢煤氣公司裝架喇!

2. 廳燈
之前post過係旺角買左兩盞廳燈, 其中一盞係黑色花花, 佢裝完後師傅先發現有d花花係爛既, 有d直頭冇左添, 咁我就打去問啦, 佢話司機運送途中整爛左喎, "諗住"過幾日會黎整返架喇, 但你冇人通知過我喎, 好啦, 結果約左兩次都放左飛機, 真係好鬼激氣, 最後第三次, 先至真係上黎整返, 佢再唔上黎我真係會落鋪頭嘈架喇, 所以話呢, d人成日話唔好係大陸買野, 我係香港買都唔見好得去邊囉!!

3. 光暗制
主人房燈我係選擇左飛利蒲既射燈LED, 呢隻燈仲可以調光暗, 我全屋既燈制都揀左奇勝E3000灰色, 咁仲專登叫師傅主人房幫我揀可以調光暗既, 呢個制好貴呀, 但係裝完後, 師傅話唔知點解較唔到光暗, 佢用燈膽就較到, 一轉我隻LED就較唔到, 打去問飛利蒲, 原來唔係隻隻制都用到, 應該話係好多制都用唔到, 激死喇, 你又唔早講, 解決方法....咪唔較光暗囉, 全屋燈都冇得可以較光暗, 所以最貴既燈制而家擺左係度, 希望第時有機會用啦!!

4. 廁所門
呢個係接近埋尾先出事既, 話說係搞掂晒後我地先發現個廁所門鎖唔到, 應該話好難先鎖得到, 師傅幫我拆過出黎睇, 話係度門既問題, 叫我搵返間門公司, 好啦, 老公打返去旺角門市, 我地話送返度門俾佢維修, 佢地一拖再拖, 又話影相佢地睇下, 睇完又話好易搞之嘛, 我俾返D鎖既配件你咪得囉, 呢樣個樣, 俾佢拖左3日, 但我仲有幾日就入伙, 最後夾硬送返去佢門市, 點知個女人係勁臭寸, 同我師傅講: 睇下整唔整到架咋, 整唔到你都要俾錢買過度門, 激到我師傅死!

我打返去旺角門市問咩事, 個女人真係非常臭寸, 拗完一輪, 佢又話自己剛放完假, 乜都唔知, 我話你D態度都幾差喎, 我要投訴你, 佢竟然答: 隨便你啦, 你鍾意投訴就投訴? 我以為佢係老板娘啦, 但佢話自己只係員工!

收線後我真係火滾到難以形容, 搵返張單, 原來仲有幾間分店, 首先打去總店講, 我話旺角門市個鍾小姐完全幫唔到我, 態度又差, 我完全唔想再同佢講, 總店就俾左上水既維修部電話我打去!

再打去上水維修部, 呢位李小姐好人好多, 佢話度門係我地自己安裝, 正常佢地唔會搵人黎睇, 不過既然我地送左過去, 佢會搵師傅望下, 之後佢仲話原來佢地老細都係返上水, 結果....我晏D再打俾佢老細講呢件事, 老細話門市個D小姐唔識架, 度門我呢兩日幫你搞返掂佢啦!!

了解之後, 老細當日真係親自幫我車返度門返上水整, 2日後送返旺角, 我趕得切入伙, 呢間公司叫西德鋼閘,  如果要幫襯, 真係千萬不要去旺角門市, 買個時好地地, 買完真係寸到七彩!!

入伙前一天

入伙前一日, 老公請全日假, 我請半晝, 一早老公就打黎報了個壞消息, 就係屋企隻家姐鼠去左彩虹橋, 聽完後忍唔住喊, 雖然已有心理準備, 因為佢年紀好大了, 只係冇諗過佢臨搬先走, 仲以為可以一齊搬新屋, 之前一晚同老公先抱佢出黎摸下, 仲好精神架!!

因為太忙了, 加埋家姐鼠突然離世, 忙上加忙, 好快收拾心情約寵物善終, 到一點就放工返新屋!!

