**Minnie and Lou**: 台北婚照之旅 9/10 (Day 5)

黎到第五日, 對我地黎講叫最後一日架喇, 好唔捨得, 其實今日冇咩節目, 因為要揀相! 莎多堡送既早餐係7-10, 我地(應該係我男友)唔執輸既情況下, 專登九點起身去食早餐, 間餐廳好近, 上一層就係, 呢度多少少野食, 大少少, 不過都係唔吸引, 食左15min就返房繼續瞓, 十二點先夠鐘checkout先走!

行李依然係放呢度, 因為今晚我地係住另一間房架, 所以唔可以放係房! 去到last兩日, 我地開始好豪, 就係不停搭的士, 今日第一站係永康街, 懶懶地就係莎多堡搭的士去, 我記得都唔平架, 不過鬼叫個度唔近捷運! 一去到鼎泰豐就見到一堆人等梗, 嘩, 我幾年前黎個陣明明係冇咩人架喎, 走去拎飛時佢話預大約一個鐘, 原來門口個班主要都係日本人, 乜原來咁出名架? 我地拎完飛就去左永康街牛肉麵, 明明記得係公園對面, 點知搵左好耐都唔見, 原來.....搬左喎, 新鋪大左好多呢, 不過呢度d麵好貴, 我地仲買左包牛肉乾, 當手信又好, 自己食都好啦, 買左先算, 呵呵~

食完牛肉麵都未夠鐘, 就周圍行下, 沿路都聽到好多廣東話, 哈哈, 即係好多香港人黎呢度! 未夠一粒鐘走返去鼎泰豐, 本來諗住再要等就算, 點知佢話有張搭檯既即刻有, 咁我地就入左去了, 由於已經食飽, 我地剩係叫左個蟹粉小籠包, 其實我以前食過架喇, 不外如是, 只係想男友都試下, 結果佢都係覺得不外如是, 哈哈~ 食完已經兩點喇, 我地約左兩點睇相架, 唯有....又搭的士, 本來plan去中正紀念堂影張相都唔得, 直飛去睇相喇! 原來我地2日影左八百幾張相, 之前佢都叫我地預4個鐘揀相, 仲諗住我地揀快d咪得囉, 原來真係要足4個鐘, 我地仲要今晚又趕住食飯, 結果未揀晒又走左, 食完再返黎揀過!

成個trip最豪既一餐就係今晚喇, 上網見到有人介紹"玉鑫帝王蟹", 價錢係大約港紙$300, 佢有分火鍋同燒烤, 我揀左燒烤, 因為近d同埋我鍾意燒野多d, 呵呵!呢度我打過黎book佢話full左, 最後我苦苦哀求, 佢再打俾book左位既人睇下有冇人甩底, 結果真係有呀, 所以我地就可以去食了, 不過要6點鐘黎到, 為左食我地梗係乜都得!一黎到急不及待點野食, 個menu冇咩野食揀, 但係樣樣都好正, 呢度真係用炭燒架, 個waiter都好好人, 話每樣幫我地拎d黎先, 仲會幫我地燒, 有時行過又會話俾我地知邊d可以食, 最好笑係最尾我地已經好飽, 佢仲係咁叫我地叫多d啦, 食多d啦, 實在太好笑!! 而d野食都好正, 除左帝王蟹, 仲有虎蝦, 仲要係剝埋殼架, 真係正到爆, 食幾隻都好滯, 反而我食蟹用左好多時間剝殼, 另外佢仲有魚生我都冇食喇, 同埋牛小排都好好味, 不過都係冇咁大個胃食呀, 下次再黎台灣我一定會再黎架!!

食到好飽後又搭的士返去揀相, 出左小小意外, 又話用atm可以一日提兩萬台幣, 原來唔係架, 我地提完一次已經唔可以提第二次, 好彩第一次係用銀聯, 我地再用plus又可以提, 不過都係限兩萬台幣! 揀完相成九點喇, 我地又搭的士喇, 哈哈, 因為美麗華摩天輪收十點, 我驚趕唔切嘛, 搞到今日全日都係搭的士添! 去到摩天輪就排隊買飛, 都幾多人, 原來而家有埋水晶車廂, 不過我搭普通既都驚, 所以唔駛諗水晶喇! 搭完後就完成我地既行程, 返莎多堡喇!

今朝莎多堡送左兩張按摩券我地, 係45分鐘既腳底按摩或30分鐘肩頸按摩, 非常適合咁攰既我地, 趕返去問下用唔用得, 佢話佢地收十一點, 同埋用呢d卷要book架, 我地返去都十點半, 點算好? 就靜雞雞走入去按摩個場度問, 佢地好好人呀, 話俾我地按埋先收工, 叫我地拎完行李上房就落去, 勁開心呀! 呢度個場好舒服, 我揀左腳底按摩, 好掂呀, 其實我係香港都有做開, 所以都知佢d位應唔應, 呢個師傅真係好勁, d位按得好鬼準! 男友做肩頸都係, 睇佢個樣真係好好笑, 好似係勁冧咁, 做完個陣我地仲諗駛唔駛俾tips呢? 但我地乜都冇帶落黎, 結果係唔駛架, 真係好好, 多謝莎多堡!!

輪到介紹最後一晚既房, 係希臘房呀, 呢一層既走廊size終於叫做正常返, 咁橋有一班遊客入住, 佢地開晒門交換睇下大家既房係咩樣, 我地都八八卦卦咁裝下人地既房, 哈哈! 我地既希臘房都好正呀, 房既面積都好正常, 除左照舊有按摩浴缸, 估唔到仲有蒸汽房, 呢兩晚既酒店錢係貴, 但係因為假期關係, 所以比起其他cheap酒店其實唔算貴好多, 經我講價後, 兩晚係港紙$18XX, 佢仲送左兩張按摩卷俾我地, 計落其實都幾抵吖, 最緊要我地真係好鍾意!!

最後一晚我地都唔願瞓咁, 大家唔好諗衰野, 我地係掛住睇電視, 哈哈, 電影台做"艋舺", 我地去完華西街當然好有興趣, 結果就睇, 個時都一點幾兩點, 到沖完涼又做"李小龍", 呢齣之前想睇冇睇到, 結果又睇, 最後成四點先瞓呀!!