Candy Corner 構思

candy corner又係後期先決定整既, 因為驚d人悶, 同埋都算係佈置既一種, 於是又上網搵下資料, 暫定有以下東東:

1. cupcake - 朋友介紹了ms.b, 仲要咁好彩有期, 好快咁就落左訂, 預計整80個cupcake, 係紫色系+皇冠款, 好想整南瓜車但佢話整唔到, 大約$1200
2. 爆谷機+棉花糖機 - 打算淘寶買, 其實好多人婚後物資都有賣, 但都係紅色, 我打算買粉紅色, 大約$400
3. m&m - 可以印埋名,相或圖案, 打算印三款: 名,日期,圖案, 深,淺紫+珍珠白, 聽聞會甩色, 所以一定唔會印相, 一來會印得差, 二來唔想人地食自己個樣! 但係美國訂完佢剩係送美國同加拿大, 我有好多親戚朋友係加拿大, 仲會黎飲, 所以可以托佢地帶返黎, 點知運費貴美國幾倍, 而家要搵下有冇人係美國幫我帶喇, 大約$550
4. jelly belly - 雖然個個都話難食, 但因為多色揀, 可能會買少少紫+白 大約$100
5. 其他紫系橡皮糖, 棉花糖, 或者加拿大親戚幫我買, 佢地次次返黎都會帶一堆小小包朱古力, 應該好平 $200

用品方面:
1. love plate - 已經confirm買leona既婚後物資
2. candy jar - 我想買d肥矮款方便拎, 應該會淘寶買
3. 糖鏟/夾, 糖袋等等

原來呢個item都洗好多, 又一敗家之作喇, 用品我遲d會賣返出去架喇!

Confirmed MC - Alvin

上次話搵唔到mc, 之後上網搵一輪後, 原來男mc又平又好真係少之又少, 咁唯有向冷門個邊出發, 我不嬲都鍾意冷門野, 誤打誤撞搵到一位叫Bryan Tam, 一位叫Alvin, 同一時間email問兩位, Alvin覆得好快, 而且價錢超級平, 一見到已經好心動, 而bryan就幾日後覆我已經full了!

約左Alvin琴晚出黎, 原來佢係屯門人, 所以我地約左係荃灣, 其實我地都冇乜要求, 只要佢樣貌端正同埋唔寸就得, 出到黎大家好似朋友咁傾計, 都幾好傾喎, 佢個樣都ok架, 原來佢正職係做training既HR, 所以都係靠把口搵食, 亦都因為佢有正職, 所以唔方便四處賣廣告, 通常都係朋友介紹!

我地都係講下佢會做d咩, 聽落幾好, 佢會大約四點半到場打點, 同d兄弟姊妹傾下rundown, 而我地搞結婚過程有咩都可以請教佢, 佢話其實佢既職責係將我地既野串連晒, 佢講野都直接, 真係有個句講個句, 不過講野有少少快, 廣東話唔好個d(例如我表姐), 應該會聽唔切佢講乜!

佢講完佢講個d, 我又問下佢既背景, 佢又俾d出job相我地睇, 其實我已經好滿意架喇, 因為真係好平, 呢個價錢係封利是俾其他人都要啦, 佢話唔駛即時覆佢, 可以返去考慮下先都ok, 佢又唔係律師, 唔駛話出襯黎都要收錢, 大家當朋友出黎都ok架, 如果confirm左, 結婚前仲要約出黎傾下了解下我地添, 咁我又問佢一個月大約出幾多job, 因為我好驚個d一個月出十幾場個d人呢, 會唔記得我地而講錯野, 記錯野等等, 好彩佢話佢暫時一個月都係兩單左右, 不過今年好似真係好多人結婚, 佢話就算接多d都係有個限度, 因為佢都要休息, 況且佢又唔係收得多, 做mc係覺得好玩好開心!!

傾完晒佢就走了, 成個過程應該冇半個鐘, 佢話可以遲d覆佢, 但係我同男友都費事煩, 同埋都幾滿意, 轉個頭就覆佢ok了, 哈哈, 希望我冇揀錯啦!!

男友事後講返, 有位兄弟同佢講, mc唔好預佢, 因為真係好辛苦, 男友就話: minnie話費事你地辛苦, 俾錢請mc喎!  之後位兄弟話好感激我地, 哈哈, 男友又一次欣賞我既決定喇, 我仲乘機寸返佢最初我話請mc時佢既反應添! 

