我的第一次整甲

為左準備下星期去台灣影婚照, 專登走左去整甲, 呢排有好多團購, 不過都好難book, 又或者好遠, 我個人比較懶, 最好搵間又平又方便, 之前聽人講做gel甲要keep住做, 如果唔係拆完之後會樣衰一排, 同埋d指甲會變薄, 嚇到我唔敢gel, 同埋有咁長既甲真係好唔方便做野呢, 尤其我呢d要做家務同打機既人! 後來聽聞一隻叫soak off gel, 唔駛打磨, 即係唔會令指甲變薄, 上網搵左一輪, 搵到一間叫KK nail, 係深水埗, 而家百幾蚊咋, 睇佢d相好似係得soak off gel同uv, 見到有d都幾好, 我鍾意清清地既款, 所以就打左去book了!

打去book時我問佢要做幾耐, 佢話3粒鐘, 我即刻大叫: 吓?要3粒鐘架?  佢: 咁你平時自己搽都要1-2個鐘啦!  我: 我冇搽架喎, 哈哈!   講真, 佢話做幾耐都要做架啦, 鬼叫貪靚咩! 上晝撞正八號風球唔駛返工, 仲諗梗佢會唔會開, 四點幾轉左3號時打俾佢, 佢話會照開呀, 所以我就搭車出去了!

佢地點係深之都, 個商場D鋪頭勁細, 仲要冇人行, 佢個鋪位都好細, 坐低佢同我修甲, 之後就開始了, 因為我未整過, 所以好多問題, 哈哈, 佢又好好心機樣樣答我, 佢間鋪開左三個月咋, 話遲D有部電視會冇咁悶! 修甲, 落GEL, 照燈, 加色, 落GEL, 加印花....真係搞足3粒鐘, 我真係好想瞓呀!!

由於我用黎襯婚紗相, 所以揀D簡單既, 一早諗住係法式, 去到佢話白色配黑色印花GRAND D, 咁我就信左佢, 但估唔到真係好多選擇, 法式又可以揀漸變, U字或斜, 我揀左打斜呀, 之後到印花, 又係有一大堆選擇, 仲俾我試完覺得OK先做, 同埋落左少少閃粉俾我, 整完出黎我都幾滿意呀, 佢做promotion $158咋, 仲送左支指甲銼俾我同教我兩星期後要自己磨短, 我覺得呢個價錢真係好抵, 有機會再搵佢玩其他款!!

倉鼠BB

忙左幾日, 主要係幫倉鼠BB搵新主人, 一直都強調, 如果搵唔到我就會自己養返, 最多咪全屋都籠囉!! 有位朋友一早話可以要一隻, 不過佢係新手未養過, 都係睇到我D相得意話想養, 其實我都好擔心, 我同佢講左N次倉鼠係要一籠一鼠, 如果唔係會打交/生BB, 總之就要一籠一鼠, 當我以為佢知道, 佢亦同我講睇左好多關於倉鼠既野時, 佢叫我俾男仔佢, 我同佢講, 其實我真係唔太識睇, 驚俾錯佢, 再問佢點解, 佢竟然答我: 我應該會養2隻, 人地話仔冇咁易打交!!
我聽到真係火都黎, 由始至終我都係話俾一隻佢, 原因係我怕佢會養埋一齊, 同埋佢揀籠時, 又嫌個籠太大, 咁你用細籠之餘仲要養2隻, 佢地九成會打交囉, 之後我用左數百字, 再加好多既網上文章, 圖片俾佢睇, 勸佢唔好養2隻, 唔知佢有冇睇, 但我真心想佢聽話, 自己俾唔到好生活隻BB, 都想人地俾到佢!!

剩返4隻BB加本身2隻, 即係6隻倉鼠, 係我準備自己養返時, 竟然有個女仔係uwants度post想養小紫王/銀狐, 想由BB開始養起, 佢留左MSN, 咁我ADD佢傾左陣, 順便套下佢料, 係一個19歲既女仔, 傾落我覺得佢唔係壞人, 佢話佢可以要2隻, 佢妹妹都想養, 仲會每人一個籠, 而其中一個籠將會係我讓俾佢, 因為我自己都想換過個, 而佢又鍾意我用梗個個巧克力工廠, 咁我就平少少讓俾佢啦, 而佢妹妹亦訂左一個同我呢個同款但細少少既籠, 希望佢地可以俾到健康快樂既生活環境2隻小寶寶啦!

