求婚

2011年7月30日, 男友終於求婚了!

呢一日男友要返工, 我如常瞓覺, 平時放假我都係瞓到下晝, 中午時間我紮醒左, 聽到門口有聲, 好驚係有賊, 即刻衝左去門口, 睇住有人開門真係好驚, 唔知點算好, 但係佢係用鎖匙喎, 有屋企鎖匙除左我地兩個, 仲有我地既媽媽, 唔會無端端衝上黎卦, 不過都冇時間諗, 開個門有幾耐? 轉眼就見到男友入屋, 我呆左下問佢, 你做乜返黎? 之後佢拎住紮花入黎 (紮花佢開門個陣放左係走廊), 我話你做咩呀? 佢話....求婚囉!

其實我仲未瞓醒, 著住套睡衣, 牙未刷面未洗, 我話: 吓? 你呢個時候求婚? 之後佢就拎住紮花, 拎住隻戒指遞俾我話: 嫁俾我啦!  之後我話: 你唔駛跪架?   佢先識跪! 

我個心係度諗, 點解唔感動既? D人求婚會喊架喎, 但我完全冇想喊既衝動, 收左隻戒指, 我話: 收住先啦!  佢話: 咁即係嫁唔嫁呀?  我話: 唔嫁住呀!   佢話: 好啦, 咁出年12月8日嫁啦!   咁都得??

之後佢話要返工喇, 原來佢想俾我既驚喜就係佢返工時間返黎屋企求婚, 不過佢估唔到我會起左身, 佢本身係諗住入房搵埋D龜龜一齊求, 繼上次俾我搵到佢隻戒指, 今次我又破壞左佢既計劃喇!

佢話之前諗住去南丫島或者沙灘求婚, 不過我成日話好熱呀, 好忙呀所以唔去, 紮花佢訂左好耐, 原本剩係紅玫瑰, 點知有次我睇FACEBOOK同事NATNAT放左張朋友花店開張既相, 有張係馬蹄蘭既花, 我講左句: 幾靚喎!!   佢回左句: 聖安娜個隻花之嘛!!  原來佢記得我講過既野架, 呢下真係要加分, 後來佢就走返去花鋪加馬蹄蘭既花, 不過花鋪既人話呢排既馬蹄蘭唔靚呀, 所以遲左送!

佢本身叫左送花既人十一點送到屋企樓下, 點知人地遲到, 佢係樓下等左個幾鐘, 哈哈, 好可憐呀!! 求完個婚佢又要趕返公司返工喇, 因為佢係偷偷地走返黎架咋!

呢個就係求婚喇? 佢臨走時我講左句: 點解唔感動既?  佢話: 咁點算呀?  我話: 再求過啦!  佢勁無奈地走左, 哈哈!!

可能係我平時都好少喊, 即係人地話會睇到喊既戲, 我睇都唔會喊架, 唔通係我冷血? 其實我有諗過係咪之前佢EX係我度留言搞事, 佢先而家求婚, 但佢又話紮花一早訂左, 同埋我地真係忙左好耐, 佢話得今日先得閒, 最重要係佢想買結婚戒指去台灣影相, 而未求婚又冇理由走去買結婚戒指先, 不過我都唔諗咁多了, 最重要戒指已在我手上, 發現左咁耐終於可以帶喇!

隻戒指係佢靜雞雞去買, 款都係佢揀!

叫人刻埋名, 乜求婚戒都會刻名架咩?

放左幾個月, 終於可以帶住喇!

夜晚飲完酒醉醉地都要影返張相先!