3rd Pre-wedding (Majesty) - 拎相簿

等左咁耐, 終於都有第一本我地既結婚相簿, 就係Majesty既細相簿, 內有10張相!

本來琴晚同男友放工一齊上去拎, 但係佢呢排勁忙, 連返左10日都冇放假仲要OT, 仲要踩到年廿九先有得放, 咁我唯有自己去上環拎啦, 講起就激氣, 之前明明話2星期可以拎相簿, 打到去又話要一個月, 約左上星期一拎, 但係我病左打去改期, 就改左琴晚, 點知上到去個女仔話今晚冇booking喎, 仲死話我記錯, 我一約完就MARK左係月曆, 點解唔可以話你地冇MARK到呢??

算啦, 佢都俾我拎, 個個都走晒, 得返一個女仔係度, 一收到相簿揭黎睇, 其實冇期望就唔會有失望啦, 當然D相佢真係亂咁排次序印, 但估唔到有一張可以特別到係左右反轉左, 我真係O晒咀, 問個女仔點解會咁, 佢可以同我講笑話....D人勁囉!   真係吹賬, 之後佢問我拎左DVD未, 我話拎左, 但係有2張睇唔到, 於是佢即場再燒碟俾我! 本來我有諗叫佢重印本相簿架, 但係真係費事煩, 呢度又遠喎, 我真係唔願再黎, 都係個句, $688包衫包化妝仲有本相簿, 仲想點喎??

俾大家笑下啦, 呢個錯版相當係留念啦!!

原裝相

相簿印出黎

好彩相簿封面係我鍾意既紫色咋~

氣球公仔

上篇寫完佈置, 首先講下氣球公仔, 其實係朋友既男朋友做呢d, 見佢成日提住, 咁就問下佢攞d相睇下, 又ok喎, 之後就再自己上網搵d公仔諗住俾佢做!

暫定想做項目係
1.一對4.5呎公仔- 放門口俾人影相 
2. 花 - 其實唔知有咩用, 但係見到好靚, 可能整黎放reception/相簿區/candy corner 
3. 南瓜車 - 因為book唔到德藝會, 冇得同南瓜車影相, 想叫佢整架俾我, 但原來要整大架先靚, 可惜我個度冇咁大地方, 可能要擱置, 或者諗過其他~

俾大家睇下相先, d花花相係佢send俾我, 其他都係我上網抄落黎~

補返個報價先, 因為都幾多人問我, 公仔一呎高係$380-$480, 連埋座4-6呎高係$580-$680

會場佈置

其實一直都掙扎搵唔搵佈置公司, 但budget有限, 搵佢地都唔可以有d咩突出之作, 而且佢地做到既野好似自己都做到, 例如放d燭台, 滕球, backdrop等等, 燭台同滕球自己買都得, 博藝會本身包左backdrop, 我諗佢唔會變到好肉酸卦, 於是就打消左搵佢地既念頭!!

暫時有以下idea, 本身有一位兄弟係part time做拆呢d佈置, 識拆應該識裝卦, 而且佢話都識人做呢d, 應該冇咩問題!
1. 毛毛地顫 - 諗住自己淘寶買, 到時叫兄弟鋪, 暫定係白色!
2. name board & 座位表 - 會搵IWEDDING印, 一直以為呢d好貴, 佢地報完價又ok喎, 可以用返佢地design既logo, 兩樣加埋一千有找
3. candy corner - 呢個係後期先決定, 一黎參加完朋友婚禮覺得生息不少, 二黎我六點証婚後到食得有兩粒鐘剩, 驚d人會悶, 尤其我屋企多小朋友!
4. 氣球公仔 - 因為朋友既男友係做呢d, 見佢不停係度賣廣告, 又覺得氣球公仔幾特別, d人可以用黎影相, 又一解悶用品, 報完價覺得可以接受!
5. 裝飾品 - 燭台, 滕球, 氣球, 大量羽毛 (因我勁鍾意羽毛)

以上既野會再另外寫blog介紹, 我個人好怪呀, 成日驚黎到既人會悶, 要搵d野俾佢地解下悶, 又想d野特別d, 唔想佢地覺得我地既婚禮咪同普通婚禮一樣, 希望可以做到某方面令佢地難忘, 或者係"入場費"會係俾得值得!