好興奮地同男友講, 有人要2隻倉鼠, 咁我地旅行個度冇問題喇, 唔駛再搵人幫手照顧, 點知佢話....唔捨得, 俾少少時間佢平復下先, 真係估佢唔到, 雖然我都好唔捨得, 我亦同新主人講左好多次, 希望佢地可以定時SEND相俾我, 我真係會掛住佢地架!

倉鼠問題總算解決了, 以後屋企會有4籠4鼠, 我會好好照顧你地架喇!!

呢排幫BB影左好多相, 睇住佢地長大好似睇住自己個仔長大咁, 見到佢地由冇毛, 未開眼, 到識企識行到而家好得意咁, 真係想像唔到第時我做人阿媽會點, 而家十幾日大, 已經開始打交喇, 新籠一到我就會幫佢地分籠架喇, 再遲D就要送走佢地, 好唔捨得呀!

婚戒到手

上星期試完婚戒後, 今個星期就有得拎了, 不過兩次男友都遲放工又唔出聲, 可憐既我兩次都係百利孤獨行街等佢! 婚戒帶左上手覺得冇咩唔舒服, 有少少緊不過可以接受, 太鬆我驚會好易甩, 同埋冬天應該會鬆d, 裡面都刻左名, d字仲好靚添, 唔講咁多喇, 大家睇相啦!!

GIRDLE

係facebook見到有人講girdle, 我就寫下自己買girdle既經歷! 其實早係第一次影相時, 已經買左個satami既girdle, 我係d細既內衣鋪買, 二百幾蚊, 其實我試過好幾個牌子, 最後satami係最fit同埋價錢ok, 又見多人買呢個牌子, 所以就買左了!

著過2次影相後, 有次係網上睇到多人讚奇華特既蔡太, 不過要排至少一粒鐘之餘, 仲要俾佢當眾品評自己個胸, 我真係接受唔到, 所以幾好都唔會去, 其次出名係私人空間, 有朋友都幫襯過, 價錢比較貴, 同埋冇乜特別, 仲有間係bodi bra, 即係之前既心心, n年前已經覺得呢間野唔掂, 賣既bra洗兩洗會勁殘, 即係質料勁差, 但價錢又唔係平喎, 佢既cup數更加係好笑, 買開a或b去到係變左買c或d甚至乎係e, 之後上forum睇, 開始有好多人彈佢地既product好cheap, 仲有人話係觀塘街市見過一模一樣既bra, 只係佢地會釘上自己logo, 真係勁搵笨囉, 我仲買左幾張coupon, 之後全部用晒黎買褲仔, 佢既褲仔都係比起其他鋪頭貴, 但係冇計, 都要用埋佢架啦!

後來有一間又係突然好多人讚但未聽過, 就係GLC, 係百利樓上鋪, 主要來源係有一位新娘係ESD讚, 其後就多左人去買, 最緊要係唔貴吖嘛, 只係二百幾蚊, 同埋佢要預約, 每次只會接見你一位客人, 咁唔會出現尷尬場面, 咁我就打去預約了! 個女仔幾好禮貌, 同埋都幾後生, 上到去地方都幾大, 因為佢貨種唔多, bra只有幾款, nude bra都係兩三款, girdle只係得兩款添, 分別係尖d同圓d, 佢叫我兩個試晒比較下, 試左尖個個, 我覺得幾怪, 所以即刻除返落黎試圓個個, 都ok架, 但係...其實同我satami好似囉, 佢話想勁d既話, 好多人會裡面加nude bra, 咁佢又幫我試帶佢地既nude bra, 但我要除晒俾佢幫我帶, 都幾尷尬架, 但帶完之後, 真係有強勁既事業線出左黎, 不過我覺得好假喎, 識我既人都知我咩料架啦, 無端端點會有條咁深既事業線, 係人都知係假架啦, 同埋佢個nude bra賣$128, 但質料同我團購$38既係一模一樣, 一樣都係透點, 所以我話唔駛買nude bra喇, 自己都有!

