敗了座廁+洗手盆

一連寫幾篇, 呢個標題係敗了, 好明顯係我敗家了!

去完新屋睇裝修, 食個飯後就係荃灣睇座廁同洗手盆, 其實之前都睇左, 今次叫做黎俾錢訂!!

之前黎係睇中ROCA既一款二千幾既座廁, 仲有係TOTO既洗手盆, 加埋係$4400, 但其實我一直有留意一款TOTO座廁!

今次黎到原來呢度我有留意個款, 有乜特別呢? 就係超旋式沖水, 會成個廁盆都沖到, 同埋聽聞唔會彈水, 仲有係佢聲稱個面係易潔, 網上D人就形容係唔會痴便便, 不過呢個就要試過先!! 除左呢2樣, 仲有係個廁所邊, 一般座廁個內邊都係有個凹位, 比較清潔, 呢款係冇個凹位架!!

呢個TOTO係新款, 有咁多好處, 價錢當然亦相當好, 標價$6800, 有折, 折後既價錢係平左好多, 但比起原先想買既ROCA係貴左成倍, 當我係度諗梗時, 老公就話: 你想買就買啦!! 個下好感動呀, 佢竟然咁縱容我, 上次富士皇已經係咁架喇, 今次又係咁!!

既然佢咁講, 我就決定買TOTO座廁+洗手盆, 襯返一SET好睇D嘛(買野梗有藉口), 結果, 是日我又成功敗家了!!

其實成個裝修都out晒budget了, 黎梗買既野要慳錢d先得喇!!

洗手盆一早睇中, 我同老公都鍾意呢款, 所以唔止我一個敗家架!

TOTO座廁

睇下佢個出水位, 就係所謂既3D超旋式, 除左呢兩個口, 最底都有個位出水!

裝修Day11 - 搭棚+鋪電

雖則話yahoo blog執笠, 但我都仍然會寫住先, 到時一次過搬家啦!!

Day 11係星期六, 因為又約左師傅傾野, 老公要又請下晝假喇!

上到黎見到已經搭晒棚, 同埋鋪左電, 仲見到d新既窗放晒係度, 應該下星期就會換好窗喇!!

今日要同師傅傾傢俬點造, 造既傢俬有廚櫃, 浴室鏡櫃, 洗手盆櫃, 睡房地台床, 衣櫃, 電視櫃, 飾物櫃等等, 其實都好多野, 最初諗住一粒鐘搞掂, 仲未食野就上黎, 結果傾左兩個鐘先走得, 餓死我地!!

每件傢俬都要我地自己諗裡面間隔, 用咩色, 材料等等, 師傅下星期會俾d木板我地揀, 聽起黎好開心, 其實真係好頭痛架, 選擇困難症又復發了!!

師傅仲催我快d俾所有size佢, 包括2部抽氣扇, 飾物架(其實係擺漫畫同公仔), 電磁爐, 煤氣爐, 消毒碗櫃, sink盤等等, 但係又唔可以買住喎, 因為未有耐裝, 即係而家要揀晒款, 但係又唔買得, 我好驚揀完到時轉軚呀!!

廚房見到鋪左電既喉, 大部份係13A

呢個洞之前係燈掣, 將會封左佢

呢個係我地既房, 我地整左好多電掣, 哈哈!

廁所, 見到有D洞係渠位, 應該好快鋪喉了!

Yahoo Blog 關閉

今日收到個壞消息, 就係yahoo blog將會關閉, 嗚.....咁我以前寫d野點算呀? 話就話可以備份, 但始終都係好唔方便, 當初都係貪yahoo大公司唔會執先會將舊blog轉黎, 而家又話關閉, 太過份喇!!!

買磚

睇完裝修, 我地就入元朗買磚了!!

之前係旺角同元朗都睇過, 最後都係入黎買, 原因係有個美女院友既老公係度做, 可以計平俾我!!

呢間鋪多數都係賣意大利磚, 價錢唔平, 其實上次黎我地都睇中左廳房既木紋磚, 本身有隻更鍾意, 但實在太貴, 所以揀隻平少少既!

另外揀埋廚廁既磚, 本身想跟返上間屋, 企缸揀晒一隻磚, 另外牆同地揀一隻, 最後學人玩特色牆, 雨淋花灑個位一幅, 其他牆身就另一款, 地下又另一款!