To Do List - Jan~ May 2012

踏入2012年, 好似好多野都差左, 工作頭頭碰著黑, 又病左, 其實真係好擔心今年會好黑, 話晒今年好重要架嘛, 起碼唔可以成日病先, 病左點搞結婚?

呢排搵mc, 點知tony full了, 再上網搵下其他人, 都冇咩選擇, 搵到一個叫alvin既人, 網上得2個comment, 約左下星期見面, 希望ok啦!

年紀大記憶力衰退, 又要寫低to do list, 寫到去五月因為五月係我生日月, 預左會冇咩時間, 所以希望五月前搞掂以下項目, 六月既半年倒數進度表會填滿九成!

1. mc - 進行中, 希望一月搞掂
2. 媽咪衫 - 預計媽媽&99每人一套
3. 花球 - 有心水不過未問價
4. 手花襟花 - 兄弟姊妹有心水, 但四大長老同哥哥們未知好冇DIY
5. 姊妹裙 - 掙扎梗好唔好淘寶
6. 佈置 - 應該唔搵佈罝公司, 自行訂name board, 座位表, 毛毛地顫等等
7. 花車佈置 - 買材料準備DIY
8. CANDY CORNER - 買CANDY JARS, 睇定要乜糖叫加拿大表姐到時買完帶返黎
9. 結婚証書套

暫時諗到咁多, 隨時再加!

2012年的開始

踏入2012年, 似乎旺氣已離我而去, 呢幾日好多麻煩事!!

首先mona lisa試衫搞到一鑊泡, 之後到搵mc, 想搵既tony佢已經full左, 唔開心! 再加埋公司突然好多野做, 平時都可以準時放, 早兩晚竟然八點先走得, 仲要server down晒, 真係勁煩呀!!

除左呢d, 仲有男友病左, 呢幾日又好凍, 我屋企係比其他地區再低幾度, 幾晚都凍到瞓唔到, 男友病左鼻鼾仲勁左, 帶住耳塞都聽到呀, 冇陰公! 其實好多人都病左, 屋企, 公司, 搭車都充滿病菌, 好多人都唔掩口咳, 真係好討厭, 係唔夠瞓+充滿病菌環境下, 我都頂唔順作病喇, 不過我不嬲都病向淺中醫, 今晚就去睇中醫, 下星期就會冇事架喇!

不經不覺距離結婚日子仲有大約11個月, 之前就好似仲有好多時間, 一直係度懶, 而家真係唔懶得喇, 就快過年, 之後mona lisa影相揀相, 搞下搞下得返9個月, 要勤力d喇!!

5th Pre-wedding (Mona Lisa) - 轉衫

上篇寫完試衫後, 就發生左好多事, 點解會轉衫呢? 因為我之後先知原來"外租晚裝"係可以揀黎影相, 仲俾人寸我"白痴"!! 咁佢"外租婚紗"唔揀得, 我又點知"外租晚裝"會揀得喎!!

咁我再睇下, "外租晚裝"我覺得靚好多喎, 於是打俾個sales問下可唔可以試多次, 佢話唔得呀, 但係可以到影相日俾我試, 如果ok就即轉, 咁我見到有一件好鍾意, 就同佢講轉呢件, 唔要桃紅色晚裝喇, 點知佢又話有問題, 因為"外租晚裝"係唔可以影外景, 只for影室內, 但我已經有一套婚紗係for室內, 咁就多左件室內, 又少左件外景!

事情開始複雜, 咁...我即係要再揀過, 好彩我之前偷得多相咋, 即刻由頭睇過, 又上網check返到底邊d係可以影外景!

簡單黎講, 我要係試過既衫裡面揀一條可以出街既影外景, 由於已有2晚裝, 冇理由成輯相一套婚紗都冇嘛, out下out下最後剩返2選1, 我就周圍問人意見, 越問越煩呀!!

俾大家睇下先, 就係呢2件2選1:

1.

2.

問左好多人, 九成都係揀1, 主要原因:
1. 多d野睇, 2.太plain
1. 著得我瘦, 2.我著得太肥

但最煩既係, 男友揀2, 其實我自己都鍾意2, 因為覺得1唔似婚紗, 但係俾其他人講到我唔敢揀, 去到最後朋友+blogger - Fanta一句"簡單就是美", 哈哈, 好鍾意呢句, 我就揀左2, 最多我努力減肥啦!

