**Minnie and Lou**: 爆忙的婚前一天

由於之前都驚還衫還餐飽, 所以同老公租衫都同一間, 咁我拎衫還衫其實只係銅鑼灣+尖沙咀, 是日時間表都好鬆下, 老公舅父會幫我地車野, 不過唯一慘係我要返一返公司, 因為同事係美國未返, 我阿頭唔識開單, 要返黎幫佢開, 咁我同老公就分頭行事, 佢去尖沙咀既金鳳凰拎衫, 我就返工!!

是日原定行程: 14:00帝景酒店CHECK-IN>15:00返工(老公拎衫)>16:00 銅鑼灣拎婚紗禮服>18:00新蒲崗拎花球>18:15黃大仙拎曲奇餅>18:45慈雲山拎人情箱+簽名筆>19:30返屋企車物資去酒店>20:00返二佬家同屋企人食飯(老公同舅父返佢地家食飯)

點知全部都碰釘, 帝景酒店14:00未有房俾我, 等到14:30都冇我地就走了, 之後我返工又做耐左, 成17:10先走得, 老公自己過去試住先, 我17:30到佢仲試梗, 本來呢度預一個鐘左右, 點知原來我d裙有好多層布, 改左好耐, 成19:00先走得!!

咁都未夠呀, 遇著放工時間, 港島區例牌大塞車, 我地塞左好耐呀, 可憐我買曲奇餅既女仔18:15等到我19:30我都仲係對面海, 咁我諗住改行東隧, 就改約佢係油塘等(佢住將軍澳), 最慘最慘係佢舅父完全唔識路, 剩係靠GPS, 我都專登打俾勁熟路既二佬問, 點知佢唔信, 銅鑼灣去油塘, 明知紅隧大塞車, 咁正路行東隧啦, 佢死都要信GPS教佢行紅隧

, 結果就o徒左好多時間, 個女仔唔等我了, 佢話要返屋企做功課, 咁我就夜d去將軍澳搵佢!!

全部都改晒時間, 本來諗住20:00食飯, 點知屋企人都到晒既時候, 我仲塞梗車囉, 又驚花球個度收工, 拿拿聲去左新蒲崗拎花球先, 之後就入將軍澳拎曲奇餅了, 入到將軍澳又迷下路咁, 佢舅父真係死都唔信人講野架, 一味信GPS, 我地行左好多冤枉路!!

拎完曲奇又趕去慈雲山搵我朋友拎人情箱+簽名筆, 期間勁多電話黎, 攝影師, CUPCAKE, 小巴等等都打黎confirm明天事項, 我電話係誇張到冇電熄機, 連尿袋既電都冇晒!!

拎人情箱我朋友忘記俾埋keys我, 結果又等左陣, 拎齊晒野已經九點, 我地趕去帝景checkin同放低d野, 個陣兩邊屋企人都冇等我地就開左飯

本來我諗住煲葯都冇時間, 最後佢地車左我返阿哥度先, 佢兩個再返屋企搬物資去酒店, 我成十點幾先返去食飯, 佢地個個食飽望住我食, 仲要係咁催我, 因為趕住去酒店沖涼上頭!!

食飽飯我地仲要去超市搬兩箱水for聽日, 之後先去酒店沖涼, 佢地就忙於幫我佈置, 仲諗住老公冇咁快, 點知我未沖涼佢就打黎話已經上完頭!!