知足常樂

最近運氣唔錯, 好消息接二連三, 不過當然都要之前有返咁上下運滯先, 其中一劑就係巴士上遇到色狼, 伸隻手黎摸我, 好彩我都唔係弱, feel到佢有唔妥都有所防範, 只係當我出聲時真係冇人會幫我, 為左呢件事唔開心左幾日!

到冇幾耐後, 好運開始黎喇, 老細生日飯上有抽獎, 知道今年禮物好勁呀, 頭奬係cash 12k, 二奬係cash 8k, 三奬係IPAD2 64GB WIFI+3G版, 四奬係IPHONE4S 32GB, 五奬係IPHONE4S16GB, 六奬係IPAD2 64GB WIFI版, 之後仲有係SAMSUNG GALAXY S2, GALAXY TAB, cash 4k 等等13個奬, 另外再有10個奬係銀碼少d既cash, 有37個人抽23份禮物, 其實中奬率好高, 年年都係咁, 呢間公司抽到cash係要抽20%出黎歸阿公, 以作平時下午茶之用!

一年三次呢d大型活動, 就係老板娘生日, 老細生日同埋annual dinner, 我多數都係抽到少銀碼既cash, 因為就算乜都抽唔到, 都會有$500安慰現金, 今年首先係老板娘生日, 我抽到二奬五千大元, 到老細生日, 由於禮物升級, 下晝同男友講時, 佢話想要IPAD2, 因為我地已經訂左4S, 所以寧願要IPAD, 點知....我抽到部4S 32GB, 嘩....真係超興奮呀, 唔止咁, 當晚玩啤牌/打牌我都贏錢, 唔好以為我係爛賭之人, 只係呢D節目係公司飯局一定要參與, 仲有飲酒!!

FACEBOOK有間IWEDDING個個月會搞個FREE LOGO活動, 之前我參加過兩次架喇, 但係都抽唔中, 所以就放棄了, 直到最近見到又有十二月份FREE WEDDING LOGO, 趁呢排運氣唔錯又參加, 真係抽中左呀, 好開心!!

男友叫我幫佢買六合彩, 中左仲大把野唔駛煩呀, 哈, 上星期我地經過馬會, 入左去用馬飛拎錢, 張馬飛係老細生日個晚連埋利是派, 人人有份, 結果中左PLACE有$49.50, 入到馬會拎完錢, 男友拎左兩張飛出黎對, 原來佢成個月前買左兩張六合彩都未對, 點知原來中左$40呀, 其實都唔知係我好運旺埋佢定係其實佢都好運, 結果一齊又一人一張六合彩放銀包, 得閒先再對喇!!

其實我一直以黎都冇抽奬運, 玩乜都輸多贏少, 所以呢個月真係好開心, 我知道幸福唔係必然, 所以要好好珍惜, 我都冇奢望過發達個d, 只求d錢夠我地用就好, 做左太多年人喇, 好多野都睇化左, 最近身邊兩位姊妹都有感情煩惱, 而我可以做既都只係多d陪住佢地, 我都係過來人, 我知道呢一刻其實講咩佢地都聽唔入耳架喇, 可以做既只有陪佢地, 想當年都有一堆好友輪班陪我, 而經歷得太多, 亦會知道邊d係好朋友!

"知足常樂"呢句說話真係冇錯架, 呢幾年學識左, 做人都開心左, 希望身邊既朋友都可以明白啦!!