呢日真係幾黑仔, 落到佐敦先發現架小巴原來三點先開, 走落旺角, 都要兩點先開, 仲有個方法就係搭巴士, 但要搭好耐, 另一個方法就係搭返荃灣再轉車, 個陣已經1:50, 我選擇係旺角等!!

約左兩點鐘黎裝蚊網, 但架小巴又要等滿客先開車, 最後師傅等左我半個鐘, 真陰公!!

裝蚊網大約用左個幾鐘, 其實我都冇咩做, 只係陪師傅吹下水, 或者搵野抹下咁, 而老公都好忙呀, 今朝一早黎新屋搬好d磚準備退, 下晝就拎部電腦去整, 之後就留家pack野了, 我除左pack左自己兩袋衫, 其他全部佢pack架, 辛苦晒佢!!

裝完蚊網, 效果好滿意, 不過原來我裝少左兩隻窗, 叫師傅補返裝, 諗住連廚房都整埋了, 佢話等我地執好晒先再上黎裝, 而家可以盡情開窗喇!!

師傅走後, 我好努力咁掃地拖地, 嘩....原來真係好污糟呀, 我用左3M隻即棄抹地布, 貪佢方便可以用完即棄, 用左10張都有, 全部都係黑色架, 不過有D地方都係清唔到, 都係要用吸塵機先得呢!!

搞掂晒....最後就係炸屋喇, 希望唔會太多屍體吧!!

呢個就係蚊網

安裝後, 其實真係唔太覺, 裝完都仲好好風!

放炸彈

準備入伙

定左10月26日入伙, 之前想擇日, 最後都係懶得擇了, 一來唔想請假, 二來我租梗屋, 唔想為左遷就個擇日而夾硬提早或延遲搬!

裝修好後, 其實佢地都清潔左好多, 我見師傅真係用刷清潔, 剩返既我地自己搞掂算, 唔想洗錢請清潔了!

星期六日同老公都抹左少少, 但始終未裝蚊網, 到時又要鑽野, 所以唔想抹完又污糟過, 求其抹下附近冇窗既地方算!

裝修完我地一直開住氣窗散味, 但係都散唔晒, 因為搬完我地就會開始生育計劃, 我好擔心會一直吸入甲醛, 所以淘左d聲稱會吸甲醛既炭包返黎, 希望有用啦!!

一盒有40小包, 仲附送2個甲醛測試器, 上到新屋就係間主人房試左個, 佢寫住要先密封一小時, 但我冇時間, 所以密封左一陣就開始了, 得出黎既結果估唔到係合格有餘喎, 放心左好多, 不過仲係覺得有味, 希望加左炭包再成日開窗會快d冇晒味啦!!

星期六一早九點搬, 但星期五先裝蚊網, 我地買左兩個滅蝨一個滅小強既炸彈, 為免炸完又有野入屋, 所以要等裝左蚊網先炸得, 即係我地搬之前一日先可以炸呀!!

而星期五老公會請一日假(佢太多假剩了), 佢會負責屋企pack野, 而我會請下晝, 放工會即上新屋睇裝蚊網, 之後會清潔下同埋炸屋!!

好期待入住我地第二個安樂蝸, 祝我地一切順利呀!!

淘寶有好多款, 最後覺得呢個牌子靚d, 就買呢個!!

測試結果

裝窗簾+蚊網度尺

今日星期六好忙, 首先係裝修師傅幫我執埋d手尾, 即係幫我鑽d野上牆等等, 之後又要裝窗簾, 又約左蚊網師傅黎度呎, 同埋煤氣公司黎開錶!

老公上晝要返工, 咁裝修師傅我不嬲冇監工, 而其餘三個我都約晒下晝三點, 點知窗簾同蚊網既人都早左, 中午就打黎話而家黎了, 搞到我即刻起身換衫趕過去!