特色牆本身揀左隻好似百葉簾咁, 但冇貨, 之後揀左隻黑色有橫紋既, 配灰色牆身, 黑色地板, 今次個廁所我想整黑d, haha!!

除左企缸特色牆, 鏡櫃同洗手盆中間幅牆我都想玩特色, 所以揀左黑色紙皮石, 我覺得好型呀架!!

廚房磚我地揀左好耐呀, 因為同老公意見不一致, 我本身係想廚廁都用灰色, 但老公俾左個廁所我玩, 廚房佢想用白色, 咁廚櫃就會揀白色, 點知連牆身佢都想白色喎, 我就好反對啦, 鍾意白都唔駛白成咁卦, 結果.....佢又就我, 揀灰色!!

本來揀左隻, 點知.............又冇貨, 老公幾鬼開心, 之後又要再揀, 最後揀左隻非常非常淺既灰, 配深灰地板, 咁就搞掂晒全屋磚了!!

其實揀個陣我地冇專登理佢係意大利定大陸磚, 亦冇計過幾錢, 到選好晒佢幫我計數, 平左好多俾我, 好開心, 咁我仲問佢其實我揀個d係咩國家, 佢話除左廚廁地板係馬來西亞, 其他都係意大利, 原來我真係會對大陸磚睇唔上眼, 老公仲話我真係識揀, 我話係呀, 揀人例外!!

我地係度玩左兩個鐘, 其實辛苦在要將d磚襯黎襯去, 之前以為好易, 鍾意就得, 原來要將鍾意既野併埋一齊又未必會襯, 而家揀晒出黎效果希望係靚啦!

我一早話左要灰色木紋磚, 本身想揀淺色d, 但老公鍾意深, 所以揀呢隻!

企缸特色牆配淺灰牆同黑色地板, 變成咁!

鏡櫃下既紙皮石, 間鋪得呢塊窄鏡, 左邊係淺灰牆磚

廚房磚, 叫有少少少少灰色啦, 唔好全白就得架喇, 另外配灰色地板!

裝修Day4 - 拆完了

星期六, 我地又上新屋了, 今日係同師傅傾好電制位, 本身包35個, 因為聽過正常都係30個, 師傅話多除少補喎!

上到去見到d野拆晒掉晒了, 真係好快手! 同師傅夾電制位, 傾下傾下最後成38.5個, 哈哈, 我地實在太貪心, 成日驚d位冇電用!

除左電, 仲有窗, 因為我地會做過晒d窗, 咁要傾埋做邊款窗, 邊個位要窗花, 同埋咩款窗花等等, 其實之後我仲會加蚊網, 不過到訂個陣先再講!!

原來傾好晒都成兩個鐘, 餓死我地喇, 師傅要我報埋抽氣扇同冷氣尺寸俾佢, 所以我又要好努力做功課買邊款喇!!

裝修日子真係好好好忙呀, 我會加油架喇!!

拆晒野既廁所, 連個熱水爐都拆埋~

拆晒野既廚房, 我地只拆兩幅牆

買抽油煙機

咁大個女未買過抽油煙機, 上間屋係用上手既, 上網睇左好耐資料, 各大討論區都係推介"富士皇", 但價錢唔平呀, 所以我諗左好耐!

各用家都讚富士皇吸得之餘又夠靜, 而消委會更加係第一位, 但最平個部都要差不多5千, 多人用斜板個部就8千, 真係好貴呢!

如果唔買富士皇, 我應該會揀TGC, 因為靚仔d, 而我地去睇過現貨, 都唔算非常嘈, 不過吸力就好似一般!

有一日放工就專登同老公去左家居樂睇富士皇, 點知一睇就中伏了, 因為真係好靜, 吸力又幾好, 老公都好鍾意, 佢又做魔鬼話睇o岩就買啦, 唔好行多轉喇, 所以我地就揀左白色平板個款, 因為平d, 乖乖落訂了!!

買燈

因為舊屋好多野入牆, 所以新屋都好多野要買, 有一日同老公去左旺角行街, 其實諗住睇下d磚同座廁等等, 臨走既時候經過一間燈飾鋪, 俾門口既花花燈吸引左我入去!

個陣屋都未收, 唔應該咁快買電器, 本住睇下既心態, 點知俾個sales講幾講, 話佢地呢個鋪位最後一日, 因為俾"莎莎"租左, 咁佢地另外個鋪位又唔夠擺貨, 所以要減價清貨, 雖然未必係真話, 但係d價錢又幾吸引!