個一刻其實我想連girdle都唔買就走, 但係會好樣衰, 同埋我有一邊胸係細d, 佢話可以幫我改少少, 就係咁...夾硬地幫襯左佢, 不過我本身有個satami, 冇理由買一樣size, 預左自己出年會瘦, 所以我買細左一個碼, 當迫自己減肥都好啦! 好啦, 咁網上見到d人話佢好好, 教人帶nude bra, 我就問佢其實nude bra點帶架, 佢答我: 到時你d化妝師會識幫你帶架喇!  <--- 咁樣打發我, 真係有d嬲!!

佢話佢地既產品全部係自己廠造, 連nude bra都係, 但我見到佢個nude bra包裝其他鋪頭都有架喎, 仲要平佢地好多! 至於我對佢地既comment係...一般囉, 同去細鋪冇咩分別, 同樣既二百幾蚊我寧願去細鋪買出名既satami, nude bra更加唔駛係佢地度買, 我睇返esd個段野, 個女仔都唔知係咪佢d朋友黎既, 專登開個post話讚呢個girdle, 之後仲要有幾版既留言問佢拎資料, 怪不得咁多人幫襯佢, 連我都中埋招, 可能都有人覺得佢地好, 我唔係話佢地差, 只係佢地同細鋪買satami冇分別, 仲有你上得去就預左要幫襯, 如果唔係會超樣衰, 同埋佢地只係收cash, 我到而家都係有d後悔呀!

試婚戒

早幾日ADIAMOND打黎話可以去試婚戒, 琴晚放工就同男友去左百利試了, 我地都剛剛好帶到, 即係有少少緊個隻, 佢話我地剛行完, 同埋天氣熱都會令到手指腫, 冬天手指會瘦返d, 男友話唔駛改size, 咁我都唔改了, 對戒指爭磨沙同埋裡面刻名就搞掂, 大約下星期可以拎了, 真係快手, 上次佢叫我地諗下裡面刻乜, 因為出面都用左英文名, 裡面可以揀中文名, 我地返到去都唔記得左, 琴晚老細問我地先醒起, 哈哈, 好求其咁話刻中文啦, 個陣我掛住影相, 男友同佢地傾, 之後我問返裡面點刻, 我以為會係我個對係佢名行先再加一個心, 再到我個名, 佢個對就相反, 原來佢地傾左係兩對一樣, 佢個名行先, 加一個心再到我個名, 好似係話中文係男仔名行先, 都好呀, 兩對都係佢"心"我, 哈哈!!

光線問題, 其實粒石係紫色, 同埋我地既名, 不過唔知點影先清楚!

呢邊係日子, 我有三粒紅石, 男友一粒深藍石!

正面樣, 爭個磨沙就搞掂, 老板娘話磨沙後d石會出d!

俾人話我地對婚戒咁複雜, 其實就咁睇都唔係好複雜姐!

London Taxi

早係半年前我已經book左花車, 哈哈, 因為一早已經鍾意, 又驚book唔到心水, 所以咪hold左先囉, 就係阿達既London Taxi, 佢出左名平靚正, 同埋我hold左架紫色, 佢話到時其他色如果有期可以轉! 當初book個陣有考慮過紅色, 但係個時阿達話未有, 而且將會有, 所以我地都諗住等佢出左新色就睇實物, 睇下駛唔駛轉色! 而呢一晚我地終於捨得去睇喇!!