窗簾師傅話要用梯, 但樓下看更話冇, 叫我諗下問停車場, 其實我見到大堂有張櫈係度, 但看更死都唔肯借, 話要留俾d公公婆婆坐喎, 我都係借一陣間之嘛, 去到停車場, 人地話冇梯囉, 不過就肯借張木櫈俾我, 由停車場行返去其實唔遠, 但拎住張木櫈就好難行囉, 我d朋友話新年唔好俾利是個看更呀!!

裝窗簾途中, 蚊網師傅又到場了, 佢俾左兩個款我睇, 其實我一早都決定左用磁力個隻, 可以拆出黎洗嘛!

窗簾裝好了, 全屋都係灰色, 原來真係好遮光, 我諗個廳窗簾都好少會拉埋了!!

蚊網我除左廚房外, 全部窗都會整, 報價三千幾呀, 但為左唔俾d大小強同蜜蜂飛入黎, 點都要做架喇, 裝好後再post上黎!!

房既窗

飯廳卷簾, 好似百葉咁架!

房既卷簾

廳既窗簾, 同房一樣, 不過好難影

補上一張床頭既相, 專登加左個燈

仲有訂造既鞋櫃, 係我地晝個款俾師傅整, 剩係下面可以擺40對鞋喇, 哈哈!!

裝修Day60 - 完工

師傅話今日會搞掂, 下星期一就會執埋d野走, 今日同老公又上去睇下, 好開心呀, 好多都好滿意, 尤其係個廚房同廁所, 好想快d搬入黎!!

其實都未係正式搞掂, 因為我地仲有d掛架要叫師傅幫我地鑽上牆, 同埋佢會睇下仲有乜野手尾要跟!

第二日帶左屋企人上黎, 佢地提議我地衣櫃既櫃桶加鎖, 如果第時有工人, 都會方便d, 咁其實我地都冇咩貴重野, 所以一直冇諗過要加鎖, 要鎖就成間房鎖架喇, 不過我地都聽話, 叫師傅加個鎖!!

另外廁所櫃門冇整到手抽, 之前係我地話唔整, 但原來唔整又好似幾難開, 所以要加返!

叫左阿哥工人星期一幫我清潔, 再下星期我地都會自己清潔下, 加埋窗簾同蚊網, 再下星期就正式入伙架喇!!

一入門口係咁

客廳

飯廳

廚房

廁所洗手盆

廁所企缸

廁所門口同埋兩個房門出面既閣仔

細房, 上面係閣仔既開口

細房仲加左個鐵通用黎晾衫

主人房全個地台床加衣櫃

買窗簾

裝修到尾聲, 仲定左10月26日搬屋, 但差d唔記得一樣重要野, 就係買窗簾, 今次係老公提我, 醒目返一次!!

之前有兩個朋友幫襯過旺角一間上樓既窗簾鋪, 於是我都搵返呢間, 但佢收七點, 早兩日放工就即刻衝去了!!

上到去冇乜人, 我同佢地講要灰色, 暗花, 唔要令身既, 剩返既其實都唔係太多選擇, 之後當然係睇價錢, 有隻七成遮光既$118/碼, 九成既$148/碼, 最後揀左平個隻!

由於廳同細房冷氣下面都有個好細既窗, 如果做窗簾布會怪怪地, 所以我地揀左做卷簾, 原來都好鬼貴呀, 仲要有最低消費$420, 我地兩個細窗都係最低消費, 已經$840!!

最後係路軌, 有大陸同歐洲既, 大陸既好嘈呀, 最後我地揀左歐洲, 咁就買左三千幾喇, 好肉痛!!

電子鎖

電子鎖流行了好幾年, 買上間屋時感覺仲係唔安全, 所以冇諗過買, 但見到好多人幾年都冇事, 所以我地今次都決定換電子鎖!!