上一間屋既燈我地係上大陸買, 係幾平, 但運到黎有d燈爛左, 只係唔顯眼我地就由佢, 咁老公話費事上大陸買了, 香港買包埋運費同安裝, 我地又唔駛搭車, 慳時間慳車錢慳勞力!

本身睇中一盞花花燈, 之後再見到另一盞, 唔知點解我鍾意花花, 咁個sales就係咁話減俾我, 減到半價, 最搞笑係老公係咁叫我買, 佢話難得佢都鍾意, 因為我地好少鍾意同一樣野架, 上間屋既燈我地都係一人揀一盞, 今次佢竟然同我講鍾意個兩盞花花燈, 好好笑!

之前既燈用米仔胆, 成日燒, 換到老公發炆憎, 今次呢個本來都係, 但sales話可以轉LED, 仲可以平賣俾我地, 老公聽到當然好開心, 就係咁, sales+老公係咁叫我買, 我地第一樣買既野就係兩盞燈, 佢最遲可以等到11月先送貨, 咁我地可以擺下先, 老公話遲d太多野要買, 快d買煩少樣喎!!

裝修Day2 - 拆拆拆

裝修第一日遇著8號風球, 唔知師傅有冇開工呢? 我自己都冇返工, 費事問師傅了!

第二日師傅叫我除左買磚, 仲要睇定d門同門框, 因為訂造都要時間, 原來門框好貴架, 我諗買三度門+門框要成萬蚊了!!

另外仲要買冷氣, 因為我會換房個兩部, 師傅下星期會換窗, 咁順便幫我裝埋, 房有窗台位, 本來想換變頻式, 因為慳電又靜嘛, 但個窗台位唔夠位, 真係細到嘔, 只可以裝3/4匹既窗口機! 之前用開日立, 但今次想轉panasonic, 因為日立我又唔覺得話好靜, 同埋好似d comment差左咁!

好多人話panasonic同rasonic係一樣, 只係牌子問題同價錢會爭幾百, 咁睇外型佢地又真係一樣, 所以我仲猶疑梗買panasonic定rasonic好!

另外會睇埋浴室寶同廚廁兩部抽氣扇, 真係好多野要睇呀, 人都癲!

放工同老公上左新屋, 嘩, 只係短短1-2日, 已經全屋拆晒了, 地板都起埋, 好快手喎, 我地搵唔到燈掣, 只係用手機既電筒照明, 影左幾張相就走了, 過兩日再上過去!

客廳, 部抽油煙機拆左放左係度, 遲d會掉!

飯廳, 呢d應該係廚櫃同星盤, 冷氣我地會保留, 師傅包住左!

廚房, 因為廚櫃遮住既位我地會唔郁, 所以d磚都唔會全部起, 另外原來個煤氣錶係地下, 呢個角位第時報錶咪好辛苦, 要諗下改位!

廁所洗手盆位, 中間白色係座廁位, 原來佢連呢個都拆埋, 唔知師傅自己點去廁所呢?

廁所另一邊, 即係企缸位!

主人房, 剩係起左地板~

細房, 變左雜物房

裝修報價+拜四角

收樓第二日, 約左裝修上黎睇, 大頭蝦既我漏左封律師信係公司, 地產話叫律師樓fax去佢地鋪幫我收, 點知律師樓條友話佢放假, 仲要冇同事跟喎, 擺明就唔想跟野, 呢間律師樓真係好差, 唔止呢單野, 我買賣樓都係用同一間, 賣樓既錢我仲未收得晒囉, 佢再唔俾我要唱衰佢呀!!

星期六起身就返公司拎返封信先, 同老公食個豐富lunch就去新屋了!!

管理處收五點, 老公同裝修傾住先, 我就衝落管理處搞轉名, 入紙裝修同申請住戶証!

新屋好多野要整, 基本上係要全爆, 只有廳冷氣同熱水爐可以留返, 其他都要換過晒呀!

我地剩係搵左一間裝修報價咋, 因為上間屋都係搵佢, 老公好滿意, 所以唔想煩了, 連傢俬都會搵埋佢!

傾好晒就各自歸家等報價, 今日天氣好熱呀, 我地流左成桶汗, 夏天真係好辛苦!!
-----------------------------------------------------------

收樓第三日, 中午約左老公同6299+親戚飲茶, 飲完就去街市買拜四角既野, 係街市既人教: 香燭元寶(拜四角用既), 燒肉, 豆付芽菜, 紅蘿蔔(插香燭用), 蘋果, 以上既野都要準備五份(香燭元寶兩份), 基本上你話拜四角用人地就識執!

