北歐蜜月之旅 - Day 2 (冰島)

第二日, 我一早報左bustravel既southern iceland, 八點就黎接我地, 呢個tour一星期搞兩日架咋, 今日架車係十幾人, 不過我地冇咩點交談, 所以唔知人地邊度黎, 剩係知冇中國人囉!

tour guide同司機係同一人, 都幾好人架, 沿路一直講下冰島地理環境, 生活習慣等等, 不過我太眼瞓, 聽聽下瞓著了, 哈!!

今日去左幾個地方, 首先去左個地方叫Eyrabrakki, 係舊漁村, 留左五分鐘影下相就離開了!

之後去左個地方休息15分鐘, 因為坐得太耐車, 俾人去下廁所, 飲下咖啡, 之前仲驚出街去廁所要俾錢(外國太多), 好彩佢地會車我地去d唔駛俾錢既地方, 仲可以睇下有咩手信買!!

休息完就去Skogafoss, 係一個瀑布, 行近少少都會俾d水彈濕呀!! 係加拿大之後, 我好耐冇睇過瀑布喇, 雖然呢個冇加拿大既Niagara咁宏偉, 不過都幾吸引, 仲有附近係大草原, 有d冰島馬係度食草, 好悠閒架!!

再下一站係一個黑色既沙灘叫Reynishverfi, 之前以為同希臘一樣係黑色既沙, 原來係石黎架, 呢度好大風, 都唔知係落雨定係飛d海水黎, 行得都幾辛苦!!

之後就放飯了, 去左Vik既一間餐廳lunch, 第一次係冰島用餐, 一個湯都要成舊水呢, 我地叫左個湯, 一個cheese burger+chips, 再加個唔知咩飽, 一杯汽水, 就二百幾蚊了, 好貴呢!!

食飽飽去左glacier Solheimajokull, 落車後要行一段路仔先到, 勁大風呀, 真係可以吹得郁個人, 加埋d冰, 真係好似子彈咁迎面打黎, 好鬼痛! 但係呢度好靚呀, 對我地亞洲人黎講, 真係冇咩機會見識到, 所以我地係咁影相呢!!

最後一站係Seljalandfoss, 又係一個瀑布, 仲有好多未溶既雪係附近, 我地又逗留左20分鐘左右, 大家影下相行下就回程了!!

返到Reykjavik都五點, 好彩而家遲天黑, 我地返到去就行左去大教堂影相, 之後影下呢度既街景, 就返去煮飯了!!

是日行程好開心呢, 雖然只係觀光, 但可以感受到大自然既奧妙, 我最初驚悶, 好彩同老公都覺得好開心呢!!

呢幢一樓係我地住既apartment, 全層窗都係我地架, 太焗所以我地開窗, 不過好嘈呢!