台北之旅出發前

呢幾日既時間真係過得好快, 仲有兩日就出發, 但係我心情只有擔心冇興奮, 未試過旅行前咁多野未準備, 之前既三日都有屋企聚會, 搞到有假放好似冇假放咁, 上星期發完男友爛渣後佢都好左好多, 起碼佢少左上網(變左睇波), 仲有我之前整完甲同左佢講唔可以掂洗潔精, 個女仔話驚易甩, 咁佢呢幾日都乖乖主動洗碗, 不過其他家務都係一樣我做返啦!

琴晚拎左兩籠倉鼠去男友屋企暫住, 今晚會再拎兩籠俾另一個朋友, 琴日亦都將6盆車厘茄, 椒, 通菜放晒自動滲水器, 希望真係work啦, 不過黎梗幾日都好似會落雨, 我諗佢地唔會枯死既! 搞掂呢兩樣都好d, 不過仲有行程未plan, 行李未執過, 今日有d時間係咁易寫過下d行程, 其實好難就時間呀, 又唔知揀衫會揀幾耐, 揀相要揀幾耐, 影完相又唔知幾點, 頭都痛埋, 仲有一大堆野要買, 阿媽又話要我去龍山寺買十包八仙果, 無端端要我去龍山寺, 唯有將個行程改少少, 去埋個華西街夜市! 有個打機既台灣朋友原本話約星期三食飯, 琴晚又話俾人調左更, 可能唔黎得, 佢住新竹個邊, 搭車要個半鐘, 不過就算佢黎唔黎到, 我都決定會去周董個間MR.J食飯架喇, 哈哈!

暫定行程如下:
Day 1: 機場>凡登商務旅館>食少少野>綠攝鋪頭選衫>MR.J>台北101>凡登敷mask同早d休息, 第二朝要六點鐘集合, 慘~
Day 2: 六點到綠攝集合>跟車去苗栗或其他地方影相同露營
Day 3: 繼續拍攝>黃昏到台北返凡登>龍山寺買八仙果+華西街夜市>捷運返凡登
Day 4: checkout>永康街>中正紀念堂>綠攝揀相>玉鑫帝王蟹>莎多堡汽車旅館checkin>美麗華摩天輪
Day 5: 台北車站>巴士去金山浸溫泉>淡水>士林夜市>莎多堡
Day 6: checkout>台北車站寄存行李>西門町買手信>台北車站坐機場巴士>機場

其實真係冇咩時間, 原本想去九份同十分都抽唔到時間, 仲有d車我又驚要等好耐, 我而家好驚冇時間俾我行街買mask, 又驚會太攰成日掛住瞓, 男友又唔鍾意夜市既野食, 所以隨時會更改行程, 又係要我諗架喇, 唉~

仲有一堆野要買:
媽媽 - 10包八仙果
堂妹 - orea朱古力威化餅大量
二哥 - 老天祿鴨舌
朋友手信 - 一堆mask同護膚品算了
同事手信 - 食得分得既野, 例如鳳梨酥
自己 - mask同護膚品, 希望買到希翠蜜兒既安瓶

借左二哥部電腦過去, 原本諗住借ipad架, 但我驚要抄相, 同埋酒店未必有wifi, 可能要連線上網, 最後都係借notebook, 好重呀, 冇計啦要上網嘛, 哈哈!! 呢個blog我暫停一星期喇, 下星期一返黎先有時間先再update婚照既花絮上黎, 希望個風呢兩日打完, 去到台灣好天氣啦!!