另外我話好鍾意既晚裝係呢套, 會影室內, 希望我可以著到啦, 唔係到時又煩架喇!

5th Pre-wedding (Mona Lisa) - 試衫

今個元旦日, 去左Mona Lisa試衫, 之前上網揀左20件試, 佢地婚紗有好多選擇, 多到我都唔識分, 但係晚裝就只得95件, 有好多我都麻麻地, 由於影左幾輯, 所以想搵D未試過既款, 同埋我唔想同太多人撞衫, 所以多數揀冷門!

一去到等佢拎衫黎, 之後就開始試了, 個女仔都好快手, 快到連我男友都話, 嘩...咁快換完既? 好喇, 佢一開始就幫我試影戶外既, 每試完一件都會影一張相, 再放電腦等我揀, 唔知點解有好多我都冇印象自己揀過, 原來睇相同現場睇真係會唔同! 不過佢地既裙都好新淨, 一個款係有好多件, 點解會知呢? 因為我見到其中一個款, 一條俾我試梗, 另一條有個女仔影梗相, 仲有一條又有第二個女仔試梗, 所以我估計佢一個款真係造左好多條!

試完出街就試影室內既婚紗, 講真我著婚紗都著到有D麻木, 試完咁多件我同男友都覺得當2件係最好, 因為係掛頸款, 我未試過吖嘛, 而2選1入面, 1條係少少似羽毛, 我好鍾意羽毛架, 另一條就係珠鏈, 最後揀左珠鏈, 因為GRAND D, 襯返個室內同埋佢有拖尾而另一件冇!!

輪到揀返室外景既衫, 真係好頭痛, 當中有兩件黑白色我都鍾意, 但係太似樣只會揀一件, 其中一件就係江若琳有著, 之後仲見到係勁多人揀左, 所以我OUT左呢件而揀左另一件, 呢件男友本來唔鍾意架, 話似睡衣喎, 但係我又未試過著呢個款, 所以堅持左要呢件, 男友睇左陣, 又望下呢條裙影戶外既相後又話好似幾好, 最後就CONFIRM呢件!

第三件揀咩好呢? 男友好鍾意一件桃紅色, 但係我自己就一般啦, 覺得有D似姊妹裙, 同埋我又冇叮一聲既感覺, 不過佢又真係好鍾意喎, 話我著桃紅色好睇, 咁HOLD住先啦, 而另一件HOLD既係旗袍, 佢又好鍾意我著旗袍, 但係呢件都係OUT架喇, 因為旗袍實在唔襯戶外景, 同埋咁高叉要我影室外真係會有D麻煩呢! 不過到最後我地都係話LAST一件後覆, 等我地諗好戶外影邊先!

我揀完就到男友揀啦, 以我所知, 有九成男人係度試完都會加錢UPGRADE, 因為佢地包既男禮選擇太少, 得5個款, 而且係勁普通既款, 佢再會放埋D靚好多既UPGRADE款係度引誘你, 而UPGRADE價錢係$1000兩套, 但係婚展講左價係$800, 咁男友就睇啦, 黑色個D款又真係好似返工西裝咁, 咁個女仔就叫我男友試D UPGRADE款, 試左幾件我就同男友講, 你係咪會UPGRADE? 佢依然堅持唔UP喎, 真係好勁, 結果好快就5選2出黎, 一黑一白款, 真係好勁呀, 佢同其他男人真係唔同呢, 哈哈!!

返到屋企睇返自己揀既衫, 原來我仲揀左件綠色佢冇俾我試, 本來諗住想去試多次, 但上網再睇下, 真係揀唔到款, 而男友仍然堅持鍾意桃紅色, 所以我諗都係揀呢件桃紅色架喇!!

大家睇相啦, D相係我影佢個MON, D色係差左好多, 所以我會放埋原裝相大家對比下!

室內婚紗

似睡衣既晚裝~

呢件係桃紅色, 色差好大~

男友confirm既禮服

呢件掛頸我都好鍾意架~

呢件太花, out了!

未試過水母款專登揀黎試, 可惜男友唔鍾意!

呢件男友都鍾意, 不過婚紗quota已滿~

旗袍, 懶得除褲試, 其實成件都好閃, 不過咁樣睇又麻麻地~

金色.....個女仔話條裙似...金莎~

勁多人揀既江若琳款~

呢件都鍾意

太閃...唔係我杯茶~