最後一個單身聖誕

話咁快又到2011年尾, 就快踏入2012年喇, 今年年尾真係好, 聖誕假踏住星期六日, 今個聖誕連放四日呀, 而男友放勞工假, 星期六又長週, 只係放左兩日假~

今個聖誕最大驚喜, 就係一d都唔浪漫既男友竟然有買聖誕禮物, 今次我真係完全唔知, 終於都冇破壞佢既計劃, 佢又用返同一招, 就係唔聲唔聲放埋一邊等我自己發現, 今次我好快發現左, 收到一刻仲大叫出黎~

拆開黎睇, 原來係Anna Sui耳環, 佢實在太了解我喇, 知我鍾意Anna Sui, 仲要係紫色既蝴蝶吊吊款, 好開心呀~

不過我冇買禮物呀, 邊諗到呢三年都冇送, 今年突然會送喎, 唯有煮返餐俾佢啦, 佢不嬲鍾意食住家飯, 所以放四日假, 煮足三晚俾佢, 哈哈~

呢個聖誕實在太開心, 要重溫一下:

24/12晚同一班好姊妹過, 我地成十幾年冇一齊過聖誕喇, 咪就係因為大家拍左拖有異性冇人性囉, 咁其實當中有一兩個都有一齊過既, 但未試過咁齊人, 仲帶埋自己男朋友/老公, 所以真係好開心, 仲有呢餐邊爐係我同好友既老公兩個半桶水既人去街市買, 我地成功買左一餐千元邊爐餸, 樣樣都好好食, 對做一個入得廚房出得廳堂既師奶又邁進一大步喇~

打完邊爐我地仲交換禮物, 玩card game, 仲有打牌, 竟然係玩通頂, 多年未試過呀, 走個陣得6度咋, 雖然好凍但係好開心, 男友話通頂+凍, 令佢諗起上次希臘旅行, 哈哈~

25/12我地瞓足一日呀, 通完頂真係好攰, 同埋自從有間屋真係唔多願出去 (其實我地兩個都好宅!), 好彩屋企有物資, 黎個自家聖誕大餐, 成餐都係我煮架, 有牛扒+薯角+蕃茄啦, 係咪好奇怪點解冇汁呢? 因為呢隻扒唔用汁都好好味, 只需要落少許鹽就可以了, 落汁反而會搶左佢原先既牛味呀, 仲有周打蜆湯, 當然係罐頭啦, 不過我另外加左蜆肉, 仲有手掌咁大既帶子刺身同甜蝦刺身, 全部見得下人架~

26/12 男友起身出去剪髮, 順便買餸, 都話佢好鍾意食住家飯架喇, 收到對耳環令我勁冧, 所以今餐都係我煮, 仲諗埋煮乜添, 包括有整過既土魷蒸肉餅, 同埋第一次整既蝦醬西芹炒蝦仁, 再煲埋雪梨雪耳甘旬豬展湯, 大成功, 全部清晒!!

27/12 男友要返工, 屋企個煮食爐撻唔著, 又懶懶地, 黎個懶人專煮既有味飯, 落街買左豬肉, 乜鬼都加左落個飯煲度, 又快又好食, 呢度有d乜呢? 瑤柱, 蝦乾, 銀魚, 蠔豉, 肉片, 好鬼豐富呢~

其實平時我間中都有煮架, 不過唔知點解個個都覺得我唔識煮飯, 今次連續三日中西餐都有, 証明我係入得廚房出得廳堂架, 聖誕大快樂~