而擇日就睇人啦, 我都算半個神婆, 信呢d野但係人又懶, 只係上網睇下邊日ok, 即係冇話大忌, 另外就係睇吉時, 冇沖我地生肖就算了, 13:00-15:00呢個時間真係good fit!

上到新屋, 親戚們參觀一番, 我地就準備好拜四角, 由於個浴缸會拆, 所以我地係浴缸化寶, 結果搞到好大煙, 開晒窗都仲係好焗, 我同老公對眼被煙攻到喊晒, 親戚們就入左房通風位等我地, 最後真係太大煙, 燒剩少少我叫老公淋熄佢了, 反正鋪頭個女人話唔燒都得, 我地燒左大半好好啦, 再燒我驚有人報火警!

搞掂晒就走了, 上手剩左d燈, 煮食爐, 盆栽都好新, 所以親戚們認領晒了!

下次再黎就應該係開始裝修了!!

收樓日

黎到收樓日, 我係揀左星期五, 原因係之後星期六日方便做野, 上次買樓都係咁, 真係好好多架!!

放工即刻飛奔去地產鋪拎匙, 由於老公未放工, 我搵左住附近既二佬二嫂陪我上去(夜麻麻一個條友上去好恐怖嘛), 點知業主俾漏左住戶証, 好彩佢住附近即刻拎返落黎!

二佬二嫂帶埋姪女一齊, 上到去第一次望到個夜景, 都唔算好差, 好過之前海景夜晚其實係黑到乜都睇唔到!

帶左把尺度下, 大致同地產之前俾我既圖一樣, 咁老公仲未到, 而二佬好關心我地個會所設施, 因為佢二期冇gym, 我會幫佢做張住戶証, 所以即刻落樓下睇下個會所!

呢度有網球場, 籃球場, 泳池同gym房, 泳池都係普通泳池啦, 好處係冇乜人, 因為得三座, 佢地二期有九座, 成日都好多人, 而gym房唔算好大, 我地睇時得一個女仔係度, 仲有張按摩椅添!

問管理處拎左d申請裝修同住戶証文件, 老公差不多到了, 於是又上返去, 睇幾下我地就走了, 可能係第二次買樓, 今次冇上次咁興奮了!!

驗樓

終於都驗樓了, 估唔到業主唔係交匙俾地產而係親自開門俾我地驗!

早幾日打完風又落完大雨, 係驗樓好時候, 我地主要係睇下有咩需要換, 有個心理準備嘛!

首先窗應該係唔駛換, 因為冇漏水痕跡, 只係殘左少少, 唔緊要啦, 希望抺下可以新淨返, 不過窗應該都冇乜人留意架啦, 換窗要搭棚太貴喇, 唔想搞!!

其次廳冷氣係窗口式, 好夠涼喎, 其實換部窗口式好簡單啫, 住落隨時換都得, 所以仲用到我就唔換喇, 慳返d嘛, 不過房個兩部就好懷舊, 必換!!

另外全屋既門應該都要換, 上手租客自己油過晒間屋(唔明點解租兩年都要油過晒), 不過油得好差下, 因為出晒界, d窗花同冷氣都可以見到d油, 激死, 門油完都好似幾醜樣下, 同埋應該係廿幾年原裝門, 所以應該都會換!!

廚房....全爆全換, 而家係L形廚櫃, 但其實地方好闊, 我密謀梗做U形!

廁所...全爆全換, 另外我想將洗衣機放廁所, 所以會改細個企缸, 不過只係我想像, 希望師傅可以做到!

鐵閘好新, 好似只係用左兩年, 又係租客換, 本來我想轉指紋鎖, 但如果有鐵閘, 掉左佢又浪費, 唔掉既話都係要帶鎖匙出街, 好似好無聊咁, 點算好???

另外全屋都會換水電, 因為又係原裝冇換過, 咁我地仲會換埋地磚, 全屋剷灰油油!

成交日係8月9日, 放工後去收樓, 8月10日約左裝修上黎睇, 8月11日拜四角, 8月14日開始裝修, 黎梗有排忙架喇, 要加油!!!

又俾D相大家睇下先, 係飯廳, 客廳景觀同埋客房