再接再厲

自從台灣返黎後d車厘茄死左大半, 等左咁耐, 佢地終於叫枯死了, 於是我的起心肝又搞下佢地!

其實我有好多種子, 都係之前係d網友俾我, 不過夏天太熱冇乜野可以種, 而家轉季好多野都種得喇!

種梗既通菜依然健康, 黎梗會收割第二造, 哈哈!

開花既椒都係咁瘦, 只係見到一朵花開過, 今朝見到花落了, 唔知幾時會結果呢?

之前盆通菜有蟲, 見到屋企有上次打邊爐食剩既辣椒, 拆左出黎有好多種子, 我已經抽起左好多種子, 而辣椒肉就溝水淋佢地, 因為聽講辣椒水可以驅蟲, 由於我係主張有機種植, 所以唔落得葯, 咩方法都要試下, 而咁橋地....可能唔小心跌左辣椒種子落去, 竟然有兩棵發芽, 抽左一棵健康少少既換盆種先!

本身既三盆車厘茄都拔走了, 棵椒換左去大少少既盆, 佢原先既細盆又俾我落左d小型車厘茄種子, d種子係人地交換, 我原先個d係正常版, 呢個係小型版, 唔知發芽率有幾高, 所以我今次落左3粒種子咋!

另外一個大盆落左一堆通菜種子, 費事俾人話種埋都未夠炒一碟啦!

另一盆落左3粒甜豆種子, 又係唔知咩黎, 發芽先再睇下點種!

一早買左個超大盆, 今次開埋黎用喇, 種咩呢? 就係生菜喇, 哈哈, 又落左3粒, d種子係淘寶買, 唔知發唔發到芽呢??

通菜真係粗生, 冇乜打理都可以生成咁, 已經食左第一造架喇, 加下肥又等梗第二造~

左起係誤打誤撞發芽既辣椒, 甜豆, 小型車厘茄~