台北婚照之旅 7/10 - Day3

今日八點小米就叫醒我, 琴晚算係瞓左好多, 不過呢度係郊區, 五點幾俾雞啼嘈醒左! 化妝師幫我化妝, d男人就繼續瞓, 慢慢都陸續起身! 收拾行裝, 我換左婚紗, 男友換白色禮服就出發, 首先去左間快餐店食早餐, 之後第一站影既係一個茶葉園, 今日好曬呀, 影相真係好辛苦, 眼都開唔到, 我又冇搽防曬, 實曬黑啦! 第二站唔係影相, 係拍mv, 佢地話拍求婚片段, 地點係一個路中心, 又有火車路軌, 都幾搞笑, 我覺得拍mv好似白痴仔咁, 對住鏡頭做野, 係度傻笑, 真係佩服d歌星!!

第三站個地方叫三義鄉勝興村, 好多日本遊客, 呢度好似日本呀, 都幾鍾意, 不過因為太多人, 搞到好多奇異目光望住我, 好唔慣呀!! 影完後我地換便服影, 今次我地都係著黑白配, 我條白色裙係希臘買, 都影過好多次相, 男友就恤衫短褲, 因為我之前set個d頭全部放落黎, 其實我想紮起架, 反而我紮起係冇咁肥, 所以我就叫佢幫我紮起佢!! 最後一站係一個漁市場, 有d似三聖村/西貢等等呢d地方, 附近有個沙灘, 又有風車, 估唔到影呢度都好辛苦, steven係咁要我地跑住影, 又成日要我男友抱起我跑呀轉呀咁, 哈哈, 真係多得佢唔少!!

終於都影晒相喇, 不知不覺都好晏, 原來我地未食lunch, 佢地係附近買左燒魷魚同炸大腸包小腸, 超好味呀, 佢地話都係第一次食呢隻款既大腸包小腸, 佢係個面炸左, 好特別!! 食完後就搭車走了, 由於路途遙遠, 我地都瞓死左, 去到台北已經七點, 我地就搭的士去凡登checkin了!

今晚間房又唔同左, 仲靚d架, 我地放低行李又要起行, 因為約左我既打機台灣朋友食飯, 時間太趕, 我地又搭的士喇, 放工時間好塞車呀, 我地約左去周董既MR.J食, 呢間係我揀架, 台彎朋友都未黎過, 因為佢地係住新竹, 其實好少黎台北, 就算佢地唔黎我地都會黎試, 呢度有"不能說的秘密"既鋼琴, 仲有好多劇照, 好特別架!!

呢度既野食又唔貴, 大約每個餐$100左右, 味道都OK啦, 我叫個茄汁龍蝦意粉, 估唔到係辣, 最後同男友交換左! 我地係度狂影相, 食完就走喇, 因為佢地返去都好耐, 而我地可能琴晚瞓得多, 搭車又瞓左, 好鬼精神, 走左去西門町行, 食左阿宗麵線, 好掛住呀, 哈哈, 男友本來對呢d唔健康既野冇興趣, 我叫佢幫我食左d大腸佢, 估唔到佢又讚d大腸同香港唔同, 仲好似幾鍾意, 呵呵! 佢條友真係好冇癮架, 本身佢個人係好健康, 唔鍾意d唔健康或者加工過既野食, 例如麥記, 打邊爐個d丸呀, 小販呀等等, 我就同佢完全相反, 掃小販不知幾開心, 結果黎到佢樣樣都唔試, 捉佢試完阿宗麵線, 就再捉佢試蔥抓餅, 哈哈, 佢剩係話好食囉, 可能心裡面都係話唔健康!

連食兩場後我地就搭捷運返凡登了, 影完相我真係好似放監一樣, 大吃特吃! 好期待d相, 原本約聽日去揀相, 但steve有婚宴要影, 改左後日先揀, 好心急呀, 其實呢兩日咁多個造型, 我真係唔知自己係咩樣, 因為冇鏡, 我剩係睇返自己部相機先知自己係咩樣咋, 期待d相之餘仲有聽日正式係我地既自由活動, 我辛苦左咁耐安排既行程終於開始喇!!

太肚餓, 一邊化妝一邊食零食, 我地之前一晚係瞓車, 佢地4個瞓隔離個帳幕!

好曬呀!

曬到要用個花球遮太陽

扮驚喜~

好鍾意呢度, 有個香草園真係好香!

呢度都好多蚊同蜜蜂架!

扮沙灘上漫步~

又要跑喇, 我地係度跑左好多次~

第二晚既房, 靚D架~

到達MR.J, 呢度任影相架~

台灣朋友R仔

好大張POSTER

多年冇食阿宗, 依然係好多人呢!