電子鎖有咩好處呢? 當然係方便啦, 仲記得細個時, 有次媽媽開住個鐵閘, 走左去隔離屋門口吹水, 而我當時就無知, 走去閂左個閘, 結果......咪要搵開鎖佬囉, 哈哈, 仲俾媽媽鬧左一餐, 因為個陣其他人都係有排都未返, 我媽又煲梗湯, 所以要即刻搵人開鎖!!

上間屋倒垃圾要去後樓梯, 好多時都係老公負責, 但老公唔係家就係我去倒啦, 有幾次都係好驚個門會俾風吹埋, 要搵野頂住度門, 一閂埋就大鑊架喇, 而家換左電子鎖就唔駛煩了, 哈哈!!

牌子方面, 好多人都係鍾意用三星, 但我就一直對呢個牌子冇咩好感, 就算電話我都係死都唔肯換!

電子鎖有分拍卡, 指紋同埋密碼, 我就鍾意用指紋+密碼, 用拍卡既即係要帶張卡出街, 咁我用電子鎖都係貪方便唔駛帶鎖匙之嘛, 又要帶張卡咪好煩!

上網搵下, 其實唔太多選擇, 之後俾我發現左YALE+GATEMAN一齊出左一隻指紋+密碼既, 呢隻仲要有後備匙, 即係萬一有咩壞或冇電, 可以用後備匙開都得, 完全符合晒我要求!!

上手有鐵閘係度, 本來我地都想留返, 最多咪唔鎖鐵閘, 一來掉左好浪費, 二來成層樓都有, 如果我地冇好怪嘛, 但佢鐵閘個款係一閂門就鎖, 一定要用鎖匙開, 咁即係又要帶鎖匙, 最後師傅話其實如果人地要爆你屋, 你用鐵閘一樣都爆到, 唔保護得好多, 所以我地都係放棄鐵閘了!!

裝修到尾聲, 師傅催我地裝鎖, 咁佢地先可以拆左個鐵閘, 所以我地約左人上黎裝, 教埋我地點用, 以後出街唔駛帶鎖匙喇!!

裝修Day54 - 七七八八

今日星期日, 約左人上黎裝電子鎖, 順便睇下進度!!

好多野都搞掂晒了, 師傅話下星期應該搞掂晒, 而我地睇到, 仲爭油多層油, 清潔下咁!!

原本我地想係廳做一幅特色牆, 好似企缸咁, 一係鋪磚一係貼牆紙, 但諗諗下又唔想洗咁多錢, 最後將電視牆油唔同色算了, 我就揀左淺灰色, 因為我鍾意灰色, 所以出黎效果都幾鍾意!!

房既顏色就有d失望, 本來揀左隻薰衣草色, 原因係唔想成間房都白雪雪, 有d色睇下舒服d, 唔想搞到間屋咁多色, 所以兩間房都做同一隻色, 點知油左出黎比我想像中藍左少少, 似粉藍多d, 其實隻色唔係難睇, 只係粉藍黎講....如果我遲d生既係女, 係咪會怪怪地??

anyways, 定左月尾搬屋, 好期待住新屋, 又一個新開始!!

淘寶買既房門鎖, 黑色襯白色幾靚呀!

廚房都搞掂, 爭裝爐!

同上間屋一樣, 全間房都做白色地台, 另外牆既顏色就係所謂既薰衣草色!

廁所幾鍾意, 鏡櫃下面會有燈, 開左會靚d!

廁所另一邊, 浴室寶+浴屏~

呢個係訂造既鞋櫃, 應該夠我地擺晒d鞋喇卦!

客廳既淺灰色牆

買電器

話就話好多野都可以用返舊既, 但其實都要買好多野!!

電器方面, 有部份如雪櫃, 洗衣機, 飯煲, 風扇等等可以用返舊, 但都有一堆電器要新買!

數下要買既電器: 3/4匹冷氣機2部, 抽氣扇2部, 消毒碗櫃, 電磁爐, 浴室寶, 吸塵機, 焗爐

由上間屋開始, 所有電器都會係上網買, 因為真係平好多, 除左格價網, 仲有yahoo拍賣!