約左夜晚十一點去沙田睇車, 冇錯, 係夜晚十一點, 冇計啦, 阿達又難約, 而今晚我地又約左人食飯, 唯有約咁夜, 去到停車場見到佢d車晒冷擺晒係度, 好型呀! 第一眼就見到自己架紫色, 實物好靚喎, 最初仲驚梗咁多人用會唔會好舊好殘呢, 又唔會喎, 最估唔到我男友都好鍾意, 我地仲專登帶左對公仔去睇下襯唔襯, 估唔到又幾襯呢! 之後去睇另一架好鍾意既, 就係白色古董車, 真係好靚呀, 不過架車比較矮, 我男友非常鍾意, 可惜貴, 同埋而家都俾人book左了, 想轉都冇得轉啦! 之後就睇酒紅色, 比我地想像中深色, 其實都ok既, 不過男友有少少嫌太深色, 我專登著件紅色衫去, 有輕微撞色! 紅色隔離個架係新既水晶紫, 車身係粉紫色, 車頭同車身都有水晶石, 都幾閃, 呢架貴$500, 未睇實物前有諗過轉, 不過男友睇相已經話太粉, 睇完個實物更加唔鍾意, 個內籠全銀色, 好"李龍基"feel, 加上車牌號碼冇咁靚, 我連同架車合照都費事, 而其他仲有桃紅同粉紅色, 我地都冇影相, 因為個停車場太熱喇, 我見阿達都出晒汗, 雖然佢開左其中一部車涼冷氣, 不過都十一點幾, 真係唔好意思搞住人地咁耐囉, 所以我地冇乜點玩就走了!

同對龜都幾襯丫!

紅色衫, 哈哈~

呢架紅色都OK, 不過都係鍾意紫色多D!

男友嫌太粉紫~

呢架係最愛, 不過成架車真係矮, 同埋貴!

Yahoo Blog 小改善

之前寫過YAHOO BLOG UPGRADE後感, 前排再填左份問卷, 老實講, 我真係全部都填不滿意, 除左UPLOAD相個PART覺得快左外, 其他全部不滿意之餘, 仲不停寫左好多不滿既地方, 剛剛發覺開始有少少改善, 首先我之前係咁話低能既"私人回應", 就係你留左"私人回應"俾版主, 版主回覆你既時候, 你入去BLOG度睇係睇唔到架, 只會睇"私人回應", 要睇內容只有係EMAIL先睇到, 剛剛發現改左了, 人地既REPLY終於睇到, 呵呵!! 第二樣係人地寫新BLOG, 一直講梗個個都唔知BLOGGER有冇寫新BLOG, 只可以每個BLOGGER入一入去望下, 勁浪費時間, 而上面個"最近更新"之前一直係SHOW冇更新, 明明有人寫新BLOG都可以話冇, 但呢幾日又發現佢有SHOW野喎, 不過係"選擇性"地SHOW囉, 所以都仲係不能作準, 希望YAHOO會繼續改善啦, 而家已經好多人轉左地方, 我唔想呀!!

鼠女生BB

琴晚放工返到屋企, 驚見阿女個籠有幾隻bb, 嘩...簡直晴天霹靂既感覺, 即刻打俾男友, 其實我地都有少少預左, 因為前主人之前放既幾隻鼠女, 有兩個領養完都話生左bb, 我養左一星期都冇事, 仲以為走得甩, 原來唔係囉! 好彩既係只生左5隻, 暫時乜都做唔到, 又驚嚇襯鼠女, 佢會咬死bb, 只可以唔搞佢, 同埋拎開阿仔個籠, 不過鼠女又會好似平時咁要我俾野食, 聽講剛做媽媽要餵奶, 所以我俾左d芝士佢食!

雖然只係養左一星期, 但見到佢做左媽媽後既母愛, 有少少感動呀, 佢將成個籠既木糠堆晒係個角落度遮住d bb, 仲有收埋一堆糧, 之前佢好鍾意走黎走去同埋玩轉轉, 琴晚成晚都係哺係d bb上面餵奶, 突然覺得佢大個女, 好感動呀!!

5隻bb而家要搵人收養喇, 因為我收養左一星期, 都唔知爸爸係咩品種, 只係知媽媽係小紫王, 如果有人有興趣領養, 可以話我知, 屋企有貓狗蛇既我都唔會俾, 剩係想鼠鼠有一個溫暖既家!!

呢個就係媽媽喇, 都冇諗過原來佢肚裡面有5個BB~