有一日師傅叫我要開始買電器, 我先醒起, 呢排又多野做左, 屋企電腦又壞埋, 所以好鬼煩呀!

終於有一日, 上晝做晒公司野, 下晝就專心格價, 電器型號就一早已經揀好, 所以格價同埋訂埋就ok了!!

搞左幾個鐘, 搵左三間有齊我要買既野, 仲可以一次過送黎, 最後當然係搵左平個間啦, 就約好兩日後送貨, 咁就搞掂, 睇下買左咩電器先:

冷氣機 - 樂信 - 本來想買樂聲,  比較有信心, 但聽聞兩間其實一樣, 連外型都一樣, 保養又係同一間, 但價錢一部都爭4-5百, 咁我2部就會爭成千, 師傅話其實都好多人揀樂信, 咁我就揀左呢部了!

抽氣扇 - KDK - 其實KDK係抽氣呢方面真係好出名, 所以搵返佢, 原來佢都係樂聲旗下, 更加有信心!!

消毒碗櫃 - 德國寶 - 其實都冇乜牌子可以揀, 因為我買嵌入式, 上網一睇, 其實全部都係細牌子, 德國寶算係最多人用同出名少少, 所以是但!!

電磁爐 - 樂聲 - 我買單頭嵌入式, 當然唔會買打邊爐個d, 咁其他又唔平, 樂聲叫做有信心得黎價錢又ok!

浴室寶 - KDK - 其實都係得KDK同樂聲, 但又係兩間都一樣, 價錢爭幾百, KDK抽氣方面算係強項, 所以揀左KDK!!

裝修Day46 - 裝廚櫃+浴室寶

今日星期六, 老公請半日假一齊去新屋睇!

今日上黎有兩個目的, 一個係俾埋第二期既裝修費師傅, 俾完第二期, 好快就搞掂架喇, 好期待!!

第二個目的係拎電器既保養卡返去填, 之前一次過訂左一堆電器, d保養好麻煩架, 又要限時限刻咁寄返去, 所以快d搞掂好!

上到去間屋爆晒棚, 除左有新到既電器, 仲有傢俬呀, 見到師傅已經砌左個廚櫃, 另一個師傅就裝梗浴室寶!

另外廁所已經裝好浴屏, 突然好似開左turbo咁, 進展得好快呀, 咁我應該十月尾可以搬喇!!

砌好廚櫃

裝好浴屏

師傅安裝浴室寶中~

成個廳放滿傢俬電器

淘廚房星盤

又黎淘寶了, 今次好堅呀, 就係淘星盤!!

一講星盤, 其實上間屋係用無縫石, 係就係好用, 不過會食色, 同埋好易花, 所以今次唔會再用!

上網睇過石盤, 好好好靚, 不過好好好貴, 而且size有限制, 太多野out budget了, 所以都要慳, 淘寶石盤平過香港, 但因為太重, 運費會好金, 而且有風險, 一撞爛冇得救架喇, 所以唔搏了!!

最後都係揀返最傳統既不锈鋼, 好多人都話要雙星盤, 因為好用, 其實我一直都用慣單星盤, 又唔覺有咩唔方便, 反而短租梗既呢間屋係雙星盤, 我同老公都用唔慣, 因為感覺細左!

諗左幾日, 上淘寶睇下d款, 好多都好靚, 再問下朋友雙星盤其實有乜好, 佢地話洗碗時可以一邊洗潔精另一邊過水, 又或者可以一邊浸菜另一邊洗野, 最後我都係決定用返單星盤, 我諗用一個單星盤, 再加d配件開心d!

香港睇過既, 款靚d都好貴, 所以都好快決定淘寶, 搵到一間都都有口碑, 我地揀左60cm既石下盤, 四四方方, 但係唔起角既, 因為起角會難清潔架, 另外再加左兩件配件, 同埋之前係ikea都買一個籃, 希望會好用啦!!

配件一

配件二, 係另一間鋪買既